SONAM WANGCHUK-IN CHAWNGHEI TITAWP

 SONAM WANGCHUK-IN CHAWNGHEI TITAWP

><}}> Dr. John, 24.07.26

Nimin July 23, 2026 (Thursday) khan, Union Minister pa 2- Pu JP. Nadda leh Dr. Jitendra Singh leh the Senior leaders of Apex Body of Leh Ladakh ten Pu Sonam Wangchuk chu a awmna Medanta Hospital-ah an tlawh a. Sorkar laka a thilphutte tihhlawhtlinsak an tum thu an tiam avangin, Pu Sonam Wangchuk hian Chawngheia Sorkar a nawrna chu a tih tawp nghal tur thu Union Minister-te hi a lo hrilh a ni. Pu Sonam Wangchuk nupui Gitanjali Angmo pawh a bulah hian a awm ve a ni.

Pu Sonam Wangchuk chuan, he thu hi X-ah a post nghal a. Sorkar-in a thil phut-te tihhlawhtlinsak an tiam avangin Chawngheia Sorkar a nawrna (indefinite hunger strike) chu a tihtawp nghal thu a sawi a ni.

Pu Sonam Wangchuk hian, a  sawi ang khian, Ningani zan atangin, Union Minister pa 2- Health and Family Welfare Minister J.P. Nadda leh Union Minister of State (Independent Charge) Dr. Jitendra Singh te awm lai lala hian a chawnghei chu a titawp nghal a ni.

Union Minister J.P. Nadda chuan, Sorkar-in a thilphutte tihhlawhtlinsak a tiamna Ziaka a rawn ken chu a chhiarchhuak a. Peaceful protest-a Zirlai man te leh case an  siamsak te chu, an chungchangah eng case mah file a nih loh tur thu te, Examination reforms chungchang pawh Parliament-ah uluk taka sawiho a nih tur thu te, Paper leak-in a nghawng  chhungkaw tam tak te chu a tuldan ang zela zangnadawmna pawh pek an nih tur thu te, a tel a ni.

Hetia Sorkar-in chawngheia a thilphutte tihhlawhtlinsak a tiam tak avangin, Pu Sonam Wangchuk chuan, Sorkar-in Zirlai te leh India ram hmakhua ngaia an tana thiltha tih a tum chungchangah lawmthu sawiin, India ram hmun hrang hranga Zirlai leh amah thlawptu zawng zawngte chu, remna & muanna hmachhuan zel chunga, tharum tellova, an duhzawngte leh an thil phutte chu awmze neia sawihona leh inbiakna kaltlanga chingfel zel turin a duhsakin a ngen nghal bawk a ni.

 CJP founder Abhijeet Dipke pawhin, “Ni 26 chhung zet mai chawngheia Sorkar a nawrna a titawp ta hi, Pu Sonam hi kan lawmpui tak zet zet a. Sir, mahni inhalralna leh huaisenna chungchuang kaltlang a, rilru fim tak pu-a ram tana i nunna i thap ngam hi, kan ram tan hian a hlu chungchuang a ni. The Cochroach Janta Party erawhchuan, Education Minister Dharmendra Pradhan hi a in resign hma chu, Jantar Mantar-ah hian Peaceful protest hi kan la kalpui zel rih dawn a ni” tiin, X ah, lawmpuina leh a chhuan thu leh an Party kal zel dan tur a post a ni. Pu Sonam Wangchuk hian ni 26 chhung chaw a lo nghei hman tawh a. Amah pawh a taksa a chau hman tawh viau nghe nghe a ni.

 Prime Minister Narendra Modi pawhin, hetia Pu Sonam Wangchuk-in a Chawnghei a tihtawp tak avang hian, nizan zanlaiah khan Message thawnin, lawmthu a hrilh hnuah, “Lo inenkawl tha la, Doctor te thurawn ang zelin awm la, lo chak tha thuai ang che aw..” tiin duhsakna a hlan ve bawk a ni.

 Pu Sonam Wangchuk hian, Sorkar-a a thilphut vanga a chawnghei titawp tura an ngenna hi a chhang hma lutuk deuh em aw? ka lo ti ve thung a ni. Pu Abhijeet Dipke rilru ang khian, chiang fek-fawk law law-in, Dharmendra Pradhan hi a in resign hma chu chaw hi ngheiin tawn tlang law law rih sela, tih chu keima mimal duhthusam a ni. BJP Sorkar hi fing verther tak mai a ni a. Hun a han kal deuh ang a, Pu Sonam Wangchuk hnena an tiam ang hian thil an tihhlawlhtlin ka ring thei tlat lo nia! Engpawhnise, a nih tur ang a ni zo tawh a, ilo thlir phawt mai ang…