MIZORAM ASSEMBLY-IN 'RO MIN RELSAK ANG CHE' TIH HLA CHU MIZORAM STATE SONG ATAN PAWM

MIZORAM ASSEMBLY-IN 'RO MIN RELSAK ANG CHE' TIH HLA CHU MIZORAM STATE SONG ATAN PAWM

><}}> Dr. John, 29.8.26

Chief Minister Pu Lalduhoma chuan, August 28, 2026-a Assembly Session-ah, Official Resolution pu lutin, India Danpuiin State song neih a khap lem loh avangin kumin August ni 10-a Cabinet meetingin State song neih ve ngei tula an hriat angin Pu Rokunga phuah, 'Ro Min Relsak Ang Che' tih hla chu State song atan hman ni se, a ti a.

 

He hla hian Pathian chu hnamtin chunga roreltu leh kulhpui nghet leh Lalber te Lalber a nih zia a puang chhuak a, he hla hi ram rorelnaa Pathian ram tundin a nih zel theihna tura fuihtu leh hun khirh leh harsa paltlang thei tura rinna leh chakna petu ni tura a duh thu a sawi a. He hla hi official-a sak a nih apiangin ding chungin kutphah ding lam lung zawna dahin, rilru tawngtaina nena sa turin an inngen nghal bawk a ti.

 He resolution hi member hrang hrangin an sawiho hnuah House chuan lungrual takin a pawm a ni.

MIZORAM LEGISLATIVE ASSEMBLY APPROVES ‘RO MIN RELSAK ANG CHE’ AS STATE SONG

The Mizoram Legislative Assembly has approved the proposal to adopt ‘Ro Min Relsak Ang Che’, composed by renowned Mizo composer Mr Rokunga (L), as the official state song of Mizoram.

During its session on Thursday, August 27, 2026, the Assembly approved the proposal put forward by Mr Lalduhoma, Chief Minister and General Administration Department Minister, to officially adopt the song as Mizoram’s state song. The House unanimously accepted the proposal.

The title ‘Ro Min Relsak Ang Che’ literally means ‘Be Thou Our Counsellor’, expressing a prayer for divine guidance and wise governance.

NEPAL CHHIATNA THLENG-AH MIZO TEL VE I HRIA EM?

 NEPAL CHHIATNA THLENG-AH MIZO TEL VE I HRIA EM?

NEPAL-A CHHIATNA THLENG-AH HIAN MIZO TEL VE KAN HRIAT AN AWM CHUAN, A HNUAI-A PHONE NO. AH HIAN KAN REPORT ZEL DAWN NIA

Kan Mizo-pui, Nepal chhiatna thlenga tel ve palh hlauh an awm chuan, a hnuaia Tarlan Ph. no ah te hian i report zel ang u. Kan Sorkar-in an tan theihtawp chhuah-a hmalak a tum e.

CENTRE FOR ENVIRONMENT AND SOCIAL JUSTICE MIZORAM- SAWRKAR THING PHUN VENHIM THAT LOH AVANGA BO THIN HI CHHUICHHUAH LEH TIHTAWP NI RAWH SE.

CENTRE FOR ENVIRONMENT AND SOCIAL JUSTICE MIZORAM

Email: cesjmizoram@gmail.com Website: cesjmizoram.org

Ph. No.:7005945474. Regd. No.: MSR 1578 of 15.02.2023.

No. CESJ-MZ/A1/2026/18(PR). Date: The 27, August,2026.

 SAWRKAR THING PHUN VENHIM THAT LOH AVANGA BO THIN HI CHHUICHHUAH LEH TIHTAWP NI RAWH SE.

 District Council leh Union Territory kan nih hun lai atang tawha Forest Department hnathawh langsar ber pakhat chu thing phun hi a ni awm e. Hun hmasa lamah khan Mizoram hmun hrang hrangah thing hralh kal chi (commercial tree species) te phun a ni thin a. Tlem lai deuh atang khan Mizoram hmun hrang hranga sawrkar (Forest Department) thing phun puitling tawh tam tak chu dan kalhin a ruka rala kih leh rukbo a ni thin a, sawrkar thingphunna hmun, Reserved Forest ami hialte pawh mimal kuta awm ta, Revenue Department-in mimal hnena Land Pass an pekte pawh a tam mai.

 Centre for Environment & Social Justice (CESJ)-in mi rinawm tak takte atanga report a dawn danin kum li/nga vel kalta atang phei kha chuan Kawrthah leh Mamit Forest Division huam chhunga sawrkar thing phun puitling tawh (abik takin Teak) te chu a bo nasa hle a, heng Teak thing ruk khawmte hi Transit Pass tel lova phurh sawn theih a nih loh avangin Private Felling Permit neitute thing kara zep ru-in, a then State pawn lamah phurh chhuah a nih laiin a thente chu mimal Saw mill-ah te hralh an ni thin. Mizoram thingte hi dan ang thlapa kih/seng a nih pawhin kan seng zat atanga 80 per cent chu Mizoram thing mamawh phuhruk nana hman tur a nih laia; sawrkar thing phun a ruk a rala dan kalha kih leh State danga thawn chhuah a ni thin hi a pawi tak zet a ni. Hetianga sawrkar thing phun (Teak) bo a lo hluar zual nachhan langsar deuhte chu:-

 "Timber Mafia te hian thawktu thenkhatte hi an thurualpui emaw, an ka an hup a ni thei?

A bialtu DFO, RO leh Field staff te hian sawrkar Teak Plantation venhim hi thawktu indaih loh chu thuhran, ngaih pawimawh berah an nei lo niin a lang.

