‘FCRA BILL 2026 LEH INDIA RAMA KRISTIAN-TE TIHDUHDAHNA HLUAR ZEL DO NAN BLACK DAY’ HMANG DAWN

 ‘FCRA BILL 2026 LEH INDIA RAMA KRISTIAN-TE TIHDUHDAHNA HLUAR ZEL DO NAN BLACK DAY’ HMANG DAWN

><}}> Dr. John, 17.07.26

Mizoram Pradesh Congress Committee chuan, July 21, 2026 chhun dar 12 khian, Mizoram hmun hrang hrangah Foreign Contribution Regulation (Amendment) Bill (FCRA) leh India ram chhunga Kristian-te tihduhdahna hluar zel duhlohna lantir nan 'Black Day' an hmang dawn.

Nimin-a Chanchinthar lakhawmtute an kawmnaah, MPCC chuan, 'Black Day' hmang tur hian Kohhran hrang hrang-te pawh sawmna an pek tawh thu an sawi a, he hun hmanpui tur leh thlawpa telpui theuh turin Zoram mipuite ngenin an sawm bawk a ni. He FCRA Bill 2026 hi, Kristian-te tana tha lo leh him lo a nih avangin MPCC chuan BJP kaihhruai Sorkar-in Kristian-te nekchepna hmanrua atana Foreign Contribution (Regulation) Amendment Bill, 2026 a chhawpchhuah chu a tawp thlenga dodal an tum thu an sawi a ni.

MPCC chuan BJP kaihhruai Sorkar-in, Kristian-te nekchepna hmanrua atana FCRA Bill 2026 a chhawpchhuak chu tha lo an ti a. NGO leh Kristian pawl hrang hrang ten ram pawn lama Kristian Unau-te hnen atanga tanpuina pawisa an dawn thin-ah harsatna a siam phah nasa niin an sawi a ni.

BJP Sorkar hnu hian FCRA hnuaia license nei pawl 20,000 chuang chu an license tihtawp sak an lo ni tawh a. Heng zingah hian, Mizoram-a pawl thenkhat-te pawh an tel niin an sawi a. Tunah hian, Kohhran pakhat pawisa dawn tur pawh an hren sak mek thu an sawi bawk a ni.

March ni 31, 1976 atang khan, FCRA hi hman tan a ni a, 1984 khan Amendment siam a ni a, Foreign Fund te chu uluk zawka kalpui duhna avangin 2010 khan siam that leh a ni a. Kum 2020 khan BJP Sorkar chuan Amendment thar siam leh-in, NGO leh Kohhran-te Foreign Funding chu khirhkhan takin a kalpui ta a. Kristian-te chu Foreign Fund dawng hnem ber an nih avangin he dan hman tum hian Kristian- te a bitum riauvin a ngaih theih a ni, an ti bawk.

 

THU BELH-

India rama NGO leh Mimal ten Foreign ram atanga Tanpuina Pawisa an dawn hian, Sorkar-a chhunluh tur Tax leh Pawisa leng vel hi, a ram, state, khua leh mimal-in kan hlawkpui a, nun khawchhuah-phah nan leh dinhmun tha zawka inhlankai nan mi tam takin an hmang tangkai mek a. A bik takin, Kristian ten rawngbawlna changtlung zawk an neih theih phah a ni. Hetih laia BJP Sorkar-in FCRA chungchanga harsatna siam a, khauh zawka dan thar (amendment) siam a, khirhkhan taka khuahkhirhna dan a siam hi a tha lam zawng a ni hauh lo tih hi hriatchian bal a tha. Hun han kal deuh sela, Kristian te (leh Muslim, Budhist, etc. te pawh) tan harsatna lian zawk ala thleng ngei dawn a ni, tih hi a chiang hle a ni. Chuvangin, a mimal, chhungkua, khawtlang, NGO, Party leh Kohhran ang pawha nasa taka kan do hi a tul tak zet zet a ni. Kan harhchhuah tlai chuan, a pawi thui dawn a, tihdanglam leh thlak pawh a harsa tawh ang.