ADHOC SCHOOL-TEN, SORKAR TIH CHHUAH- ‘THE MIZORAM EDUCATION (LUMPSUM GRANTS-IN-AID FOR GENERAL MAINTENANCE OF PRIVATE SCHOOL) RULES, 2026’ HAL

ADHOC SCHOOL-TEN, SORKAR TIH CHHUAH- ‘THE MIZORAM EDUCATION (LUMPSUM GRANTS-IN-AID FOR GENERAL MAINTENANCE OF PRIVATE SCHOOL) RULES, 2026’ HAL

><}}> Dr. John, 24.07.26

Mizoram Govt. Adhoc-Aided High School Teachers’ Association (MIGAHTA) chuan Provincialised phutin Sorkar an nawr mek a, ni 2 chhung badge dum bela hna an thawh hnuah, nimin atangin Adhoc High School 80 chuangah ‘No Teaching Day’ an hmang leh a, hei hi Vawiinah chhunzawm leh an tum a ni.

MIGAHTA chuan, Provincialised phuta Sorkar an nawr mek laiin, School dinhmun hniam zawka dahna The Mizoram Education (Lumpsum Grants-in-Aid for General Maintenance of Private School) Rules, 2026 chu Sorkarin Thawhlehni khan a tihchhuah hnan avangin vawiinah he Rules thar hi Mizoram hmun hrang hranga Adhoc High School 80 chuangah an hal tih an sawi a. Adhoc High School-te chu kum 30 kaltaa khawtlangin Sorkar school an neih beiseia harsatna tam tak kara an din a ni hlawm a. Kum 2003-ah Lump-sum-grant-in-Aid dinhmuna dah niin, kum 2008-ah Adhoc-grant-in-aid ah dah an ni leh  a. Adoc status-ah pawh kum 18 zet an awm hnuah; dinhmun hniam zawka Sorkarin dah a tumna Rules chu an pawm thei ngai dawn lova, a tawp thlengin an dodal dawn tih an sawi.

He Rules tharah hian zirtirtu thawk laite chu dinhmun tha zawkah dahin, Sorkar hnathawk nghet ang chiaha hlawh pek an ni dawn a, a thawk laite chu an dinhmun a tha dawn hle a. Amaherawhchu, khawtlangin harsa taka a din school-te chu Sorkar school ni thei tawh ngai lo tura indan pinna leh khawpuia zirna tha zawk pan ve thei lo thingtlang naupangten tunlai thiamna hrang hrang hmanga thuam Sorkar school-in a neih angte an chhawr pha ve lo tur chu a pawi an tihpui tak zet a. Tuna thawk mekte an chawlh hunah an aiawh tur zirtirtute hlawh tlemte hmanga lak an ni tawh tur chu zirtirtu dinhmun dahhniamnaah an ngai a, thalai lehkhathiam, hna zawng mekte beidawnna siamtu a ni tur chu an duh lova, an dodal zel dawn tih an sawi bawk.