 Heng thing rutute (Timber mafia) zingah hian Vai, Bru leh Local mi, Drugs addict-te pawh an tel a, an in organize tha em em a, mimal Teak pawh an zuah chuang lo; zan dar 7:00 leh dar 11:00 inkarah te, zing dar 3:00 leh dar 8:00 inkarah te Teak thing ruk hna hi an thawk tlangpui thin a, 24 hours chhung duty an awm loh chuan Teak plantation venhim hi a harsa ve hle ang. Timber mafia-te man chhuak tur hian mipui leh department dangte nena thawho thiam pawh a tul niin a lang.

 Private Teak Felling Permit neite’n an thing kihte hi Felling Guidelines-in a phut anga endik leh an phurh chhuah thlenga vilzui a ni ngai lo va; hei vang hian sawrkar Teak thing rukte hi mimal Teak, phalna neia kih State pawna thawn chhuah zingah zeh ruk a awlsam.

 Saw Mill License neite thing lei zat, zai chhuah zat, thawn chhuah zat leh an la kawl zat (timber stock) te hi Saw Mill Rules-in a phut anga endik leh chhiar sak an ni lem lo bawk; hei hian sawrkar Teak thing rukte hi mimal Teak, phalna neia kih zinga zep telin, mimal Saw mill-a hralh a awlsam hle bawk.

Heng a chunga tarlante hi Mizoram sawrkarin a hria em? Heng thil fel lo nia tarlante hi thudik a ni em tihte hi finfiah a, a dik a nih chuan a tisualtu/dan bawhchhetu leh a mawhphurtu zawng chhuak a, dan anga hma la turin sawrkar hi kan ngenin kan phut a ni.

 Forest Field staff te hian sawrkarin sum tam tak senga thing a phunte hi a him leh him loh emaw a bo leh bo lohte a hmunah kala thlithlaiin an pute hnenah hunbi neiin report an pe thin em tih te, chutiang ti tur chuan an pute’n thupek (instruction) an pe ngai em tih hi kan zawhna leh kan thil phut dang chu a ni.

Reserved Forest pawn (Non-forest land)-a Private Tree Felling Permit pek dawn hian a bialtu Forest Field Staff te’n Private Tree Felling Guidelines-in a phut anga thing kih atanga a phurh chhuah thlenga an vilzui theih chin chauh pek thin tawh ni rawh se tih hi kan phut tel bawk a.

 Licensed Saw Mill-in thing an lei zat, zai chhuah zat, thawn chhuah zat leh an la kawl zat (timber stock) te hi Saw Mill Rules-in a phut angin endik leh chhiarsak thin ni bawk rawh se tih hi kan phut leh bawk a.

Kan thil phut dang leh chu heng sawrkar thing phun puitling tawhte hi chu a bothlau tur venna ni pah fawmin, Mizoram thing mamawh (timber requirement) leh sawrkar sum indaihlohna tlem tala phuhruk nan Working Plan/Working Scheme siamin, chu mi-in a phal anga seng (harvest) thin turin Mizoram sawrkar (forest department) hi kan phut leh bawk a ni.

 Media & Publicity Cell, CESJ

MIZO TLEIRAWL NUPUII’N NATIONAL TAEKWANDO CHAMPIONSHIP 2026-AH GOLD MEDAL LA

MIZO TLEIRAWL NUPUII’N NATIONAL TAEKWANDO CHAMPIONSHIP 2026-AH GOLD MEDAL LA

><}}> Dr. John, 26.8.26

National Taekwondo Championship 2026, Pune, Maharashtra-a neih zawh takah, Mizoram atanga tel, Mizo Tleirawl Vanlalthlamuanpuii (Nupuii) chuan, the 5th National Kyorugi Taekwondo Championship Junior 2026, Female Under 55 kg category-ah Gold Medal a la.

Nupuii hian, he tournament-a a khelhnaah hian hneh loh a nei lova, Gold Medal la tur hian, Maharashtra, Haryana, Assam leh Madhya Pradesh atanga lo tel te a hneh vek a ni. Nupuii hian, khawvel huapa Taekwando intihsiakna, World Junior Taekwondo Championship 2026 ah India aiawh-in a tel leh dawn a ni.

Nupuii hi Zemabawk, Aizawla cheng niin, Taekwando hi Exodus School Taekwondo Club atang bul tanin, kumin 2026 hian, National level-ah Gold Medal hi vawi hnih a lo la tawh a ni. A vawi khatna kha, May thlaa neih, the 2nd Federation Cup National Taekwondo Championship 2026 ah khan (MATA Vision Olympic player Ramdingliani nen Mizoram tan) Gold Medal hi an lo la tawh a nih kha.

Nupuii hlawhtlinna hi kan lawmpuiin kan chhuang em em a, Mizoram tan leh India tana Chawimawina sang lo hawn chhunzawm zel turin duhsakna sang ber kan hlan e!

SMART METER VANGA HARSATNA TAWKTUTE LUNGAWI LOHNA LANTIR-IN PUNGKHAWM

SMART METER VANGA HARSATNA TAWKTUTE LUNGAWI LOHNA LANTIR-IN PUNGKHAWM

><}}> Dr. John, 26.8.26

Smart Meter vanga harsatna tawktute chuan, vawiin August 26 khan, Old Secretariat building hlui kawtah lungawi lohna 'Peaceful Protest of Smart Meter Installation in Mizoram' an nei.

Lungawilohna lantirna kaihruaitu Pu Zairemthanga chuan, Smart Meter chu Aizawl-ah pawh la vuah kim loh a ni chung pawhin sawiselna a tam nghal hle a, meter bill hmasa aiin a let 4/5 ten a sang a, a let 10-a sang te pawh an awm niin a sawi a, thingtlang lama vuah a nih hma hian meter hi ennawn ni ngei se an duh thu a sawi. He lungawi lohna lantirtute hi pawl an nih loh thu, a sawi bawk.

