AIZAWL-A RAN TALHNA HMUN PA 2-AH THLA TIN RAN 600 VEL TALH ṬHIN

 

AIZAWL-A RAN TALHNA HMUN PA 2-AH THLA TIN RAN 600 VEL TALH ṬHIN

><}}> Dr. John, 16.07.26

Annimal Husbandry and Veterinary department hotute chuan, Aizawla ran talhna hmun (slaughter house) pahnihah thla tin ran 600 vel talh thin a nih thu an sawi.

AH&Vety department leh ICAR-NMRI, Hyderabad chuan nimin khan State Veterinary Polyclinic Hospital conference hall-ah ral talhtute leh sa zuartute tan thianghlim zawka sa sawngbawl dan leh man man zawka hralh theih dan zirhona, 'Training on hygenic meat production, meat safety and value addition technologies for Development of North-Eastern India' an buatsaih.

Zirhonaah hian Veterinary officer (VPH) Dr Michael V Lalrinzuala chuan, Vety department-in Mualpui-ah leh Bawngkawn Brigade-ah ran talhna hmun (slaughter house) an neih thu a sawi a, "Slaughter house

pahnihah hian chawhrualin Thawhțanni atanga Ningani thlengin ran 20 vel kan talh ziah a, Zirtawpni bikah Inrinnia zawrh turin ran 80 vel kan talh thin a, a vaiin thla khatah chawhrualin ran 600 vel kan talh," a ti.

Slaughter house-a ran talhtir turin registration tih hmasak a ngaih thu sawiin Dr. Michael-a chuan, "Registration tih dawn hian ran leh mihringin an inkai chhâwn theih natna langsar bik - ngawr (TB) vei leh vei loh test hmasak a ngai a, TB vei lote chauh registration tihsak an ni. Ran hriselna endik thin a ni a, hrisel lohna neite chu Tuiriala sa leh a kaihhnawih paihna bikah an hrisel lohna leh natna lan chhuahna tisa paih thin a ni a, a puma paih ngai an awm meuh lo," a ti a; Mualpui Slaughter House-ah mi 48 leh Brigade Slaughter House-ah mi paruk an inziah luh mek thu a sawi.

Zirhona hi Vety deputy director (FFD) Dr. Lalfamkima'n a kaihruai a, Aizawla ran talh thin leh sa zuar mi 20 an tel. ICAR-NRMI principal scientist Dr. Suresh K Devatkal, Dr. Michael V. Lalrinzuala leh Selesih-a Vety College Assistant professor Dr. Vandita Mishra ten thianghlim taka sa sawngbawl dan leh dahthat dan te, man man zawka sa zawrh leh hralh theih dante an zirtir a ni.

Training kharna inkhawmah Vety director Dr. Lalrotluanga Sailo-in thu a sawi a, training-a telte hnenah certificate leh ran talhna hmanrua a sem bawk.