MPCC-IN FCRA AMENDMENT BILL DODAL-IN “BLACK DAY” HMANG

 MPCC-IN FCRA AMENDMENT BILL DODAL-IN “BLACK DAY” HMANG

><}}> Dr. John, 22.07.26

Vawiin khan, Mizoram Pradesh Congress Committee chuan Central-a BJP Sorkarin FCRA Amendment Bill, Parliament Session-a pass tura a phochhuah duh lohna leh dodalna lantir nan 'Black Day' an hmang.

He hun hi nimin khan Vanapa Hall kawtah hman a ni a. MPCC Sr. Vice President Pu Lalnunmawia Chuaungo chuan thu sawiin, FCRA chu kum 2010 khan Central-ah Congress kaihhruai sawrkar laiin siam that a lo ni tawh niin a tarlang a. Kum 2016, 2018 leh 2020-ah te khan dan hrang hrang hmangin khawih danglam a nih thu leh kumin March thla khan FCRA Bill chu pharh tum a nih thu MPCC Sr. Vice President chuan a sawi a, Congress party leh mipuiin an sawisel nasat avangin chhawpchhuah a ni ta rih lova, tunah hian chhawpchhuah a ni leh ta niin a sawi bawk.

Pu Lalnunmawia Chuaungo chuan, FCRA hi pass a nih chuan kohhran leh tanpuina sumte ram dang atanga luhna kawng a tawp tur thu leh, Mizoram tan harsatna a tam belh tur thu, a sawi a ni. Pu Lalnunmawia Chuaungo chuan, Bill thar hian foreign contribution dawng turte certificate hnawlna leh appeal theihna a tihkhirh dawn avangin, Mizoram-a kohhran leh NGO hrang hrangte charity a tana in hmang, hospital, school leh hnuchham enkawina te a nghawng nasa dawn, tih a sawi.

Pu Lalnunmawia Chuaungo chuan, "FCRA Portal-a alan dan chuan, July 15 thleng khan Foreign Contribution dawng thei 14,449 an awm a, 22,498 hi cancelled tawh a ni, 15212 dang chu an certificate dam chhung a pel tawh (expired tawh)-a ngaih an ni. Hei hian a nghawng chu, Mizoram-a kan Kohhran hrang hrangte charity atana in hmang, hnuchham enkawlna te, rualbanlote tana inhmang ten harsatna an tawk mek a. He dan an pass hnu-ah phei chuan a zual zapui vaihlenhlo a ni dawn a ni,” a ti bawk.

MPCC Sr. Vice chuan, "Kan CM zahawm tak pawh hemi chungchang hi kan ngen duh a. Kohhran hruaitute, NGO hrang hrang hruaitute, Political party tin hruaitute hruaiin Prime Minister min zuk hmuhpui rawh se. Mizoram Assembly-ah Special Assembly ko sela, FCRA duh lohna Official resolution siam ngei rawh se,a ti a. Mizoram in MP-ah vaitawng leh saptawng thiam an zawrh ang ngeiin kan thlang chhuak a, ani hian Lok Sabha-ah he bill discuss a nih hunah, a ep zawngin kan MP hian thu sawi ve ngei rawh se”, a ti bawk.

AICC Mizoram in-charge Dr. Chella Kumar pawhin, BJP Sorkar hian, FCRA Bill hi NGO leh minority-te a target bik niin a sawi a, FCRA hmanga din Biak in, hospital, school leh welfare institution-te pawh a nghawng theih dawn avangin Congress-in an dodal zel dawn, tih a sawi.

He huna kalkhawmte hian Mizoram MP pahnihte chu FRCA dodal tura ngenna poster an keng a, he hunah hian resolution paruk lungrual takin an pass bawk a ni.

Chung Resolution an pass te chu-

 1. FCRA Amendment Bill, 2026 hi BJP kaihruai Sorkar laipui in hnuk kir rawh se.

2. India rama Kristian-te chunga hleilenna thleng thin ti tawp turin BJP kaihhruai Sorkar laipui in hma la rawh se.

3. India rama Christian-te thlavang hauh turin Mizoram Chief Minster hi pen chhuak ve tawh rawh se.

4. FCRA Amendment Bill 2026 hi Kristian-te tan a that loh em avangin hnuk let tura nasa taka nawr turin Mizoram Chief Minister hian Kohhran hruaitute, NGO hruaitute leh Political Party tin hruaitute sawmkhawmin Prime Minister hmuhpui rawh se.

5. FCRA Amendment Bill, 2026 hi Parliament-a putluh a nih hunah Mizoram MP ten dodalna thu sawiin, vote thlak hunah pawh 'hai' mai lovin, a dodal zawng ngeiin vote thlak rawh se.

6. Mizoram Legislative Assembly-a FCRA Amendment Bill, 2026 dodalna resolution pass a nih theih nan, Mizoram sorkar in Special Assembly ko rawh se.

RAHUL GANDHI MAN VANGIN LOK BHAVAN BUL-AH MPCC PUNGKHAWM

Mizoram Pradesh Congress Committee (MPCC) te chuan, Zanin khan, Delhi Police ten Rahul Gandhi an man avangin Nizanah khan, Lok Bhavan kawtah an pung khawm.

Thu kan dawn danin, he thil thleng avang hian Zanin dar 9 PM velah khan MPCC chuan Governor hnenah memorandum an theh lut nghal a ni.

Governnor hnena an lehkha thehluhah hian, “Union Education Minister Dharmendra Pradhan chuan a mawhphurhna pawmin rang takin banna a theh lut tur a ni, an ti a. Exam chungchanga kal sualna leh Sorkar-in Zirlai-te hmalakna humhalh tlin loh chungchang hi Parliament-ah kimchang taka sawiho tur a ni, an ti a. Nimina Delhi-a thil thleng avanga Zirlai-te chunga FIR zawng zawng-te chu paih (withdraw) nghal turin an ti bawk…”

The Indian Express in a tarlan danin, Vawiinah khan, New Delhi-ah Congress party chuan kumin May thlaa NEET exam zawhna put leh a kaihhnawiha lungawi lohna kal zelah Prime Minister Narendra Modi chenna 7, Lok Kalyan Marg-ah lungawi lohna an lantir a. He hmalaknaa inlan, Congress hruaitu Rahul Gandhi, Priyanka Gandhi Vadra leh party hruaitu dangte chu Delhi Police-in an man a. Congress party sawi danin an mi mante hi Model Town Police Station-ah hruai a ni.