Electric bill sang complaint chuan awmzia a awm lo hle niin a sawi a, bill kal dan pawh a mumal lo hle, tih a sawi bawk. State tam takin Smart Meter hi an dodal mek a, court-a inkhing te pawh an awm, a ti a, State thenkhatah chuan mandatory in an kalpui ve lo, niin a sawi bawk, Mizoram Sorkar pawh hian a duh chuan hetiang hian a kalpui ve theih lohna tur a awm lo, a ti.

Kal khawm te hian a hnuaia mi ang hian resolution an pass:

1. Smart meter vuah a nih hnua Electric Bill sang nasa lutuk hi Sorkar in enfiah rawh se.

2. Bill pun dan dik lo emaw felhlel deuh emaw hmuhchhuah a awm a, chutiang ang bill pung dik lo Sorkarin a dawng a nih chuan mipui hnenah pe kir leh rawh se.

3. Complain a awmin rang takin P&E Department-in enfiah thin sela, Department leh Company inhnawn kual suh se.

4. Smart meter vuah tawh sa leh la vuah lohte pawh department-in uluk takin endik vek sela, endik a nih hma chuan vuah chhunzawm ni tawh suh se.

5. Billing period tih danglam dawnah emaw, Sawrkar in thil thar mipui sum bawm khawih che thei chi a chhawpchhuah dawn reng rengin mipui hnenah chiang taka hriattirin zirtirna pe hmasa tawh rawh se.

6. Electric smart meter zirchiangtu tur committee Superintending Engineer chinin a kaihhruai ngei a rang thei ang berin din ni rawh se.

MZP CHUAN, HNAMDANG PASAL NEI TA PI MERIAM L. HRANGCHAL-IN "MIZO HNAM DAN, THE MIZO MARRIAGE & INHERITANCE OF PROPERTY ACT, 2026” CHU SUPREME COURT-A A KHIN AVANGIN AN DEM TAK ZET THU AN SAWI

MZP CHUAN, HNAMDANG PASAL NEI TA PI MERIAM L. HRANGCHAL-IN "MIZO HNAM DAN, THE MIZO MARRIAGE & INHERITANCE OF PROPERTY ACT, 2026” CHU SUPREME COURT-A A KHIN AVANGIN AN DEM TAK ZET THU AN SAWI

><}}> Dr. John, 26.8.26

"Mizo hnam dan, The Mizo Marriage & Inheritance of Property Act, 2026 Supreme Court hial a khing duh tu Mizo Nu ni thin, hnamdang pasal nei ta chu a dem tak zet" - MZP GHQ Aizawl.

Mizo Zirlai Pawl (MZP) General Headquarters, Aizawl Executive Meeting vawi 655- na chu vawiin August ni 26, 2026 (nilaini), chhun dar 12:30 khan MZP Conference Hall-ah neih a ni a, Meeting hi MZP President Dr. C. Lalremruata'n a kaihruai a.

Meeting chuan, MZP Rorelna sang ber dawttu, MZP Federal Council vawi 61-na Agenda chungchang, Hnamdang nupui/ pasal neilo tura inzirtirna ni hman dan tur chungchang, Teachers' Day chungchang leh pawl chhung thil pawimawh hrang hrang rel a ni.

Meeting chuan, MZP-in a kum 2015 atanga Sept ni 2 apianga alo hman thin, "Hnamdang nupui/ pasal neilo tura inzirtirna ni" chu kumin pawh hian hman leh nise, School hrang hrangah thusawina hun hman leh nise tih a ni. "Zirtirtute Ni" Teachers' Day pawh MZP-in kumtin a a tih thin angin, Zirtirtute zahna thuziak Aizawl chhung hmun hrang hrangah tar leh nise tiin a rel bawk.

MZP rorelna sang ber dawttu Federal council vawi 61-na August ni 31, 2026(Thawhtanni) a neih tur Agenda thlitfim nghal a ni:-

1. Zirlaiten ruihhlo hman sual a hlauhawmzia an hriat theih nan MZP in nasa zawkin Drugs Awareness Campaign buatsaih rawh se.

2. Mizoram ramri dik tak humhalh a nih theih nan sorkarin hma la rawh se.

3. Mizoram sawrkar enkawl College hrang hrangten a an mamawh Bus an neih theih nan sawrkarin hma la rawh se.

4. Kaladan Multi-Modal Transit Transport Project (KMTTP) -in kan ram leh hnam tana nghawng a neih theih dan zirchiana, hmalak ni rawh se.

5. Mizo thalai leh zirlaite tan Career Awareness Campaign leh Nationalism Campaign a tam thei ang ber MZP in buatsaih rawh se.

6. “The Mizo Marriage and Inheritance of Property (Amendment) Act, 2026" khauh taka kengkawh a, hnamdang thlah ten Scheduled Tribe (ST) chanvo an chuh ve loh nan hmalak ni rawh se.

7. CUET, NEET leh All India Competitive Exam-ah Mizo zirlaite'n Exam centre chungchângah harsatna an tawh thin avângin, Mizoram-ah CBT Exam Centre dah belh a nih theihna turin hmalak ni rawh se.

8. Mizoram luhka hmun hrang hrangah mi tupawh ILP check an nih theih nan, MZP in hma la rawh se.

9. Zofate kan inpumkhat leh zual theih nan, Sikul zirlaibu-ah mizo hnam hrang hrangte chanchin telh a nih theih nan, MZP in hma la rawh se.

