MZP-IN NEET-UG 2026 EXAM QUESTION LEAK OUT AVANGA HARSATNA HRANG HRANG THLENG DUH LOHNA LANTIR.

 MZP-IN NEET-UG 2026 EXAM QUESTION LEAK OUT AVANGA HARSATNA HRANG HRANG THLENG DUH LOHNA LANTIR.

><}}> Dr. John, 24.07.26

MZP General Headquarters buatsaihin, Nimin chawhma dar 11:00 atang khan Aizawl Vanapa Hall tualah NEET (UG) 2026 exam question leak avanga harsatna hrang hrang thleng mek leh zirna kalphung fel fai zawk a awm theihna tur te, exam system thianghlim zawk a awm theihna tur leh zirlai rilru thianghlim tak takte harsatna tawk an awm tawh loh nan Peaceful Protest hi an buatsaih a. Punkhawmnaah hian MZP President, Dr. C. Lalremruata chuan, niminah protest hlawhtling taka neih a ni tawh a, thalaite leh zirlaite lungawi lohnate leh an thahnem ngaihnate an hmuin, an hria a, nimina an hmalakna chu an thlawp em em tih a sawi a. Zirlaite leh thalaiten MZP an beiseina te, an duhkhawp lohna thawm Social media leh hmun hrang hrang atangin an hria a, an duhkhawp lohna zawng zawngah thinlung takin ngaihdam an dil a, an tlin tawk lohna leh an duhkhawp lohnaate thurawn pe zel tura sawmin, an inhawng reng tih a sawi a, ram tana tangtlang turin a sawm bawk.

Dr. C. Lalremruata chuan, MZP chuan ram leh hnam leh zirlaite tan tun hma atangin theih ang angin hma an lo la tawh thin a, Mizoram quota hmanga technical line hrang hrang an zir ve theihna tur hnam dangin an chuh buai a, Mizoten an chanvo dik tak an chan theih nan an hruaitu hmasaten theih tawpin hma an lo la tawh thin a, chungah chuan hlawhtlinna changin Mizo zirlai tam takin anmahni quota hmangin, man tlawm zawkin zirna in tha tak takah te tribal reservation hmangin an lo lut tawh tih a sawi.a. Vawiinah hian tribal nih hi a zahthlak lo va, hemi avang hian Mizo zirlai tam takin zirna in tha tak takah man tlawm zawkin lehkha an zir theih phah a, mi tam takin hlawhtlinna an lo chang tawh a ni a ti. MZP President chuan, tun tuma NEET question leak out chungchangah mi tam takin MZP an beisei dan te, an laka an lungawi lohna zawng zawng an hria a, MZP chuan an theih tawpin hma an la a, tun tum NEET buaina hi Mizo zirlai sang 2 chuangin an tuar a, tribal reservation chu nei lo se tuna NEET exam-a Mizo zirlai titha ber pawhin quota chang lo tur a ni a ti.