MIZO BOXER ‘ZO KEITE’ NT. BIAKKIMA CHU THE PUNCH BOXING 13TH EDITION-AH A CHAK
><}}>
Dr. John, 20.07.26
Harsatna tam tak a pal
tlang hnu-in, NT. Lalbiakkima'n hnehna a hlawh chhuak ta!
The
Punch Boxing 13th Edition
chu July 18, 2026, 5:00 PM khan, EXPOINN Hotel, Greater Noida-ah neih a ni a.
Main event-ah Mizo Boxer NT. Lalbiakkima chuan Nepal boxer Lal Prashad Upreti
chu, unanimous decision-in a hneh.
Mizo Boxer NT.
Lalbiakkima (Ring name- Zo Keite), “God
helps those who help themselves” tih thupuia neitu hi Siaha khua (New Siaha
East 1) niin, a nupui Pi Lalrinchhani (k-22) chuan, December 10, 2023 khan a
boralsan tawh a. Hemi hnu hian, a Coach leh a innghahna ber ti ila kan sawi
sual awm love, Dr. Lalmuanpuia, Fin. Secy. MF&AS, Mizorma State Sports
Counil (MSSC) chuan, January 25, 2026 khan a lo boralsan leh a. A nu Pi K.
Zothanpuii pawhin February 5, 2026 khan ZMC&H ah a lo boralsan veleh bawk a
ni. A pa hi February 7, 2016 khan a lo sun tawh nghe nghe.
NT. Biakkima zinkawng
hi a bumboh tak zet zet a. Mi tam takin kan tawrh zawh loh tur lungngaihna leh
harsatna-in a tlakbuak a. Mahse, lungngaia in dawm kun mai lovin, chungte chu
chhel takin a paltlang a ni. A hringtu nu leh pa a sun mai bakah, a nupui
duhtak mai chu, a sun zui leh a! Chu mai chu ni lovin, a professional career-a
mi pawimawh lutuk mai Dr. Muanpuia’n a han boralsan eh hlauh bawk nen! Mi tam
tak chuan, lusun chunga hlawlhtlin chu kan beisei tawh hauh lovang!
Mahse, NT. Biakkima,
Zo Keite chu a ni ve tlat lo! A thupui, “God helps those who help themselves”
tih chuan, a kaitho a, a chelh reng a, a thlamuan a, hnehna kawngah a hruai ta!
Hei hi Pathianin a hriatpui a ni tih, Hnehna a channa hian a rawn ti chiang hle.
The Punch Boxing 13th
Edition, July 18, 2026, EXPOINN Hotel,
Greater Noida-a Hnehna ropui tak a
channa hi, a Nupui, a Nu leh Dr. Muanpuia te boral hnua Boxing Ring chhunga a
rawn inlan lehna hmasa ber a ni a, Hnehna hi a hlawhchhuak ta a ni!
NT. Lalbiakkima chuan,
an inhnek hma khan, a Fanu Sangsangi (NT. Lallawmsangi) thusawi, “Vanramah
chuan Ama chhungkaw hlim ber kan la ni ang…” a tih chu hre rengin,
“He thil hi ka fanu
tan leh kan chhungkaw tana ka tih a ni,
Boxing hi ka tan chuan rohlu a ni a, ka
theihna zawng zawng ka hlan ang,”
tiin The Punch Boxing an neih tur
chungchangah khan a lo sawi tawh a ni.
Mizo Boxer NT.
Lalbiakkima hian, a inbuatsaih nan HB Boxing & Alter SnC-ah training a nei
a. A Coach chu H. Lalrinhlua (Hlubawiha) niin, Manager C. Lalruatfela
(Lalbawiha) leh Mapuia te an ni.
INHNEK
BORUAK…
The Punch Boxing 13th
Edition, Greater Noida-a Mizo Boxer NT. Biakkima (Zo Keite) leh Nepal Xoxer Lal
Prasad Upreti te inhnek hi, a hmuhnawm lo lek lek zawk a ni!
A chhan chu, Nepali Boxer
hi a bul atanga a tawp thlengin, a tlanchhe deuh char char a ni ber e. Zo Keite
zawng a lo hlau hle a ni. Nepali Boxer khan, tlanchhe char char pahin, râl
ațanga chhaih a, jap zeuh zeuh vela point score a, chhaih chauh kha a tum ni
berin alang. A thil tum kha a fuh teuh hle ni pawhin a lang. Mahse, NT-a khan,
a ngam hrim hrim bakah, Zo Keite hlauh nei lo, chau thei lo khan, a pan char
char a, point pawh a hlawh chhuak hnem ngiang mai! A tawpah zawng, loh theih
lohvin, unanimous decision-in Mizo Boxer Zo Keite chuan hnehna a chang ta a ni!
