COUNCIL OF CHURCHES IN MIZORAM-IN FCRA AMENDMENT BILL 2026 DUHLOHNA ‘KAWNG ZAWH’ HUAIHAWT DAWN

 COUNCIL OF CHURCHES IN MIZORAM-IN FCRA AMENDMENT BILL 2026 DUHLOHNA ‘KAWNG ZAWH’ HUAIHAWT DAWN

><}}> Dr. John, 31.07.26

Council of Churches in Mizoram (CCM) hruaitute chuan, FCRA Amendment Bill 2026 Parliament Monsoon Session-a ngaihtuah tura chhawp tum a nih avangin hemi duh lohna lantir nan August 11, 2026 khian Aizawl-ah kawngzawh huaihawt an tum.

 

Mizoram Sorkar-in FCRA Amendment Bill 2026-a hma a lak dan chungchangah CCM hruaitute chuan an duhkhawp loh thu an sawi a. Sorkar chuan tawrhna tur a neih ve lem loh avangin an ngaihven tawk lo pawh a ni thei a, anni erawhchu a tuartu an nih dawn/theih avangin a tawp thlengin he bill hi hman a nih lohna turin dodal an tum thu an sawi a ni.

 

Kawngzawh an huaihawt tum hi an ruahmanna ang chuan, hmun 2 atanga zawh tur a ni a, zing dar 10:30 atangin Zarkawt leh Sikulpuikawn atanga zawh tan tum a ni a, Vanapa Hall kawtah intawhkhawm a, programme hman an tum a, hemi atan hian CCM member chauh ni lo, Kohhran hrang hrang leh NGO te pawh sawm an tum thu an sawi a. He bill duh lo zawng zawng-te pawh zawm ve turin an ngen bawk a ni.

 

CCM hruaitute chuan, he dan hi a tlangpui en thuak chuan tha ve fu angin a ngaih theih a. Mahse, chik zawka han zir a, India rama hnam hnufual (minority) te chunga thil thleng tawh leh thleng mek nen-a en chuan, Thuneihna hmangtu tana hman sual theih thil a awm dawn niin a lang, an ti.

 

Ram dang (foreign) atanga tanpuina lo kal FCRA hmanga lo dawn-te hi sakhaw danga inlehtir nan (proselytization)-a hman phal loh a ni dawn a, he dan kengkawhtu-in hetianga ti nia an man emaw an hmu emaw a nih chuan FCRA license cancel sak a, an bungrua leh thil neih te pawh chhuhsak vek theih a ni dawn a. Chuvangin, Sakhaw danga inlehtir tih chhuanlama hmangin, India ram hmun hrang hranga Kristianten tihduhda leh man nasa zawkin an tawk thei a, an lo tawk tawh thin a ni, tiin an sawi.

 

CCM hruaitute chuan, tuna FCRA Amendment Bill 2026 hi hman a nih chuan license tih tawp chauh ni lo, Foreign sum hmanga in emaw, ram emaw, bungrua emaw an lo neih tawh te pawh kha, chhuhsak an ni ang a, an chan vek thei dawn a, hei hi a pawi lai ber chu a ni, an ti.

 

Tin, he dan tharin Thuneitu thar awm tura a ruat, Designated Authority a vuah hian, thu a nei lian hle dawn bawk a. Court phalna emaw hriatpuina emaw pawh ngai lo leh tel miah lo pawhin, he Thuneitu hian, Kohhran emaw, NGO emaw te bungrua leh hmunhma neih te chu a chhuhsak thei ang a, tihral emaw, hralh emaw, theihna thlenga thuneihna a nei dawn a, hei hi a him lovaa, dan kalphung pangngai bawhchhiatna a ni bawk a, chuvangin kan duh lova, nasa taka do a ngai a ni, an ti bawk.

 

CCM hruaitute chuan, tunah hian Mizoram-ah FCRA license nei hi 19 an awm mek a. Presbyterian leh Baptist chauh kohhran hming anga nei an nih thu an sawi. India ram pumah FCRA license nei atangin Kristian Pawl hi 12% chauh an nih laiin, an Fund dawn belhkhawm zat erawhchu 55-60% a nih thu an sawi bawk a ni. Hei hian, Kristian Pawl-te a nghawng nat dan tur chu a ngaihruat theih viau niin an sawi bawk.

MIGAHTA-TEN LUNGAWI LOHNA LANTIR TITAWP LAILAWK, SORKAR HMALAKNA NGAICHANG RIH DAWN

 MIGAHTA-TEN LUNGAWI LOHNA LANTIR TITAWP LAILAWK, SORKAR HMALAKNA NGAICHANG RIH DAWN

><}}> Dr. John, 31.07.26

Mizoram Govt. Adhoc Aided High School Teachers' Association (MIGAHTA) ten ni 8 chhung lungawi lohna an lantir hnu-ah an titawp lailawk.

 

MIGAHTA chuan thuchhuah siamin, Nimin July 30 chhun dar 1:30 ah khan, Protest programme chu an titawp lailawk a, ZPM PAC meeting thutlukna leh Department hmalakna an ngaihchan rih tur thu sawiin, August 3, 2026 atangin member-te chu mahni School theuh-ah an hna chhunzawm leh turin an hriattir a ni.

 

July 29 khan MZP palaina hnuaiah, Pu Lalmuanpuia Punte, ZPM Vice President nen an inbia a, an lungawilohna leh an thilphut-te an sawi a, Pu Lalmuanpuia, Adviser to Chief Minister (Political) chuan Sorkar lam atanga an ruahmanna-te a lo sawipui bawk a ni.

 

MIGAHTA chuan Resolution pa 4 an pass a, chung te chu:

1). Sorkar nena kan inbiakna-ah, Sorkar laka kan lungawilohna leh kan thilphut-te chiang takin kan sawi a, heng kan lungawilohna leh kan thilphut-te hi awm min tih puiin, ZPM PAC Meeting-ah a hma thei ang bera an sawiho tur leh chu an thutlukna chu concerned department-ah thlen min tiam ang ngeiin PAC Meeting thutlukna leh Department hmalakna hi kan lo ngaichang reng dawn a ni.