10. Zirlaibu-ah Mizo tawng dik tak hman anih theih nan, a tul angin hmalak ni rawh se.

11. Mizo hming hawha hnamdang sumdawn tirte na taka hremna dan Sawrkarin siam se, a ṭul anga dam chhuah ṭhin ni rawh se.

Meeting chuan, Tlabung khua chu hmanlai aṭanga tun thlengin Mizote khua a ni tih an tarlang a, Tlabung chu Chakma-te khaw hlun leh an lo luahlum tawh ṭhin anga sawi awm chu MZP chuan a pawmlo a, thangtharte rilrua history dik lo tuh tumna leh Mizoram mipui zahlohna ah a ngai a. Mizo Lalte'n an ram leh an ram luah chinte an humhalh nasat em avangin, eng ti kawng mahin Tlabung chu Chakmate khua a ni thei ngai lo a ni.

Meeting chuan tun hnaia Mizo hnam dan, The Mizo Marriage & Inheritance of Property Act, 2026 Supreme Court hial a khing duh tu Pi Meriam L. Hrangchal, Mizo Nu ni thin, hnamdang pasal nei ta chu a dem takzet a. Kum 2015 atang khan MZP chuan hnamdang nupui pasal neilo tura inzirtirna alo hmang tawh thin a, Kum 2023 MLA election dawnah pawh Political party tin te hnamdang pasal nei ticket pelo turin alo ngen tawh a, tuna Supreme Court-a khingtu hi Political party pakhatin MZP te ngenna zahlo in ticket an pek luih avangin Aizawl khawchhungah kawngzawh pawh MZP hian alo buatsaih tawh a ni. Hnamdang pasal neite chungchangah hian MZP chu a ngaihdan ala ngai reng a, Political party hrang hrangte pawh heng mite hi eng inthlanah pawh theh chhuaklo turin a ngen nawn leh a ni.

MZP-IN EX. MLA NIHAR KANTI CHAKMA HRIATTIR LEHKHA PE

MZP-IN EX. MLA NIHAR KANTI CHAKMA HRIATTIR LEHKHA PE

><}}> Dr. John, 26.8.26

MZP Hqrs: Lunglei chuan, Ex. MLA Nihar Kanti Chakma chu lehkha thawnin, thu belhchian dawl lo a vawrh darh avanga Mizo mipuite hnena ngaihdam dil turin an hriattir.

 

Nihar Kanti Chakma lehkha an thawnah Mizo Zirlai Pawl Headquarters:Lunglei chuan Ni 15 August, 2026 (Inrinni) khan NK Chakma chuan ‘Borgang Times’a ‘Historical Clarifications on Chakma Origin & Political History in Mizoram’ tih thu a ziakah Tlabung chu Chakma-te khaw hlun thin ti-a a sawi bakah Lushai Hills-a Tlabung rin luh a nih hma zawng chuan Chittagong Hill Tracts-a bet thin, Chakma-te ram tiin a tarlang niin an sawi a, hei hi MZP chuan pawi an tih thu sawiin thu belhchian dawl lo hmanga thu a vawrh darh avangin NK Chakma chu ‘Mizo mipuite’ hnenah ngaihdam dil turin an hriattir a ni.

 

MZP Hqrs Lunglei chuan tun chinah Mizoram history dik lo hmanga hnam leh hnam inkara buaina thlen thei thu theh darh tawh lo turin Nihar Kanti Chakma chu an hriattir nghal bawk a ni.

SUPREME COURT-IN PI MERIAM L. HRANGCHAL CHU HIGH COURT-A KAL HMASA TURIN A TI

SUPREME COURT-IN PI MERIAM L. HRANGCHAL CHU HIGH COURT-A KAL HMASA TURIN A TI

><}]> Dr. John, 25.8.26

Supreme Court chuan, Nimin August 24, 2026 khan, Mizo inneihna leh roluah dan siamthatna (amendments) 2026 chungchanga lungawih lohna avanga Pi Meriam L. Hrangchal-in a khinna chungchangah, Supreme Court chuan, Pi Meriam chu Gauhati High Court, Aizawl Bench-ah kal turin a ti.

 

Chief Justice Surya Kant leh Justice Joymalya Bagchi te leh Justice V. Mohana te telna bench chuan, Petitioner Meriam L. Hrangchal aiawhtu counsel chu a client chu Delhi-ah kal buai kher ngai lovin, a chenna ngeiah High Court a awm a, chutah chuan kal hmasa turin a hrilh a ni.

 

Pi Meriam hian hian, The Mizo Marriage and Inheritance of Property (Amendment) Act, 2026 siamthatna (amendments) te hi India Constitution kalh a ni, tiin a khing. He dan thar hian Mizo hmeichhe, Mizo ni lo mipa pasala neite chu dik lo takin a thliar hrang a, an fate dikna leh chanvo pawh a laksak a ni tiin, thiah a dil a ni.

 

He dan thar hian, hnam dan kum 2014-a siam Mizo Marriage and Inheritance of Property Act chu a rawn thuamchak thar a. He dan siamthatna-ah hian kawppui pakhat aia tam nei, Mizo leh Mizo ni lo inneihna (inter-community marriage) leh hmeichhe ten an neihte (property rights) chungchangah thil thar leh danglamna-te a siam a ni.

 

Pi Lalsangliani Colney pawhin May 8, 2026 khan Supreme Court-ah hian, Mizo Hnam dan thar a khinna hi a lo thehluh ve tawh bawk a, Diary No. 28435/2026 a register a ni a.  Siam that tur neuh neuh (defect) a awm avangin ngaihtuah tura chhawp chhuah a la ni lo.

