Lengpui Airport tan ram lak dan chungchangah inpuhmawhna leh
thu hnawk tam tak a awm a, ram neitu dik tak zinga compensation ram hralhna hmu
ve miah loin Rs 9 crore vel hmu tura a inngai tih hriat tur a awm leh tawh a.
Lengpui Airport ram lak dan aia huaisar zawk hi kan hma lawka thil thleng thei
a ni. Wyne Cole-a thawnthuah khan, "a muang apiang a muanawm chuang loh a
nia," tih ang deuh khan ram buai lo anga lang apiang hi a buai lo tihna a
ni lo. Sairang VC ram chhung, tunhma lama Chawilung ram, KOLABARI an tih bawk
chhunga sipai ram lak tum Infantry Brigade Key Location Plan chhungah hian a
tirah ram neitu 52:awm nia chhinchhiahah chuan ram neitu 148 vel zet an awm nia
hriat a ni
Vanglaini chanchinbu June 14&15, 2026 chhuakah khan Pu
HC Vanlalruata'n Sairang khaw ram chhunga Chawilung, Kolabari an tih bawk rama
mimal ram sipai tana lak tumna chungchanga Mizoram Assembly House-a Chief Minister
Pu Lalduhoma thu sawi March 6, 2026, 'Statement by Minister' hmanga Speaker
phalnaa a thu sawi chungchang kha mipuite hriat tur thil tam tak a inbilh tel
a. Mipuite lah kan ngawi deuh ṭhup mai si a. Hemi chungchang hi i han thual
nawn leh teh ang.
ENGTIK AṬANGA BUL INṬAN NGE?
July 11, 2014 ah tawh khan Aizawl District DC chuan
Administrative Commandant, Station Headquarters, Aizawl hnenah lehkha thawnin
Chawilung/Kolabari ram chu Mizoram Sawrkar pawmpuinain lak theih a nihna turin
"No Objection Certificate" a pe niin Chief Minister hian a sawi.
Ministry of Defence aṭanga phalna lak anih hnuah dan anga
ram lak (land acquisition) chungchang hi bawhzui ni se, tih chu Aizawl DC hian
a rawt nghal bawk tih chu Chief Minister hian a sawi.
ENGTIA ZAU NGE?
CM thu sawiin a tarlan danin Mizoram Sawrkarin No Objection
Certificate a pek dan chuan Chawilung/Kolabari ram Infantry Brigade Key
location Plan hi ram acre 570 a zau a ni. He lai ram hian buaina engmah a neih
loh thu pawh tarlan a ni tih hi CM hian a sawi bawk.
A sawi zel dan chuan August 6, 2014 ah Sairang Dinthar VCP
Pu RC Zoliana leh Pu Lalrinngheta VC Secretary te chuan ram neitu mi 52 ten an
remtihna (willingness certificate) chu ram neitute hming ziak (signature) nen
thehluh a ni a, Sub Deputy Commissioner, Aizawl District-in phek tinah a dik
ngei a ni tih a hriatpui (authenticate) vek bawk a ni. Hemi rual hian ram
sketch map pawh thil tel a ni.
Hetih laia ram neitu mi 52 te hi tun dinhmunah an la ni zel
em tih leh he ramah hian ram pass thlawk lut a awm em tih chu zawhna lian tak
leh chhui chian ngai tak a ni.
CM hian a sawi zel dan chuan 18.11.2014 Aizawl DC-in
Administrative Commandant hnenah bawk Billability Certificate a theh lut a,
vide F14011/212/2011DCA45 . He certificate hi Executive Engineer PWD Building
Division-in a certify a ni.
Dt. 7.9. 2019 ah Aizawl DC-in Administrative Commandant
hnenah ram lak (acquire) nan a "Approval in principle" pek anih theih
nan heng document te hi a theh lut a ( F14011/212/2019DCA9-35)
Hemi ni hian thil chi hrang paruk theh luh a ni.
PAKHATNA, Ram neitu mi 52 te hnen aṭanga No Objection
Certificate hi kum 2019-ah hian theh luh a ni. Rem zau zawng sketch map theh
luh a ni bawk. Tin, Special Secretary, Land Revenue & Settlement-in a pek
No Objection Certificate leh Deputy Commissioner,Aizawl-in No Objection
Certificate a pekte a thil tel bawk a. He No Objection Certificate-ah hian ram
chu politics te, dan aṭangte leh sakhua lam aṭanga thlirna aṭangtea a felfai
vek thu tarlan a ni. Tah hian No Objection Certificate pahnih pek a ni a,
pakhat chu Sawrkar pek a ni a, pakhat chu DC pek a ni.