2). MIGAHTA leh Sorkar aiawhte inbiak leh hmaa ‘The Mizoram Education (Lumpsum Grants-in-Aid for General Maintenance of Private School) Rules, 2026’ tihchhuah thar chu, Adhoc High School, Provincialised ve loh te Special Category-I -a dah kan nihna Notofication chhuah lo tura kan ngenna chu bawhzui min tiam angin, Sorkar-in Notification a tihchhuah loh kan beisei a. Kan inbiakna palzut-a Notification hi a chhuah a nih chuan, a chhuah tuk atangin nasa zawkin lungawi lohna kan lantir leh ang.

3). MIGAHTA chuan, tuna kan dinhmun aia hniama Sorkar-in min dah a tumna ‘The Mizoram Education (Lumpsum Grants-in-Aid for General Maintenance of Private School Rules, 2026’ hi kan pawm thei ngai dawn lova, High School tan Special Category-I Notification tichhuak lo turin thuneitute kan ngen bawk a ni.

4), Kan lungawilohna leh thilphutte min hriatthiam pui a, min tihhlawhtlin sak turin Sorkar kan ngen tak meuh meuh a. Ka duhna-te a taka chantir a nih theih nan Sorkar hmalakna kan thlir reng dawn a ni.

 

Tarlan tawh angin, MIGAHTA te hian, July 21 leh 22 ah khan Badge dum belin campaign an lo hmang tawh a, July 23 leh 24 ah te khan No Teaching Day an lo kalpui tawh bawk a. July 27 leh 28 ah te khan, Mass Casual Leave an la a, July 29 leh 30 ah Peaceful Sit-in Demonstration an nei a ni.

MIZOTAXI-AH LIRTHEI 1,260 INZIAK LUT TAWH A. HIGH COURT-A KAL TURIN LIRTHEIA EIZAWNG PAWL PA 3-TE INBUATSAIH ZEL

 MIZOTAXI-AH LIRTHEI 1,260 INZIAK LUT TAWH A. HIGH COURT-A KAL TURIN LIRTHEIA EIZAWNG PAWL PA 3-TE INBUATSAIH ZEL

><}}> Dr. John, 31.07.26

Online application hmanga Taxi leh Auto-rickshaw koh theina tura duan, Mizotaxi mobile application hmang turin lirthei 1,260 an inziak lut tawh a. Hetihlai hian application hi Mizoram Taxi Association (MTA), Aizawl Two Wheeler Taxi Association (ATTA) leh Aizawl District Auto Rickshaw Owner Association (ADAROA) te chuan High Court-a khin tumin hmalakna an kalpui zel thung.

 

Transport Department thawktute chuan, Mizotaxi mobile application hmang turin Zirtawpni thleng khan 2 Wheeler Taxi 889, 4 Wheeler Taxi 352 leh Auto-rickshaw 19 an inziak lut tawh a, document fel loh vanga hnawl 135 an awm bawk.

 

Inziak lut an awm mek lai hian, ATTA hruaitute chuan, Mizotaxi mobile application chu lirtheia eizawng pawl pa 3-ten an dodal chhunzawm zel, tih an sawi a. Thudawn danin, MTA, ATTA leh ADAROA chuan application chu High Court-a khin tumin hmalakna an kalpui chhunzawm zel a, tunah hian document pawimawh RTI hmangin an dil mek a, chhanna an hmuh hunah Court-a luhpui theih tawh an inring a ni. 

 

Aizawl-ah hian MizoTaxi App hi July 1, 2026 atang khan hman tan a ni a. A tira dilna hun hawn hun chhung chu tawp tawh mah se July 31, 2026 thleng inziah luh hun hi hawn belh leh a ni a. Transport Department-a thawktute chuan inziah luh tum an awm ve reng thu an sawi.

 

Sorkar duh dan angin application hi Aizawl-ah bul tan phawt a ni a, a tahtawlin District dangah pawh kalpui chhoh zel tum a ni.

Mizotaxi hnuaia in-register-te tana Registration Fee office order lo chhuah tawh chu Thuneitute remtihna-in Motor pa 1-ah Rs. 500/- ah siam rem a ni a. He Registration Fee hi a motor service hun chhung atan a ni ang a, a bak pek leh a ngai tawh lo tura ruahman a ni.

 

State Transport Authority (STA) chuan thuchhuah siamin Mizotaxi-ah hun tiam chhunga mipui mamawh khawp lirthei in-register an awm loh chuan a tul angin Mizotaxi hnuaia tlan tur permit pek belh a nih tur thu an lo tar lang tawh a ni.

 

Pawl pa 3-ten Mizotaxi App an hman duh loh chhan zingah hian, Rate ennawn hmasak an duh thu te, Registration Fee awm lo se, tih te leh App hmangtu Mipuiten chhiah 6% (zaa paruk) an chawi tur te hi tel lo se, an tih thu an sawi a, Sorkar hnenah pawh an thlen tawh, thu an sawi bawk.

*SORKAR-IN PRO FIGHT TITLE SPONSOR DAWN*

 *SORKAR-IN PRO FIGHT TITLE SPONSOR DAWN*

><}}> Dr. John, 31.07.26

LPS Pro Fight Management Committee leh Sorkar an indawr hnu-in, a vawi khat nan Labour, Employment, Skill Development and Entrepreneurship Department (LESDE)-in LPS Pro Fight title sponsorship an chang dawn.

 

LESDE chuan an hnuaia awm Mizoram Building and Other Construction Workers' Welfare Board (MBOCWWB) hmangin an sponsor dawn a. Mizoram infiamna huanga Television live show hmasa Pro Fight chu an hma lakna hrang hrang mipui hmuha pho chhuahna leh zirtirna zau zawk pek theihna remchang a nih ngei an beisei .

LESDE minister Lalnghinglova Hmar chuan, Pro Fight chu Mizorama ngaihhlut leh mipui ngaihven a ni a, hei hi ṭangkaiah hman an tum tih a sawi a, Sorkar hnuaia Department-in a hre tur leh a chhawr turte hnenah hma an lakna hrilh hriat a ba a, hriattir an nih hnua mipuiin an ngaihven lo a nih chuan department mawhphurhna a ni tawh lo ang, a ti.