 

SOURCE- www.jclalnunsanga.in

 

EIRUK THUBUAI-AH MIZORAM DP&AR SECRETARY, PU UDIT PRAKASH RAI CHU DELHI-AH MAN A NI

><}}> Dr. John, 19.8.26

Delhi-a AAP in thuneihna an chan laia Delhi Jal Board-a eirukna leh Tender chhuah dan dik lo thubuai-ah Delhi Police Anti-Corruption Branch-in Nimin August 18 khan mi 6 an man a, an man zingah hian Delhi Water Minister hlui Satyendar Jain leh Delhi Jal Board CEO hlui, tuna Mizoram DP&AR Secretary ni lai Pu Udit Prakash Rai-te pawh an tel a ni.

 

Anti-Corruption Branch chuan, an chhui chianna atangin Delhi Jal Board CEO hlui Udit Prakash Rai hian amah leh a chhungte Bank Account kaltlangin thamna Rs. vbch. 1.52 a la tih finfiah a nih thu an sawi a. He thamna sum a lak hmang hian bungraw khawih chet theih loh (immovable property) a lei tih an sawi a ni.

 

Anti-Corruption Branch-in Delhi Jal Board-a eirukna leh Tender chhuah dan dik lo thubuaia an mante hi - Delhi Water Minister hlui Satyendar Jain leh Delhi Jal Board CEO hlui Udit Prakash Rai bakah Delhi Jal Board Contractual Consultant hlui Ankit Srivastava; M/s AN Enterprises neitu Nagendra Yadav; Euroteck Environment Pvt Ltd. neitu Raja Kumar Kurra leh M/s Srijanhar neitu Pankaj Verma-te an ni.

Chief Minister Pu Lalduhoma’n Pu K. Sapdanga hnen atanga DP&AR a laksak hnu lawk khan, Commissioner & Secretary of Cooperation & Disaster Management & Rehabilitation hna chelh mek Pu Udit Prakash Rai chu, DP&AR Secretary nikawp turin a ruat nghal a. Hei hi, mipui mak tih a hlawh tawh a nih kha. A chhan chu, Pu Udit Prakash Rai hi case engemaw zat a neih mek avangin July 2023 khan The Ministry of Home Affairs pawhin alo suspend tawh nghe nghe a ni.

MIZORAM SORKAR-A COUNCIL OF MINISTERS TEN MEETING NEI

MIZORAM SORKAR-A COUNCIL OF MINISTERS TEN MEETING NEI

><}}> Dr. John, 18.8.26

Vawiin khan Chief Minister Pu Lalduhoma kaihhruaiin Council of Ministers te chu Cabinet Room, Chief Minister Office-ah an thukhawm a. An thu pawmte chu hengte hi an ni. 

1. Proposal for revision of prerequisite conditions for Provincialisation of Schools and related matters - School Edn.

Sawifiahna: School provincialise-na dan hi tih-awlsam a, school tam zawk provincialise an nih theih nan Rules ennawn ni se. Sum leh pai senso ngai tur zat lo zirchian ni bawk se. Council of Ministers meeting neih leh hunah ngaihtuah leh a ni ang.

Additional Agenda an pawm te:

2. Proposal for approval of the Mizoram Visksit Bharat: Guarantee for Rozgar and Ajeevika Mission (Gramin) [VB: GRAMG] Grievance Redressal Rules, 2026 - RD & A

3. Proposal for approval of the Mizoram Visksit Bharat: Guarantee for Rozgar and Ajeevika Mission (Gramin) Fund Rules, 2026 - RD & A3. Proposal for approval of the Mizoram Visksit Bharat: Guarantee for Rozgar and Ajeevika Mission (Gramin) VB: GRAMG State Gramin Rozgar Guarantee (State Council) Rules, 2026 - RD & A

4. Proposal for approval of the Mizoram Visksit Bharat: Guarantee for Rozgar and Ajeevika Mission (Gramin) (Compensation for Delay in Payment of Wages) Rules, 2026 - RD & A. 

5. Proposal for approval of the Mizoram Visksit Bharat: Guarantee for Rozgar and Ajeevika Mission (Gramin) (Payment of Unemployment Allowance) Rules, 2026

6. Proposal for the Mizoram Shops and Establishments (Regulation of Employment and Conditions of Service) (Amendment) Bill, 2026, as an amendment to the Mizoram Shops and Establishments (Regulation of Employment and Conditions of Service) Act, 2010 - LESDE

7. Draft the Mizoram Medical Council (Amendment) Bill, 2026 - H&FW

8. Draft the Mizoram State Medical Council (Second Amendment) Rules, 2026 - H&FW

9. Mizoram Development Finance Corporation din.

Sawifiahna: Manifesto-a Development Bank siam tur tihhlawhtlinna a ni a. Sorkar Flagship Scheme Bana Kaih hnuaia loan latute leh entrepreneur ten awlsam zawka loan an lak theihna tur niin, Sorkar thuneihna hnuaia kal lo va Independent Body anga kalpui tur a ni.

Interim Committee din phawt tur a ni a, chu Committee chuan Mizoram Development Finance Corporation a din theih nana thil tulte a rawn chhawp chhuak leh ang.

BREAKING NEWS *MIZO ZINGA INFIAMNA CHAWIMAWINA SANG DAWNG HMASA BER LALREMSIAMI*

BREAKING NEWS

*MIZO ZINGA INFIAMNA CHAWIMAWINA SANG DAWNG HMASA BER LALREMSIAMI*

><}}> Dr. John, 18.8.26

Ministry of Youth Affairs & Sports chuan vawiin khan National Sports Awards 2025 dawng tur te a tichhuak a, chawimawina sang ber dawt Arjuna Award dawng tur zingah Mizo nula hi a tel a ni.

 

Mizo zinga India rama Infiammi chawimawina sang Arjuna Award dawng thei hmasa ber tur chu Hockey khel thiam Lalremsiami Hmar a ni ta. Mizo nih a tinuam em em e.  Tunah hian Lalremsiami Hmar chu Arjuna Award 2025 dawng tura thlan a ni ta a, ava ropui em, Ram pum huapa chawimawi a phu e.