Sawi hmaih hauh loh
tur chu, Delhi Mizo hovin Mizo Boxer NT-a an support-na ropui leh hnuhnawm zet
kha a ni! Delhi Mizo te an va fakawm tehlul m! Mizo an chawimawi a, Mizoram min
chawisang a ni! An inhnek zawha, NT- a chak hnua, NT-a boruaka vawr kang chunga
an han chhuahpui te kha hmuh a nuamin hnuk ati-ulh thei alawm le! Delhi
Mizo-te, Mizo aiawhtute kan chhuang takzet a che u! NT-a pawhin, thil tam tak a
ngaihtuah let a nih a rinawm! Lawm avangin a mittui a dang zo lo a nih kha…
NT-a hi thinlung takin
kan lawmpui tak zet zet e.
"ZO
KEITE" NT. BIAKKIMA SULHNU ROPUI…
(Tih kim loh palh
emaw, ziah sual emaw kna neih chuan ngaihdam kan dil nghal e)
Mizo Boxer tha leh fi
tak mai, ft. 5"0' chauhva sang si, NT. Lalbiakkima (Ring name- Zo Keite)
hian Boxing zin kawngah sulhnu a lo nei tha hle mai. Tawi tete-in han tarlang
zuai ila…
THE
FIRST INDIA OPEN INTERNATIONAL BOXING TOURNAMENT 2018
He Boxing Tournament, Jan.
28- Feb.1, 2018 chhunga New Delhi-a neih ah khan, Light Flyweaight category ah,
Bronze Medal a hlawhchhuak a. Hetihlai hian, Ram 18 atangin Boxer 96 an tel a
ni.
THE
PRESIDENT’S CUP TOURNAMENT 2018
He Boxing Tournament
ah hian, Olympic Gold Medalist leh World No.1 Hasanboy Dusmatov pawh a lo hneh
tawh a, India ram atanga World No.1 & Olympic God Medalist hnehtu hmasaber
(the First male Indian boxer to defeat the world no.1 and Oulympic gold
medalist) a ni tawh bawk a nih kha…
INTERCONTINENTAL
TITLE FIGHT 2020
Kum 2020 December 20
khan, NT-a hian a Professional Fight hmasa ber a hmachhawn a, awlsam takin a
khingpui TKO-in a lo hneh tawh bawk a ni.
IBA
INTERCONTINENTAL CHAMPIONSHIP 2021
Auguts 6, 2021 khan,
Marine Pro Boxing hnuaiah, Title fight neiin, a khingpui Sandeep Singh chu TKO
in a hneh a. IBA Intercontinental Champion thar a ni ta a nih kha. Khami tum
khan, NT-a kha, India ram atanga IBA Intercontinental Title la hmasa ber (First
ever Indian Pro Boxer to win the IBA Intercontinental Title) record a siam nghe
nghe a ni. NT-a khan Sandeep kha a sawp nasa hle a, a khingpui khan kawng
engkimah a hneh lo a ni tawp mai. NT-a fitness kha a tha em em a, Sandeep khan,
2nd round ah khan khelh a zuam tawh lova, a hneh lo chauh ni lovin a tlawm a ni
ber mai, pui tak a ni.
THE
WBC ASIAN CONTINENTAL LIGHTFLYWEIGHT TITLE 2022
He Title Fight June
2022 khan Dubai ah neih a ni a. World No. 47th Rank hauh mek tu, Jayson Vayson
lakah a vanduai ta hlauh a. Hei hi NT-a’n Pro Fight vawi 5 a telnaa a vawi 1
vanduaina a ni. Hei pawh hi Round 10 an khel hman a, Judge te Split Decision
hmangin a khingpui hi chaka puan a ni nghe nghe.
THE
PUNCH BOXING NIGHT 1O 2023
Kum 2023 August thlaa
The Punch Boxing Night 10 ah, a khingpui Thailand boxer tha zet mai, Kittipong
Jareonroy chu TKO-in a lo hneh tawh a. Hemi Kum vek, October 30-a LPS PRO FIGHT
2023 Quarterfinal ah khan, Unanimous Decidion-in a khingpui C. Lalchhanhima a hneh
a. November 11 khan, Vanlalenkawltira hnehin a lo chak tawh bawk a ni.
THE
PUNCH BOXING 13TH EDITION 2026
Tuna kan lawmpui mek fight
hi, Greater Noida-ah, tunhnai lawk July 18, 2026-a thleng a ni a. Mizo
Professional Boxer NT. Lalbiakkima (Zo Keite) chuan, Nepal boxer Lal Prasad
Upreti chu unanimous decision-in a hneh ta a ni.
Mizo Boxer NT.
Biakkima (Zo Keite), Boxing huanga Mizo-te min ti-hmingthatu hi kan chhuang tak
zet zet a, a kal zelna turah hlawhtlinna nei zel turin duhsakna sang ber kan
hlan a ni.
0 comments :
Post a Comment