LPS Pro Fight vawi 11 neih tawhah ṭum khat chiah Sorkar hnuaia department-in Title sponsor an la chang a. Kum 2010 khan, Ayush hmingchawia kalpui a ni. LESDE hi Sorkar department zinga title Sponsor ni thei pa 2-na leh kum 16 chhunga Sponsor-tu zinga lian ber ni leh hmasa ber an ni.

 

Championship hmasa ber Kum 2009 leh 2014-ah khan, Title Sponsor awm lova buatsaih a ni a. Kum 2011-ah Adhunik MSP Cement, Kum 2015-ah Samsung 3:16, Kum 2017-ah Gionee, Kum 2024-ah Zudio; Kum 2016, 2019, 2022 leh 2023-ah te khan Zothan Autoworks-in vawi 4 Title Sponsor an chang a ni.

 

LPS Pro Fight ṭum 12-naah hian, kum 17 aṭanga 40 inkar a duh apiangte tan Mizoram chhung leh pawn aṭangin a tel theih a. August 2026 chhungin LPS Office, Zarkawt leh Dozoma Tarmit Dawr, Zodin Square aṭangin tel tum tan Entry Form la chhuakin, August thla chhung hian theh luh tur a ni.

 

Weight hrang pa 5- Fly (kg 48-52), Bantam (kg 52-56), Light (kg 56-61), Welter (kg 61-67) leh Middle (kg 67-74)-ah Title an inchuh leh dawn a. Lawmman pawisa fai sem chhuah tur Rs 6,50,000 ruahman a nih bakah, Best Boxer, Promising Boxer, Best Challenger, Best Referee leh Best Judge chawimawina te sem tel a ni bawk ang.

PAHOSS SCHEME HMANG DIK LO TE PAWISA THING LET DAWN

 PAHOSS SCHEME HMANG DIK LO TE PAWISA THING LET DAWN

><}}> Dr. John, 31.07.26

Gauhati High Court, Aizawl Bench chuan PAHOSS Scheme hnuaia pawisa dawngtute zingah, a hmanna tur dik taka hmang lote hnen aṭanga pawisa laklet dan tur kaihhruaina siam turin July ni 29, 2026 (Nilaini) khan sorkar a hriattir.

 

He kaihhruaina siam hun chhung atan hian kar thum (3) hun a pe. Hei bakah hian, PAHOSS Scheme hnuaia pawisa dawngtute chuan an building chu vantlang parking atan an hmang ngei em tih endikna report thehlut turin kar thum (3) hun pek an ni bawk.

 

He thubuai hi Division Bench Justice Michael Zothankhuma leh Justice Budi Habung ten an ngaihtuah a. Court chuan he report an thehluh hunah Sorkar chu PAHOSS Scheme hmang dik lote chunga an hmalakna te sawifiah turin a ti a. Sorkar chu PAHOSS Scheme dawngtute nena an 'original contract agreement' pawh Court-a keng turin a hriattir bawk a ni.

 

High Court hnenah hian Aizawl khaw chhunga AMC enkawl parking area zingah traffic chet dan ti khaihlak a, titawt thei a awm nual tih hriattir a ni a. High Court chuan hemi chungchang hi AMC leh Traffic Police-te enfiah turin a ti a, SP Traffic leh AMC Commissioner-te chu Aizawl khaw chhunga parking area ṭhenkhat te chu tihtawp a ngaih leh ngaihloh lo endik a, report pe turin a ti bawk.

 

He thubuai hi August ni 5, 2026-ah ngaihtuah leh a ni dawn tih he Supreme Court-a Advocate on Record hna chelh mek, JC Lalnunsanga chuan a mimal website www.jclalnunsanga.in -ah a tarlang. He thubuai hi Construction Building in Chanmari, Chaltlang Road vs. SOM & 14 ors. PIL(Suo Moto) 1 of 2022 a ni) a nih thu a tarlang bawk a ni.

MIGAHTA-TE LUNGAWI LOHNA KAL ZEL-AH EDUCATION MINISTER DR. VANLALTHLANA CHU MZP OFFICE-AH A LENGLUT

 MIGAHTA-TE LUNGAWI LOHNA KAL ZEL-AH EDUCATION MINISTER DR. VANLALTHLANA CHU MZP OFFICE-AH A LENGLUT

><}}> Dr. John, 30.07.26

Mizoram Government Adhoc Aided High School Teachers' Association (MIGAHTA) te nawrhna chu zirlaite hmakhua hriltu leh zirlaite khawih thil a nih avangin MZP chuan palai hna a thawk a, vawiin khan Education Minister Dr Vanlalthlana pawh MZP Pisa Pui-ah a leng a, MIGAHTA te thil ngiat leh an nawrhna chungchang te an sawiho.

 

Mizo Zirlai Pawl (MZP) chuan Mizoram Government Adhoc Aided High School Teachers' Association (MIGAHTA) tena an School provincialised tura an nawrhna chu zirlaite zirna-ah nghawng thalo a neih theih avangin a ngai thutak hle an ti a. MIGAHTA leh Sawrkar lam te an inbiak fel vat theih an beisei a, zirlaite zirna-in a tawrh loh na turin Palai hna thawkin a theih ang angin hma lak chhunzawm zel an tum.

 

Nimin chawhnu khan hemi chungchangah tho hian Adviser to CM (Political) Lalmuanpuia Punte, MLA hovin Mizoram Government Adhoc Aided High School Teachers' Association leh MZP te chuan MIGAHTA te harsatna tawh leh an thil phut te sawihona an nei bawk.

MIGAHTA-IN SORKAR ATANGA THU LAWMAWM AN DAWN LOH CHUAN NA ZAWKIN KAL DAWN

 MIGAHTA-IN SORKAR ATANGA THU LAWMAWM AN DAWN LOH CHUAN NA ZAWKIN KAL DAWN

><}}> Dr. John, 30.07.26

Mizoram Govt. Adhoc-Aided High School Teacher's Association (MIGAHTA) chuan nimin khan Vanapa Hall kawtah Peaceful Sit-in Demonstration an nei.