 He Award hian tangkapui bakah lawmman sumfai Rs. 15,00,000 (Nuai 15) a keng tel ṭhin a ni. India ramah infiammite tan Major Dhyan Chand Khel Ratna Award chu award ropui ber leh sang ber a ni a, a pahnihna chu Arjuna Award hi a ni.

Arjuna Award bik hi Kum 1961 atanga pek tan a ni a. Kum 1961-2025 chhungin, Mimal 984 leh Team 1, hnenah pek tawh niin, Arjuna Award hi 985 pek tawh a ni.

 

Mizo footballer ropui Pu Jeje Lalpekhlua kha a inkhelh lai khan Arjuna Award dawng thei turin vawi thum lai a hming a lang (nominated) a, mahse, a dawng ta lo a ni. Ani pawh khan han dawng thei se kan lo tih em em kha a nia.

 

Lalremsiami Hmar hi India rama infiammi chawimawina sang Arjuna Award 2025 dawng tura thlan a ni hi, Zofate leh Mizoram mipuiin kan lawmpuiin kan chhuang em em a ni.

 

Lawmpuina leh Duhsakna sangber kan hlan e.

PROF. LALTLUANGLIANA KHIANGTE-IN “PROF. LALTLUANGLIANA KHIANGTE AWARD” ATAN MZU-AH RS. 4 LAKH HLAN

PROF. LALTLUANGLIANA KHIANGTE-IN “PROF. LALTLUANGLIANA KHIANGTE AWARD” ATAN MZU-AH RS. 4 LAKH HLAN

><}}> Dr. John, 14.8.26

Nimin, August 13, 2026 khan, Prof. Laltluangliana Khiangte chuan, Rs. 400,000/- chu 'Prof. Laltluangliana Khiangte Award' fund atana hman turin Dr. Zoramdinthara, Head, Department of Mizo, Mizoram University hnenah a hlan.

 

Dr. Zoramdinthara, Department of Mizo aiawha cheque dawngtu chuan department in sum tam tham tak a dawn chu lawmawm a tih thu a sawi a. He Award hian zirlai te a ti phur nasa dawn a, inelna thianghlim leh dik tak a siam ngei a rin thu a sawi bawk.

 

Fund siam chhan chungchang sawiin, Prof. Laltluangliana Khiangte chuan, “He award hi Mizo tawng leh thu leh hla lama zirna tha zawk beiseina tihpun nan, zirlaite zirna sang zawk nei tura fuih nan, leh zirlaite inkara inelna thianghlim siam nana siam a ni,” tih a sawi bawk a ni.

 

Prof. Laltluangliana Khiangte hi North-Eastern Hill University (NEHU)-a Mizo Department dintu bulpui pakhat a ni. Kum 1997 khan M.A. (Mizo) zirna hawn a nih khan Guest Lecturer atan a lut a. Kum 1999 khan Reader ah a kaisang a, Mizo Department Head hmasa ber a ni bawk. Kum sawmli dawn lai Higher Education Institution hrang hranga a thawh hnuah, Senior Professor leh Dean, School of Humanities and Languages niin June 2026 khan a pension ta a ni.

 

𝑨𝒘𝒂𝒓𝒅 𝒑𝒆𝒌 𝒅𝒂𝒏 𝒕𝒖𝒓:

Mizoram University-a M.A. (Mizo) zir zo tawh, M.A. (Mizo) final exam-a mark hmu sang ber te hnenah pek a ni ang. Mark hmu sang ber pakhat aia tam an awm chuan award hi insem rualin an dawng ang. Award hi a bul sum (principal fund) atanga a pungkhawm atanga pek tur a ni.

FCRA AMENDMENT BILL 2026 CHU JOINT PARLIAMENTARY COMMITTEE NGAIHTUAH TURIN DAH

FCRA AMENDMENT BILL 2026 CHU JOINT PARLIAMENTARY COMMITTEE NGAIHTUAH TURIN DAH

><}}> Dr. John, 12.8.26

Joint Parliamentary Committee ngaihtuah tura Foreign Contribution (Regulation) Amendment Bill, 2026 dah rawtna Motion chu vawiin, August 12 khan Union Minister of State for Home Affairs, Nityanand Rai-an House-ah a pu lut a ni.

 

Ruahman dan chuan Foreign Contribution (Regulation) Amendment Bill, 2026 zirchiangtu tur Joint Parliamentary Committee-ah hian member 31 awm tura ruahman a ni a, Lok Sabha atangin member 21 leh Rajya Sabha atangin member 10 ruat tur a ni a. Joint Parliamentary Committee chu Parliament thlasik thutkhawm neih tur chawlhkar hmasa ber tawp hmain an zirchianna Report theh lut hman tura beisei a ni.

MZP-IN MPSC SIAMTHAT HNATLANG TITAWP

MZP-IN MPSC SIAMTHAT HNATLANG TITAWP

><}}> Dr. John, 12.8.26

Vawiin August ni 12, 2026(Nilaini) chawhnu dar 1:00 khan Chief Secretary Conference Room-ah, DP&AR Secretary Pu Udit Prakash Rai kaihhruaina-in inkawmhona neih a ni a, he hunah hian MZP hruaitute, MPSC-a harsatna tawk zirlai aiawhte leh MPSC thuneitute an tel a ni.

 

He inkawmhona hunah hian Sorkar aiawh, DP&AR Secretary chuan, Mizoram Sorkar-in MPSC Reform Committee a din tur thu sawiin, Chief Minister hnenah an thlen tawh thu a sawi a.

