HRIPUI HI ENGAH NGE KAN CHUNGAH A THLEN? (Natna, Tuarna, Chhiatna leh Thihna-te hi eng vanga thleng nge?)

*1. THUHMAHRUAI*

Mihring chuan dam leh hlim hi kan duh ber leh kan zawn ber a ni. Hemi avâng hian, a dêr pawhin, kan hlim hmêl, nui sâng hmêl leh hlim taka thil kan tilai niawm tak-te chu FB, Whatsapp leh Instagram-ah te kan târlang chuai chuai țhin. Kan thlalâk ringawt en chuan khawvêla mi hlim thei ber ni-awm takin kan lang ţhin. Mahse, a tak takah chuan kan ni si lo!

Natna, chhiatna, lungngaihna leh thihna-te kan chungah emaw, tute chungah emaw a lo thlen hian, zawhna kan zâwt ţhin. Tuteemaw chungah chuan an natna, tuarna leh lungngaihna-te chu thleng âwm ngawih ngawih-a kan hriat laiin, miţhenkhatte chunga thleng erawhchu, mak kan ti a, âwm lo kan ti a. A châng phei chuan, Pathian pawh kan dêm hial ţhin a ni.

Pathian Engkimtithei, hmangaihnaa khat hian, chhan ţha tak awm lovin a thilsiam-te chungah hian thil ţha lo hi a thlentir ringawt dâwn lo tih a chiang a, “In Pa vâna mi hriatpui lovin Chawngzawng pakhat pawh leiah a tla lo” a lo ti tawh a ni (Matt.10:29). Chuvangin, kan chunga thil thleng (a chhia a ţha) zawng zawng hi Pathianin min hriatpui vek a, min en reng a, a remtihna ngeiin, chhan ţha tak neiin kan chungah a thleng a ni, tih hi chiang taka kan hriat a, kan pawm hmiah a ţul a ni.

CORONAVIRUS LEH PATHIAN THILTUM… (Thudik i hriat theih nân, uluk takin chhiar chhuak rawh…)

1. THUHMAHRUAI

Nikum, 2019 December 31 khân, China chuan he hri (Coronavirus - Covid-19 tia vuah tâk) hi Wuhan khawpuiah a lêng ţan tih WHO-ah a report a.  He Hri hi an control theih meuh chuan Chinaah chuan, mi 81,439-ten an lo kai hman a, mi 3,277-in an thihpui hman a ni.

Tunah hian, Khawvêl a dâp ţan mêk a. Ram 196-ah a ţai-darh tawh. Khawvêl-a mi 422,614 in an vei mêk a, mi 18,892-ten an thihpui tawh (As on 25.3.20, www.worldometers.info). India ram bikah, vei 519 awmin, mi 10-in an thihpui tawh a ni.

Mizoramah pawh vei an awm tawh thu leh ZMC, Falkawnah enkawl mêk a nih thu Sorkar-in, March 25, 2020 khân thuchhuah a siam. Engtianga nasa chiahin nge Mizoram hian kan tuar dâwn ala hriat loh. He Hripui lakah hian Pathian vênhimna leh chhanchhuahna mak tak kan dawng hlauh thei bawk.  

DOCTOR-TE LEH MEDICAL STAFF-TE TÂN I ŢAWNGŢAI ANG U... (Hripui laka kan him theih nân thinlung tihtak zetin ţawngţai-sak rawh)

Khawvêla Hripui hlauhawm tak lêng mêk, Covid-19 chuan, kan Ram India pawh a rawn rûn ţan ve ta! He Hripui laka kan him theih nân, Mizoram pawh theihtawpin a lo inbuatsaih a, Kohhran leh Sorkar ţangrualin, he Hripui hi kan bei mêk a ni.

Pathian khawngaihna leh vênhimna zarah, he Hripui hi kan hneh ngei ring ila, Thuawih takin, Fimkhur takin, Pathian lam hawiin i ţawngţai chhunzawm zêl ang u.

Hetianga Hripui hlauhawm a lo thlen hian, a do tura mi pawimawh zualte chu, Doctor-te leh Hospital-a thawktute an ni. Hripui hi a hlauhawm poh leh, Doctor-te leh Thawktute tân hian a hlauhawm zual sauh a. Hripui kaina chance an nei sâng ber bawk a ni. Mahse, chumi avanga an kiansan emaw, an tlâwmsan emaw a thiang lo! Anmahni ngei pawhin an duh ngai lovang!

Chuvangin, Doctor-te leh Hospital-a thawktute hian ţha taka Dam lo leh Hrivei-te an enkawl dam theih nân, damna leh hrisêlna, chakna leh himna an mamawh êm êm a ni. An Himna leh damna hi anmahni tân mai a ni lova, mipuite tân a ni zâwk mah awm e.