Mizorama Adhoc High School 90 chuanga zirtirtute hian sawrkarin provincialise an nih tawhna sutna order a tihchhuah leh, tun hnaia school thenkhat provincialise-na order a siam leh Lumpsum Grant-in-Aid  a dah thlak tumna Rule te an hal a ni.

 

MIGAHTA President F. Vanlalchhuanga chuan Rules thar chu zirtirtute tan hlawh leh thil dangah hamthatna tha zawk awm mah se school dinhmun hniam zawkah a awm dawn a, sawrkar hian rules thar hi hnuk kir leh se kan duh a ni a ti.

Peaceful Sit-in Demonstration hi Zirtawpni thleng kalpui an tum a. Sawrkar lam atanga chhanna lawmawm an dawn loh chuan protest hi nasa zawkin an kalpui zel dawn tih an sawi bawk.

 

Tarlan tawh angin MIGAHTA te hian July 21 leh 22 ah khan badge dum campaign an hmang tawh a, July 23 leh 24 ah No Teaching Day an kalpui bawk a. July 27 leh 28 ah Mass Casual Leave an la a, school tam tak zirna a khaihlak a ni.

LARSAP-IN MIZORAM STATE HUMAN RIGHTS COMMISSION HMASA BER CHAIRPERSON LEH MEMBER-TE RINAWMNA THU TIAM TIRIN LALUT

 LARSAP-IN MIZORAM STATE HUMAN RIGHTS COMMISSION HMASA BER CHAIRPERSON LEH MEMBER-TE RINAWMNA THU TIAM TIRIN LALUT

><}}> Dr. John, 30.07.26

Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Mizoram State Human Rights Commission (SHRC) hmasa ber Chairperson atan Justice Marli Vankung, Former Judge, Gauhati High Court, Member atan Pu Vanlalenmawia, MJS (Rtd.) leh Pu K. Lal Nghinglova, IAS (Rtd.) te chu Durbar Hall, Lok Bhavan, Aizawlah rinawmna thu tiam tirin a la lut.

 

Lakluhna inkhawmah hian Chief Secretary Pu Khilli Ram Meena chuan Larsap-in Mizoram State Human Rights Commission Chairperson leh Member-te a ruatna notification a chhiar chhuak hmasa a. Hemi hnu hian Larsap General (Dr) Vijay Kumar Singh chuan Justice Marli Vankung, Pu Vanlalenmawia leh Pu K. Lal Nghinglova te chu rinawmna thutiam chham tirin a lalut a ni.

 

Mizoram State Human Rights Commission hmasa ber Chairperson leh Member-te lakluhna inkhawmah hian Chief Minister Pu Lalduhoma, Speaker Pu Lalbiakzama, PWD Minister Pu Vanlalhlana, EF&CC Minister Pu Lalthansanga, Opposition Leader Pu Lalchhandama Ralte, P&E Minister Pu F. Rodingliana, IPRP&S Minister Pu B. Lalchhanzova leh sawm bik mi pawimawh dangte an tel a ni.

 

Justice Marli Vankung March ni 4, 1964 ah piangin thiamna lamah B.A. (English Hons.), LL.B. leh M. Phil (International Legal Studies) nei niin, kum 1989 khan Mizoram Judicial Service (MJS) a zawm a. Mizoram sawkarah post pawimawh tak takte a chelh hnuin October ni 13, 2021 khan Additional Judge, Gauhati High Court-ah hlankai niin, August ni 1, 2023 khan permanent judge atan ruat a ni a. March ni 3, 2026 khan superannuation pension-in a chhuak a. Tunah hian Republic Veng, Aizawlah a pasal fanaute nen an cheng mek a ni.

 

Pu Vanlalenmawia hi April ni 1, 1966 ah piangin thiamna lamah B.A., LLB degree nei a ni a. Kum 2011 khan Mizoram Judicial Service (MJS) zawmin Mizoram sawkarah post pawimawh tak tak a chelh hnuin March ni 31, 2026 khan Presiding Officer, Motor Accident Claims Tribunal, Aizawl, post a chelh laiin superannuation pension-in a chhuak a. Tunah hian a nupui fanaute nen Tuithiang, Aizawlah an cheng mek a ni.

 

Pu K. Lal Nghinglova hi December ni 1, 1956 ah piangin thiamna lamah BA (Hons) a ni a. Kum 1983 khan District Information & Public Relations Officer hna zawmin Mizoram sawkar hnuaiah hna pawimawh tak tak a thawk a. Hemi hnu hian Indian Administrative Service (IAS) zawmin AGMUT Cadre 1996 pek a ni a. Mizoram leh Delhi sawkar hnuaia post pawimawh tak tak a chelh hnuin Principal Secretary to the Government of Mizoram niin November ni 30, 2016 khan superannuation pension-in a chhuak a. Tunah hian a nupui fanaute nen Ainawn veng, Aizawlah an cheng mek a ni.

HAWNG 440 KHA KAN LA HRIA EM???

 HAWNG 440 KHA KAN LA HRIA EM???

><}}> Dr. John, 29.07.26

1. HAWNG 440 NEITU-A PUH HENRY-A BAIL-IN A CHHUAK EMNI?

Nikum March 13, 2025-a Champhai District Hruaikawn kawnga Zokhawthar Police te'n Heroin hawng 440 an man a, a neitu ber nia puh, Henry Lalbiakzinga Chhundeng thubuai chu ala kal mek zel a, Henry-a hian Pu Liansangzuala, Special Judge ND&PS Act, Champhai Judicial District hnenah, November 17, 2025 khan bail a dil a, a dilna hi Special Court, ND&PS Act. Champhai Judicial District chuan a ngaihtuah a.