 

MZP President Dr. C. Lalremruata chuan, MZP hruaitute leh MPSC-a harsatna tawk zirlaiten, MPSC-a buaina hrang hrang chungchang ni 2 chhung Peaceful Protest neih a nih hnu leh ni 3 chhung zet MPSC Pisa kai tur dan a nih hnuah, Sorkar aiawh thuneitute hova meeting neih a ni ta hi lawmawm an ti hle, a ti a.

 

MPSC Reform Committee dinna Order chu, Vawiin August 12, 2026, Dar 5:30 PM khan Sorkar-in a tihchhuah tak avangin, MZP ten MPSC Siamthat Hnatlang chu an ti tawp ta a ni.

 

MZP President chuan, he MPSC Reform Committee hian, MZP-in tuna an buaina hrang hrang an tarlan te hi felfai taka chinfel a nih theih nan, theihtawp chhuah theuh turin Committee-a tel zawng zawngte an ngen bawk, a ni.

FCRA DUH LOH LANTIRNA PEACEFUL RALLY AIZAWL-AH NEI

FCRA DUH LOH LANTIRNA PEACEFUL RALLY AIZAWL-AH NEI

><}}> Dr.  John, 11.8.26

Kohhran pakua intelkhawmna Council of Churches in Mizoram (CCM) bultumin vawiin, August 11, 2026 khan, Aizawl-ah, Foreign Contribution (Regulation) Act (FCRA) Amendment Bill, 2026 duh loh lantir nan kawngzawh a ni a; FCRA Amendment Bill 2026 chu a nih ang anga pawm chi-ah an ngaih loh thu in an aurual.

 

CCM bultum hian vawiin chawhma dar 10:30 khan Zarkawt kawn leh Sikulpuikawn atangin kawng zawh a ni a, mi thahnem tak kawng zawhnaah hian telin, Vanapa Hall kawtah an intawkkhawm a, hun tawite an hmang a ni.

 

Vanapa Hall kawta hun hmannaah hian CCM President Rev. Dr. R. Lalbiakliana chuan,`India sorkar chuan FCRA Amendment Bill hi dik leh langtlang taka ram himna tura dan siam a nih thu leh kristiante tinzawna siam a nih loh thu sawi mah se, ngun taka enin he dan thar hnuaiah hian dan hlauhawm tak, kristiante leh minority-te awh ngei ngeina tur a awm a ni, a ti.

 

Rev. Dr. R. Lalbiakliana chuan FCRA Amendment Bill 2026 hi a nih ang anga pass a nih chuan kohhran leh NGO-te bungrua leh hmunhmate chu chhuhsak theih an nih dawn thu a sawi a; he dan thar ruahman hian India Danpui Article 300Aen chuan mitin hnenah bungrua neih leh kawl theihna pek a ni a, mah se, FCRA Amendment Bill hian chu chu a kalh tlat avangin an dodal tih a sawi bawk.

 

Vanapa Hall kawta inkhawm tawi hi CCM Treasurer Upa R. Lalmalsawma’n a kaihruai a, pungkhawmte hian tawngtairualna hunte an hmang bawk a ni.

CID Report-in a sawidan chuan, Peacefull Rally-a tel hi mi 2000 an chuang niin an sawi.

LALSAVUNGA PARK ENKAWL DAN-AH HLIMEN KHAWTLANG LUNGAWI LO, A ENKAWLTU CONTRACTOR AUGUST 2026 THLA RAL HMAA TIHTAWP PHUT

LALSAVUNGA PARK ENKAWL DAN-AH HLIMEN KHAWTLANG LUNGAWI LO, A ENKAWLTU CONTRACTOR AUGUST 2026 THLA RAL HMAA TIHTAWP PHUT

><}}> Dr. John, 11.8.26

Hlimen Local Council leh Tlawmngai pawl hrang hrang YMA, MHIP, MUP chuan an veng chhunga Rural Development & Administration Department enkawl Lalsavunga Park chu enkawl a nih danah duhkhawp lohna tam tak an nei tih an sawi a.

 

Rural Development & Administration Department leh a enkawltu Pu Oasis Lalruattluanga ten Lalsavunga Park enkawl dan tur Deed of Agreement an siam angin enkawl a ni lo nasa a, Contractor hian kum thum a enkawl chhungin kumtin Department hnenah Rs. nuai 20 bakah kum tin a pung zaa 6.5-a pe tur a nih laiin, RTI chhanna an dawn atangin kum 1-na leh kum 3-naah a sum pek tur hi a pe kim lo a, a sum pek tur hi a pe kim lo a nih chuan a Contract chu tihtawp theih a nih laiin hmalak a ni lo tih an sawi.

 Park vawn fai bakah bungrua enkawl leh kum khat dana rawng hnawih te, Park chhung kumtin vawihnih samfai tur chu hmalak mumal a ni lo va, bungrua chhia pawh Department ruahmanna anga siamtha thin tur tih a nih laiin hmalakna engmah a awm lo niin an sawi a. Lalsavunga Park chu ram chhung leh ram pawn atanga khualzinten an tlawh nasat a nih avangin Mizoram hmel lanna pakhat a ni a.

 Hetianga rawih lam pan zawng leh enkawl mumal lova a awm hi Hlimen khawtlang chuan pawi an ti tak zet tih sawiin, Lalsavunga park enkawltu Pu Oasis Lalruattluanga chu August thla kal mek ral hma ngeiin a contract tihtawp sak turin Rural Development & Administration Department hotute an ngen a. An ngenna chu tihhlawhtlin a nih loh chuan Lalsavunga Park chu tlawh theih loh turin tiam chin awm lovin an dang dawn tih an sawi.

