CHIEF MINISTER PU LALDUHOMA’N JOINT HNAMPUAL MEET, 2026 HMANPUI

 CHIEF MINISTER PU LALDUHOMA’N JOINT HNAMPUAL MEET, 2026 HMANPUI

><}}> Dr. John, 27.07.26

July 25, 2026 khan, LPS Arena Falkland, Aizawl-ah Joint Hnampual Meet-2026 programme chu Joint Hnampual Students’ Organisation (JHSO) bultumin buatsaih a ni a, Chief Minister Pu Lalduhoma chuan Khuallian niin a hmanpui.  Inkhawmah hian Pu Lalmuanpuia Punte, Adviser to Chief Minister (Political) chu khualzahawm niin, CYMA Vice President Prof. Lalnuntluanga chu uaptu a ni bawk.

 

Chief Minister chuan thu sawiin, Mizorama hnampual zirlai pawl pasarihten unau kan nihzia hriaa Joint Students’ Organisation an din chu lawm thu a sawi a. Inpawhna tha zawk awm theihna tura intawhkhawmna (Meet) buatsaih a nih chu lawmawm a ti a. Meet thupui, “Zofate kan ni, inen hrang thei kan ni lo”, chu a taka nunpui a pawimawh thu a sawi a ni.

 

Sawrkarin Minority-te a ngaihsak thu sawiin, minority-te sawmna chu a ngai pawimawh a, a rem chuan a tel zel thu a sawi a; kut hrang hrang- BSA huaihawt Tlanglut Kut kum kalta October ni 1-a Khawmawia neih te, Saipuma HSA buatsaih Sikpui Ruoi-ah te, Vathuampuia PZP buatsaih Naumariamlak Kut-ah te, zirlai pawl leh Thangram Indigenous Tribal Movement-te buatsaih Thangram Cultural Meet-ah te leh vawiina Joint Hnampual Meet-ah te a tel thei chu lawmawm a tih thu a sawi bawk a ni.

 

Chief Minister chuan Mizoram chu a chhunga chengte inngeih taka an chen theihna chhan pawimawh tak chu hel pawl awmlohna state a nih vang a ni, a ti a. Mizoram hi state ralmuang taka chantir ngei tumin Mizoram sawrkar chuan theihtawp a chhuah a, sawrkar hmalaknate a kal tluang a, kumin April ni 30 khan hnampual helpawl awm chhun HPC (D) Lalhmingthanga Sanate Faction-te chuan ralthuamte tungin, Mizoramah hnampual hel pawl awm tawh lovin, remna leh muanna chu a tak ramin a lo thlen thu a sawi a ni. Hel pawl awm lohna state kan nihna chu chhawm nung zel turin kalkhawmte chu a fuih bawk a ni.

 

Chief Minister chuan Zofate chu inpumkhata an awm a pawimawh thu a sawi a, mahni hnampual zia te, culture te, tawng te chhawmnung zel chungin inlungrual taka indaidanna leh inlakhranna awm lova chenho zir a tul thu a sawi bawk.

 

Hnam inpumkhatna turin ṭawng thuhmun hman tlan a pawimawhzia sawiin, Mizoramah hnampual tin ten mahni tawng ṭheuh humhalh chungin inpawh taka kan awmna turin tawng thuhmun (Common Language) hman theih a tul thu a sawi a. Mizo ṭawng tihhausak zelna kawngah pawh Hindi te, Sap tawng te la chhawng lovin, Mizo hnampualte tawng leh thumal zawk sengluh chhin a pawimawh tiin a sawi bawk.

 

Chief Minister chuan kalkhawmte chu hnam sulhnu (history) te chu ngai pawimawh a, a theih ang zela ngaihven leh zir turin a chah a, Mizoram hnampualten mahni hnam History mai bakah thu leh hla (literature)-te ngaihven thar a, internet lamah dah chhuak tam tur leh Sap ṭawnga letlinga pho chhuah uar zel turin a fuih bawk a ni.

 

State pakhatah emaw bial pakhata Majority emaw Minority nih hi thiam a pawimawh thu sawiin, lungawi taka awmho theih nan kan sira mite mitmei veng reng chunga kal kan zir a ngaih thu a sawi bawk.

 

Chief Minister chuan vawiina Zofate hi nimina mite chherchhuah an ni a, naktuka Zofa lo awm leh turte hi vawiina mite chherchhuah tur an nih thu sawiin, vawiina ram leh hnam enkawl mektute hian naktuk atan thangthar tha zawk kan chherchhuah a ngai tih hre rengin hmalam pana ke penin, hma kan sawn zel a pawimawh tih a sawi bawk a ni.

 

Khualzahawm Pu Lalmuanpuia Punte pawhin thu sawiin, Joint Hnampual meet chu ropui a tih thu a sawi a, hnam impumkhatna kawnga hmalakna pawimawh tak a ni, a ti a. Thalaite leh zirlaite chu hnam chanvo humhalhtu pawimawh tak leh hnam inlungrualna thleng tura mi pawimawhte an nih thu a sawi bawk.

 

CYMA Vice President Prof. Lalnuntluanga pawhin thu sawiin, kalkhawmte chu mahni hnam bil tia inla hrang lova, Mizo kan nihna vawng nung zel turin a fuih a. Mizo hnampual hrang hrangte fuan khawmtu pawimawh chu tawng thuhmun hman a nih thu sawiin, mahni hnampual tawng humhalh chunga tawng thuhmun hman a pawimawh thu a sawi a ni. Hnam hmasawnna turin Mizo hnampual hrang hrang te mahni mawhphurna theuh hlen turin kalkhawmte chu a chah bawk a ni.

 

Inkhawm hi JHSO Senior Vice Chairman, Pu Jairas Ranglong chuan a kaihruai a, JHSO General Secretary Pu Vanlalfakhlua chuan report pein, JHSO Chairman Pu Stephan Rutland chuan thu a sawi bawk. JHSO Treasurer Pu Ziakthangpuia chuan lawmthu sawiin inkhawm hi a khar a ni.

 

Joint Hnampual Meet buatsaihtu JHSO hi Hnampual zirlai pawl hrang hrang- Mizoram Bawm Students Union, Ranglong Student Union, Hmar Student Association, Pang Zirlai Pawl, Siamsinpawlpi, Lai Student Association leh Mara Student Organisation inzawmkhawm niin, meet hi hun thuma thenin, vawin nilenga hun hman tura buatsaih a ni.