 Henry-a Ukil te hian Henry-a kut atangin dan phalloh thil engmah an man loh thute, a hriselna a that loh thu te, man a nih laiin BNSS Section 47 leh 48 in a phut anga man a nih chhan hrilhhriat a nih loh thu bakah a chhungte leh a laina hnaite pawh hrilh an nih loh thu te hmangin Bail an dilsak a ni.

 Hetihlai hian Sorkar Ukil te thung chuan, Henry-a hi he thubuai ah hian a inhnamhnawih ngei nia a lan thu leh amah an mannaah dan bawhchhiatna a awm loh thu an sawi ve thung a, Henry-a hi thiam loh chang thei dinhmuna ding a nih avangin thubuai ngaihtuah a nih laia lo chhuah lailawk chu a rem loh thu an tarlang ve bawk.

 Special Court, ND&PS Act. Champhai Judicial District chuan, Sorkar Ukil te thusawi chu pawmpuiin, Henry-a hi thubuai ngaihtuah a nih lai chuan Jail-a la awm rih turin thutlukna a siam a, “ND&PS Act. Section 35 leh 45 hnuaiah Henry-a hian hre reng chunga dan phal loh ti anga ngaih tur a ni,” tiin bail a dilna hi a hnawlsak ta a ni.

 2. HENRY-A MAN LEH CASE AN SIAMSAK DAN…

March 15, 2025 khan Mizoram Police te chuan heroin hawng 440 kaihhnawihah hian, Ngaizel, Aizawl-a First Cry dawr neitupa Henry Lalbiakzinga Chhundeng (34) s/o R. Malsawma, Dinthar, Aizawl leh a thawhpui Laltluangzela (28) s/o Lalrosanga, Zokhawthar pawh Aizawlah man an ni bawk. Mizoram Police te'n heroin an man hawng 440 hi Tualchhung rate chuan Rs.1,41,66,000/- ma hu niin, International rate-ah phei chuan, Rs. 2,200 lakhs man hu daih nia chhut a nih thu, Mizoram police thuchhuah chuan a tarlang.

 Mizoram Police te hian, he Heroin hawng 440 an man hi, Zokhawthar P/S No. 36/25 dated 14/3/25 u/s 21(c) /25/29 ND&PS Act 1985 hmangin case an ziak lut a ni.

 Kan hriat tawh angin, Henry hi Sumdawng hlawhtling tak niin, Aizawl-a First Cry dawr neitu a ni a, Star Cement Platinum Winner (2022) pawh lo ni tawh leh Mizo zinga he Award dawng hmasa bertu hi a ni nghe nghe a ni.

 He case ah hian Henry atan hian Advocate Lalchhuansanga Sailo a ding a, Sorkar tan hian Special PP Vanlalhumi a ding thung a ni.

 3. HENRY LEH A THURUALPUITE AN MAN DAN KHA…

March 13, 2025 zan khan, Zokhawthar PS team New Hruaikawn Road-a Mobile Patrolling te chuan Bike pa 3 leh Champhai Taxi pakhat, MZ04B 0344 New Hruaikawn atanga Champhai pan mek te chu tidingin thu an zawt a. Hetia thil an zawh lai hian Taxi leh Bike pa 3 te hi thawklehkhatah chak takin Champhai lam panin an tlanchhe ta mai a. Police te hian um nghalin Taxi, Chhuansawmlala (18) s/o Paumuanthanga, Khuangphah khalh leh a mi phurh Vanlalhriata (21) s/o Lalpekruala, Zokhawthar, Taitesena Section te chu nangchingin man (apprehended) nghal an ni. Bike pa 3-a chuang, puitling pali leh kum tling lo pakhat te pawh a hnuah man an ni bawk.

 Thu zawhfiahna atangin heng mite hian inthurualin a huhovin dan kalhin ruihhlo an tawlh ngei tih an inpuang a. Satha ip hring leh thawmhnaw ip dum chhungah heng ruihhlo hi dahin Taxi-ah hian an hlang ngei a, mahse Police duty an hmuh hnuah kawng thlangah an thehthlak thu an sawi. An inpuanna bawhzui hian March 14, 2025, 6:30 AM khan anmahni hruaiin an ruihhlo paih thlak hi zawn a ni a, Police duty-na hmun atanga 1.5 Km velah Heroin hawng 440 (Kg 4.722 a rit), tualchhung rate-a Rs.1,41,66,000/- man hu chu man a ni ta a ni.

 He thila inhnamhnawih mi pa 6 – 1). Chhuansawmlala(18) S/o Paumuanthanga, Khuangphah, Champhai Dist, 2). Vanlalhriata(21) S/o Lalpekruala, Zokhawthar, Taitesena Section, 3). Zothansanga (20) S/o Lalpekliana, Zokhawthar, Taitesena Section, 4). Lallianmawia (19) S/o Lalhmangaihthanga, Zokhawthar Khuangchera Section, 5). Lalmalsawma (21) S/o Chhunglawma, Zokhawthar, Neuva Section leh 6). Zomuansanga (18) S/o Rohlira, Bethel Veng, Champhai te chu dan angin man nghal an ni a, kum tling lo pakhat erawh JJB Champhai hnenah hlan a ni.

 4. DINTHAR KHAWTLANG LUNGAWI LO…

Khatia Henry Lalbiakzinga Chhundeng chu, Heroin hawng 440 kaihhnawiha man a nih tak avangin, April 9, 2026 zan khan, Henry-a kaihhnawih Ruihhlo avanga vengchhung mualpho an duh loh avangin, Dinthar khawtlang mipui thinrim pungkhawm te chuan, Heroin hawng 440 kaihhnawiha man Henry-a te in kawtah an pungkhawm a. Vengchhung chhuahsan turin an au rual a. Khawtlang mipui lungawi lohna lantira pungkhawm te hian, Henry-a te lirthei leh bungrua engmaw zat an tihchhiatsak bawk a ni. April 2025 khan Dinthar Branch YMA chuan Henry Lalbiakzinga Chhundeng chu an ensan thu a, YMA member an nihna an hlihsak thu leh Chhiatni fund-te pawh an pekkir thu an puang bawk a ni.

