TLABUNG-A ‘THANGLIANA (LEWIN) FOUNDATION’-IN HERITAGE BUILDING TE CHEI THAT AN DUH

 TLABUNG-A ‘THANGLIANA (LEWIN) FOUNDATION’-IN HERITAGE BUILDING TE CHEI THAT AN DUH

><}}> Dr. John, 28.07.26

Tlabunga ‘Thangliana (Lewin) Foundation’ chuan, an khuaa heritage building tun thlenga la dingte chu a nihphung bo loa chei that an duh tih an sawi.

Thangliana (Lewin) Foundation chuan nimin khan thuchhuah siamin, Tlabung khaw dintu Lt. Col. Thomas Herbert Lewin chu Mizoten Mizo hnam hmakhua ngaitu mingo kan tawn hmasa ber nia an ngaih thu sawiin, a kutchhuak humhalh leh chawilar tura din Thangliana (Lewin) Foundation chu Mizoram Sorkar hnuaiah dan anga ziah luh a nih thu an sawi a, Thomas Herbert Lewin chu Mizo chanchin chhui leh zir bingna lama ngaihtuah seng nasa apiangin an ngaihsan thu an sawi.

Tlabunga Thangliana sûlhnu la hmuh theih - Mizorama Post Office hmasa ber te, Police Station hmasa ber bakah Inspection Bungalow leh a dangte chu a tluk chhiat mai loh nan, thawmthat a nih theih nan hma la turin Sorkar hotute an dawr mek tih an sawi.