Hlimen Local Council leh All NGO (YMA, MHIP leh MUP chuan thuchhuah siamin, an veng chhunga Directorate of Local Administration, Rural Development & Administration Department hnuaia awm mek Lalsavunga Park enkawl a nih danah, duhkhawp lohna tam tak an nei tih tarlangin, "Directorate of Local Administration, Rural Development & Administration Department leh Pu Oasis Lalruattluanga (contractor) ten a enkawl dan tura deed of agreement an siam anga enkawl a nih lohna point hrang hrang kan han tarlang e," an ti.

 HLIMEN LC LEH ALL NGO TARLANTE:

 1. Contractor hian kum thum a enkawl chhungin kumtin department hnena sum a chhunluh tur zat cheng nuai 20 bakah kumtin 6.5% compound interest pung tura tih hi RTI chhanna kan dawn angin kum 1-na leh kum 3-naah a pe kim lo a, hei hi agreement bawhchhiatna a nih bakah vawikhat chauh pawh a pe kim lo a níh chuan LAD-in a cancel sak theih thu agreement ah ziah a nih laiin, a kum 3-na (August 2025-August 2026) ah hian Rs. 5,67,122/- chauh chhunluh a ni chungin department hian hmalakna an nei lo a ni.

 2. Department leh contractor-te deed of agreement point no. 5 leh no. 9-a a inziah angin park vawn fai kawngah leh department bungrua (property) tha taka enkawl bakah, park chhung kumtin vawihnih sam fai, park infrastructure (building, rest house, cabin, R/Wall, gate) kum khat dana rawnghnawih leh a tul anga siamthat tura tih a nih angin, park vawn fai kawngah leh chei that hnate hi thawh mumal a ni lo. He agreement-a point pahnih te hian heng hi tih a nih loh chuan contract cancel thlenga action lak theih tih ziak a nih angin, department hian hma lakna an nei lo a ni.

 3. Department leh contractor-te deed of agreement point no. 11-naah park bungrua engpawh contract hun chhunga chhia a awm a nih chuan contractor hian department ruahmanna anga siamtha thin tur tih a nih laiin, bridge leh construction work dangte hi enkawl mumal lohin a awm a, hei hi park hmangtute tan a him loh bakah, nunna hial chan theihna thil a ni.

 4. Department leh contractor-te deed of agreement point No. 15 chuan agreement chang engemaw ber pawh bawhchhiat a nih chuan, LAD-in contractor hi hriattirna (notice) pe in insawifiah turin a ti ang a, a insawifiahna pawm a nih loh chuan LAD-in a ti tawp thei ang tih a nih laiin, he agreement-a chang hrang hrang bawhchhiat a ni chung pawhin department atangin engmah hmalakna a awm lo a ni.

 Hlimen LC leh All NGO-te chuan, "Heng a chunga point hrang hrang bawhchhiatnate avang leh Lalsavunga Park hi ramchhung leh ram pawn atanga tourist tamtakin an tlawh nasat tak a nih avangin Mizoram hmel lanna pakhat a ni. Hetianga rawih lam pan zawng leh enkawl that ni loa a awm hi Hlimen khawtlang chuan pawi kan ti. Chuvangin Lalsavunga park enkawltu hi department hian August 2026 ral hma in a contract hi a cancel lo a nih chuan, Lalsavunga Park hi Hllimen Local Council leh All NGO-te chuan tlawh theih loh turin tiam chin awm lo in kan dang dawn," an ti.

MZP-IN MPSC-A THAWKTUTE PISA KAI TUR AN DANG CHHUNZAWM, NAKTUK-AH PAWH DAN CHHUNZAWM TUM

MZP-IN MPSC-A THAWKTUTE PISA KAI TUR AN DANG CHHUNZAWM, NAKTUK-AH PAWH DAN CHHUNZAWM TUM

><}}> Dr. John, 11.8.26

MZP in MPSC siamthat hnatlang an neih mekah nimin atang khan MPSC-a thawktute pisa kai tur hi an dang tan a, hei hi vawiinah pawh chhunzawmin tukin dar 8 vel atang khan zirlaite chu MPSC pisa tualh an pungkhawm tan a, MPSC-a thawktute zingah pisa kai luih tum an awm loh avangin buaina chhuak a awm lo a, chawhnu dar 1:30 vel khan an tin a ni.

 

MZP hruaitute chuan, an thilphut chungchangah MPSC leh Sorkar thuneitute atanga inbiakna engmah a la awm loh avangin MPSC-a thawktute pisa kai tur an dan chu naktukah pawh chhunzawm a ni dawn tih an sawi a, zing dar 8-ah MPSC Pisa tualah zirlai leh thalai hnazawng mekte kal vek turin an sawm a ni.

NGAIZEL PHEI KAWNG KHAR/BLOCK LEH RIH DAWN

NGAIZEL PHEI KAWNG KHAR/BLOCK LEH RIH DAWN

><}}> Dr. John, 11.8.26

AIZAWL SP THUCHHUAH

Mizoram State Sorkar Notification No.B.12021/10/04-TRP Dt.22.8.2008 leh Section 115 of MV Act, 1988-in thuneihna a pek ang leh Sub-Divisional Officer, PWD, Aizawl Road South Sub-Division-IV ngenna angin Pu C. Vanlalvena, Superintendent of Police, Traffic, Aizawl chuan a hnuaia mi ang hian thupek a chhuah.

 

PWD, Aizawl Road South Sub-Division-IV chuan Kulikawn (Ngaizel) phei a lung tla thenfai hna an thawk dawn a, hnathawh chhungin, August 12, 2026 (wed) atanga (zing dar 10 am- tlai dar 5:00 pm chhung) Hna thawh zawh hma chu, helai kawng hi khar/block a ni dawn, tih mipuite kan inhriattir e.