 Dinthar Veng khawtlang hruaitute sawi danin, “April 11, 2025  khan Heroin hawng 440 kaihhnawiha man Henry Lalbiakzinga Chhundeng, Dinthar Veng, Aizawl chhungte chuan an in an chhuah san tawh” niin an sawi bawk.

 5. CENTRAL YMA-IN HENRY LEH A THURUALPUITE SUMDAWN DAN AN HUAT THU AN PUANG

Central YMA chuan, April 9, 2026 khan Thuchhuah siamin, Henry Lalbiakzinga Chhundeng, Dinthar, Aizawl leh a thurualpuite'n ruihhlo hmanga sumdawnna an kalpui chu an huat tak zet thu an tarlang a; an phû tâwka hrem ngei an phût.

CYMA chuan, "Kan Thalai tam tak ruihhlo bâwih-a an tàn mek lai leh nunna hial an chàn tawh laia, ruihhlo hmanga sumdawnna kalpui a ni hi kan haw tak zet a, Henry Lalbiakzinga Chhundeng leh a thurualpuite hi an phú tâwk anga dan hmanga hremna an chunga lek a nih ngei theih nan CYMA chuan a thlir zui reng a ni," an ti a; Hemi kaihhnawiha YMA, Kulikawn Branch leh Ramhlun North Branch hmalakna tha an ti a, an thlàwp tlat thu an tarlang bawk.

 CYMA chuan, “Mizoram Police-in, March 15, 2025-a Heroin hawng 440 leh a neitu-a puh Henry Lalbiakzinga Chhundeng leh a thurualpuite an man chu lawmawm an tih thu sawiin, ‘Mizoram Police-te thawhrimna kan chhuang tak zet zet a ni,’ an ti bawk.

 CYMA chuan, Mizorama ruihhlo hluar zelah, YMA-in theihtawp chhuahin hma a lak zel thu leh Central Anti-Drugs Squad (CADS) pawh din thar a ni a, March 15, 2025 atanga hma an lak tan thu an sawi a; YMA Branch, Group leh Sub-headquarters-te chu an huam chhungah thâ thlah lova ruihhlo leh a kaihhnawih thil tha lo do zel turin an chah bawk.

6. NGAIHTUAH-ZUI TUR…

Hawng 440 buaina khan, Mizo mipuite min beng harh hawk, kan ti thei ang! Hawng 440 khan, Ruihhlo tawlhrutute khan, Kohhran, Khawtlang leh Ram Rorelna (Politics)-ah hial pawh kua an lo hreuh thuk tawh tur zia min hriatchhuah tir a. Hmulthi a ding sung sung thei alawm le! An Income leh Hnathawh kan hriatchian em em ten, In leh lo leh ram te, man to tak taka an han lei pawp pawp thei mai te! Dawr lian leh tha tak tak an hawng thei mai te! In leh lo tha tak tak leh man to tak tak an han sa uaih uaih thei mai te khan! Hawng 440 or Ruihhlo hmanga sumdawnnain Mizo-te zinga kua a lo hreuh thuk tawh zia chiang takin a rawn phochhuak a ni ber e. Hei lah, “a then pawh kan hre lo..” tih hla ang chauh ala ni mai si! Eng tin nge ni ang le Lalpa?

MIZO FOOTBALL CLUB QUAVADIS?

 MIZO FOOTBALL CLUB QUAVADIS?

><}}> Dr. John, 29.07.26

India rama Football inelna sang ber dawttu Indian Football League (IFL)-ah season liam ta khan Mizo Club pahnih Aizawl FC leh Chanmari FC te an awm a. AIFF-in Sponsor a hmu lo a nih chuan Season liam ta ang khan club-ten inelna senso 90% an tum dawn a ngai dawn a ni.

 

Club pakhat sum thawh tur hi Rs. 123.26 lakhs a ni hem mai a! Hei hi, Mizo Football Club tan chuan a buaithlak tham hle a ni. NorthEast aṭanga I League Champion tawh awmchhun Aizawl FC hian IFL-a an khelh theihna quota hi club dang (neitu dang) kuta hlan chhawn tumin hma an la mek a, Chanmari FC hmalam hun pawh a chiang lo.

 VANGLAINI ZIRCHIANNA

Sawi tawh ang khian, India rama Football inelna sang ber dawttu Indian Football League chu October 16, 2026 ațang khian khelh tan a ni dawn a. July 27 khan Football House, New Delhi-ah IFL Governing Council an thu a, thutlukna hi an siam a ni.

 

Inhmuhkhawmnaah hian Club 11 ațangin aiawh 10 an tel a; Aizawl FC, FC Bengaluru United, Chanmari FC, Delhi FC, Dempo SC, Gokulam Kerala FC, Rajasthan United FC, Real Kashmir FC, Shillong Lajong FC leh Sreenidi Deccan FC ten aiawh an tir a, Mohammedan Sporting Club erawhchuan aiawh an tir lo thung.

 

Season liam taah khan, India rama thuneitu sang ber AIFE leh an thawhpui Reliance hnuaia awm Football Sports Development Limited inremna a tawp a, AIFF hian sponsor lian tham an hmuh mai theih loh avangin an buai hle a ni.

 

AIFF hnuaia inelna pa 2- ISL leh I League te a hunah an tan thei lova, inelna buatsaih tura Club-ten sum an thawh zarah inelna an nei thei hram chauh zawk a ni. I League bik hi Indian Football League tia hming tlak a ni a, Club-te sum an thawh zarah inelna tha taka neih thin a ni.

 

Season liam taah khan, IFL hian TV ațangin entu maktaduai 17.56 an nei a, tum dang zawng aiin football fan tan en a nuam. Mahse, Football club lam tan erawhchuan hlohna hlir a ni thung. Season thar atana IFL buatsaihna tur sum ruahman hi Rs. vbc 135.592 a ni a, Sponsor an awm lo a nih chuan league enkawlna sum tam zawk hi Club te thawh tur a ni ang. Club pa 1 thawh atana an sum bituk zat chu Rs. 123.26 lakhs a ni a, hei hi vawi 6-a pek tlak turin ruahmanna an siam a ni.

 

Hetihrual hian, Sponsor atanga hlawkna a awm erawhchuan, AIFF lam chuan 10% chauh an chang thung ang a, Club lamin 90% an chang dawn a ni. Hei erawh hi chu Club tan innghah ngamna chi a ni lo. Mizo Football Club pa 2 te tana harsatna belhchhah turin IFL Club dang zawng zawngin sum thawh an thlawp vek a, Aizawl FC leh Chanmari FC te hi tangrual mah se an thu kenin AIFF thutlukna a tibuai pha dawn lo hrim hrim a ni.

 

Chanmari FC President Vanlalruatfamkima (Valpuia) chuan, "Hetiang participation fee an ruahman hi club tê zawk-te inrahbehna a ni. Mizo Football Club-te hi inkhelh-ah chuan kan tha em em a, min huphurh avangin inkhelh hma hauhvin min nekchep ni berin kan hria. AIFF-ah ngenna kan thlen leh a, MFA pawh hma min lak pui turin kan ngen a. Hautak hle mahse Mizoram aiawha tel ve hram dan kawng zawn phawt kan tum a. State dang angin Sorkar puihna te kan mamawh dawn a, chutiang chu a theih loh chuan tun tumah hian kan tel thei lovang. Thawhpui tur te kan zawn kual a ngai dawn a ni," tiin Vanglaini a hrilh a, Sorkar puihna tel lo chuan kal theih an inbeisei lo a ni.

 

Aizawl FC erawhchuan, hetianga Club thawh tur sum bituk a san tak em avang hian Indian Football League-a khelh zui zel hi an zuam tawh lo hrim hrim a, IFL khelh theihna quota pawh Club dang kuta hlanchhawng turin ruahmanna an kalpui mek a ni. Tunah hian indawrna thui tak an kalpui tawh a, a leitu tur hi Mizoram pawn lam an nih dawn avangin, tun dinhmunah chuan, IFL-ah hian Mizo Football Club pakhat chauh an awm a rinawm ta a ni. Chutihrualin, Chanmari FC pawhin tanpuitu an nei lo a nih chuan IFL-ah hian Mizo Football Club hi awm lo thei dinhmunah a ding reng tawh a ni!

 

Season liam taah khan, ISL-ah Mizoram Player 43 an awm a, IFL-ah Mizo player 63 zet an awm bawk. Mizoram-in IFL Club a nei lo a nih chuan India ram Football inelna sanga Mizo player awmzat hi nasa takin a tlahniam dawn tih a chiang bawk a ni.

 

P.S.:-

Mizo Thalai Football-a hmalam hun eng tak nei mek-te tan leh Mizoram tan SPORTS MINISTER & MIZO MIHAUSA-TE  chet a hun e...

 

Source: Vanglaini

SUPREME COURT-IN NEET QUESTION PUTRU AVANGA LUNGAWILOHNA LANTIRTU ZIRLAI KUM 18 HNUAILAM TE CHHUAH ZALEN TURIN THUPEK CHHUAH

SUPREME COURT-IN NEET QUESTION PUTRU AVANGA LUNGAWILOHNA LANTIRTU ZIRLAI KUM 18 HNUAILAM TE CHHUAH ZALEN TURIN THUPEK  CHHUAH

><}}> Dr. John, 29.07.26

Supreme Court chuan, NEET Question putru avanga lungawilohna lantirtu Zirlai kum 18 hnuailam te chu chhuah zalen vek turin thupek a chhuah a. Zirlai kum 18 hnuailam-te leh criminal record nei lo te chu chhuah zalen turin Nimin July 28 khan thutlukna a siam a. 

Chief Justice Surya Kant kaihhruai bench chuan lungawilohna lantirna hmun hrang hranga CCTV footage, drone recording, body-camera, leh digital evidence dang-te vawng tha vek turin, Thuneitute chu hma la tur leh Delhi, Maharashtra, Bihar, Kerala, Madhya Pradesh leh Uttar Pradesh Chief Secretary-te chu hemi chungchanga chhanna pe turin a hriattir a, awn lam bik nei lovin Zirlai leh Police-te chetdan leh hliam-te chhuichian vek an nih tur thu a tarlang bawk a ni.

LOK SABHA-AH PUBLIC EXAMINATIONS AMENDMENT BILL, 2026 SAWIHO

 LOK SABHA-AH PUBLIC EXAMINATIONS AMENDMENT BILL, 2026 SAWIHO

><}}> Dr. John, 29.07.26

Nimin khan, Lok Sabha chuan Exam hrang hranga diklo taka chete na zawka hremna tur 'Public Examinations (Prevention of Unfair Means) Amendment Bill, 2026' chu sawiho turin a chhawp chhuak a. He Bill tharah hian thil sual tite chu kum 10 thleng lung in tantirte, Rs. vbc 10 thlenga chawitir leh thil neihte laksak theihna dan khauh tak tarlan a ni a. Hemi atan hian State hrang hrangah Special Fast Track Court din tur a nih bakah, thla 2 chhungin a chhui hna zawh a, thla 3 chhungin trial zawh tur a ni bawk a ni. Minister Jitendra Singh chuan he dan thar hian Zirlaite hmakhua a ngaihpawimawh zia a tarlang a ni, a ti a, eptute lam erawh chuan inbumna a ni, tiin an sawisel thung.

Rajya Sabha thutkhawm chu NEET buaina avanga eptuten lungawilohna an lantir avangin Vawiin July 29 chawhma dar 11:00 AM-a tan leh turin tihtawp a ni a, Lok Sabha nen nimin chawhnu dar 2 thleng khan tihtawp lailawk a lo ni tawh bawk a ni.

MIGAHTA-IN VAWIIN ATANGIN ‘SIT-IN DEMONSTRATION’ NEI DAWN

 MIGAHTA-IN VAWIIN ATANGIN ‘SIT-IN DEMONSTRATION’ NEI DAWN

><}}> Dr. John, 29.07.26

Mizoram Govt. Adhoc-Aided High School Teachers’ Association (MIGAHTA)-in Sorkara an thilphut nawrna atan ni 6 chhung lungawi lohna an lan tir hnuah naktuk atangin Aizawl Vanapa Hall tualah Peaceful Sit-in Demonstration an nei dawn.

MIGAHTA chuan School Provincialised an nih tawhna dinhmuna dah let an phutna leh dinhmun hniam zawka dah an duh loh avangin Sorkar laka an lungawi lohna nimin khan an lantir chhunzawm a, Mass Casual Leave an la. ‘Mass casual Leave’ hi nimin piah khan an lo la tawh bawk a ni. Mass Casual Leave hi Mizoram puma Adhoc High School 90 chuanga thawktuten lain, school-te chu an khar vek bawk a ni.

MIGAHTA chuan, Vawiin hian lungawi lohna leh Sorkara an duhnate lantir nan Vanapa Hall tualah Peaceful Sit-in Demonstration neih an tum a, Sit-in Demonstration hi tunkar Zirtawpni thleng nei turin ruahmanna an siam a, hemi hnuah pawh Sorkara an dilna leh ngennaten awmzia a neih loh chuan na zawka hmalak chhunzawm zel an tum a ni.

MIGAHTA hian lungawi lohna lantirin tun thla ni 21 leh 22 khan Badge dum an lo bel tawh a, ni 23 leh 24 khan No Teaching Day hmangin, nimin leh vawiinah te Mass Casual Leave lain school an khar vek a ni.

HENRY L. HLAWNMUAL-IN 'SPECIAL PERMIT' NO PLYING DAY A NEI THEI BIK ELO!!??

HENRY L. HLAWNMUAL-IN  'SPECIAL PERMIT' NO PLYING DAY A NEI THEI BIK ELO!!??

><}}> Dr. John, 28.07.26

Aizawl Club Parking-ah hian Motor changkang tak Jaguar Car, Baleno car leh Bike park ṭhin a ni a, Jaguar Car, Baleno leh Bike ah hian engngemaw lai khan 'tlan loh ni neilo' Special Permit a lo in tar kuau mai a! He car neitu hi Lengpui ram hralhna-a  hlawkna tel lian ber, Rs. Vbc 117 leh nuai 90 latu Henry L. Hlawnmual lirthei te  an ni.

 Car leh Bike hma ah hian Aizawl chhunga tlan loh ni nei lo Special Permit "No Plying Day" tih tar a ni a. Thla 4 chhung zet chu Henry L. Hlawnmual hi Aizawl-ah Special Permit nen nitin tlanchhuah a ngai tihna a ni a, a thil buaipui hi Sorkar lam pawhin an ngai pawimawh hle tihna a ni.

 Traffic Police lam Official te sawi dan chuan, 'No Plying Day' Special Permit an pek chhan bulpui ber chu Emergency Duty a ni tlangpui a, Hospital, PHE, P&E etc. te an ni ṭhin.

 School naupang hruai leh election lam pawh hetiang permit an pek tawh loh laiin mimal hnena thla 4 chhung special permit pek hi a mak hle !

 Henry L. Hlawnmual hi Sorkar Official a nih thu hriat a ni lova, a mimal hnena thla 4 chhung tawp Special Permit 'NO PLYING DAY' ZPM Sorkar-in a pe thei bik hi thil mak tak a ni.

 Henry Lalremsanga Hlawnmual Bank Account-a Rs. Vaibelchhe 117 leh nuai 90 pek chungchang-ah hian dan bawhchhia-a Lengpui ram hralh phalna petu Chief Minister Lalduhoma leh Revenue Minister B. Lalchhanzova te kut fai a rinawm loh thu MPCC chuan Aizawl Press Club-ah an lo sawi tawh a.

Chief Minister Lalduhoma'n a rangkachak (Gold bar) zawngin a dawng, tia puhna awm pawh vawiin thlengin a insawifiahna hriat a la ni lo.

 Source: ZORAM TIMES, April 17, 2026.

HAWNG 440 KHA KAN LA HRIA EM?

HAWNG 440 KHA KAN LA HRIA EM?

><}}> Dr. John, 28.07.26

Nikum 2025 March ni 13-a Champhai District Hruaikawn kawnga Zokhawthar Police te'n Heroin hawng 440 an man a, a neitu ber nia puh, Henry Lalbiakzinga thubuai chu ala kal mek zel a, Henry Lalbiakzinga hian Special Court, ND&PS Act. Champhai Judicial District hnenah bail a dil a, a dilna hi nimin piah khan Special Court, ND&PS Act. Champhai Judicial District chuan Henry-a Ukil leh sawrkar Ukil te thusawi ngun taka a ngaihtuah hnuah bail a dilna hi a hnawlsak ta a ni.

 Henry-a Ukil te hian Henry-a kut atangin dan phalloh thil engmah an man loh thute, a hriselna a that loh thu te, man a nih laiin BNSS Section 47 leh 48 in a phut anga man a nih chhan hrilhhriat a nih loh thu bakah a chhungte leh a laina hnaite pawh hrilh an nih loh thu te hmangin Bail an dilsak a ni.

 Hetihlai hian sawrkar ukil te chuan Henry-a hi he thubuai ah hian a inhnamhnawih ngei ni a lan thu leh amah an mannaah dan bawhchhiatna a awm loh thu an sawi ve thung a, Henry-a hi thiam loh chang thei dinhmuna ding a nih avangin thubuai ngaihtuah a nih laia lo chhuah lailawk chu a rem loh thu an tarlang ve bawk.

 Special Court, ND&PS Act. Champhai Judicial District chuan sawrkar Ukil te thu sawi chu pawmpuiin Henry-a hi thubuai ngaihtuah a nih lai chuan Jail-a la awm rih turin thutlukna a siam a, ND&PS Act. Section 35 leh 45 hnuaiah Henry-a hian hre reng chunga dan phal loh ti anga ngaih tur a ni tiin bail a dilna hi a hnawlsak ta a ni.

 He case ah hian Henry atan hian Lalchhuansanga Sailo a ding a, Sawrkar tan hian Special PP Vanlalhumi a ding thung a ni.