Mizoram Sawrkarin ram leina rate a siam Notification a theh
lut tel bawk a. Ram neitu mi 52 te hnen aṭangin Land Title Certificate, Khasra
Number Certificate an tih bawk chu ram neitute hming, address, ram zau zawng
leh ram pass number te nen a theh lut bawk a. Environment & Forest
Clearance chungchang a theh lut bawk a. 14.9. 2006 a Joint Secretary, Ministry
of Environment and Forest-in notification a chhuah Defense Project te chu clearance
ngai zingah telh anih loh avangin Environment and Forest Clearance lak a ngaih
loh thu a tar lang a ni.
Ram neitu zawng zawng chu Periodic Patta nei thlap leh neitu
dik tak an nih thu te, Sawrkarah pawh chhiah an pek thlap thu pawh a tar lang a
ni.
Dt. 8.1.2021 ah DC chuan Station Commander hnenah heng thil
pali hi a theh lut leh a, pakhatna chu Willingness Certificate, hei hi chu ram
neitute aṭanga an lak kha a ni.
PAHNIHNA chu Land Tutle Certificate. Pathumna chu Land
Revenue & Settlement Department aṭanga No Objection Certificate, a hma pawh
khan an theh lut tawh a.an theh lut nawn leh a ni. F14011/212/2019DCA94-100.
CM sawi zel dan chuan, kum 2014-2021 inkarah hian he ram
lakna atan hian thil tam takte chu chinfel a lo ni tawh a . Sawrkar hmasain kut
a lo thlak tawhnaah hian thil fel lote a awm anih loh chuan keini tan pawh
chhunzawm loh theih loh a ni dawn a. Dan ang thlapa kalpui anih theihnan
Notification chhuah te, SIA exemption pek chi anih leh nih loh te, ram chu
Outright Purchase, a pulunga hralh ni lova - a hawha hawh, lease tura dual fel
te. Tin, chuh buaitu dang an awm leh awm lohte en fel te chu kan hmabak tur
niin a lang ta a ni. Sawrkar hmasaten an remtihpuinain Aizawl DC hian hma a la
chho zel ta mai niin a lang a. Keini hinah erawh chuan Sawrkar angin engmah
hriat leh kutthlak vawiin ni thleng hian kan la nei lova. Ka hnenah pawh
officialin engmah thlen a la ni lo. Sawrkar hmasa lamin thu neihna an pek angin
Aizawl DC hian a ṭul ang angin a lo ti chho mawp mawp mai a. Tin keini Sawrkar
tharah hian a hranin engmah hriattir kan la ni hrih lo a ni.
Hetiang hi thil awmzia anih avangin Sawrkar hmasaten an lo
kalpui tawhnaah hian thil fel lo a awm anih chuan zir chian a, chin fel a ngai
ang. Chutiang a ni lo anih erawh chuan dan ang thlapin kalpui a ngai dawn a ni.
Chu chu thil awmzia anih avangin engemaw tiin ṭul lo takah hian boruak nuam lo
deuh te kan siam leh te hi a hlauhawm ka ti. Thil awmdan hi Zoram mipuiten he
House kal tlang hian an hriat tha ka ti a. Thil lo tih tawh hi han sut leh chi
pawh a ni hlawm lova, a lo fel deuh vek tawh a. Dan anga a hmawr bawksak chiah
hi a lo ni ta niin a lang a. Tichuan, Aizawl DC pawh hian ṭul an tih hunah
Sawrkar hnenah an la rawn thlen chho mai turah ka ngai a. Chutianga an rawn
thlen chhoh hunah chuan a ṭul angin bawhzui a ni dawn a ni, CM chuan Assembly
House ah a sawi.
Sairang Chawilung/Kolabari ram neitute hi an rawn leng a,
Assembly House a CM sawi dan leh a taka thil awmdan chu a inpersan hle thung.
RAM NEITU AN PUNG
Assembly House-a sawi chhuahah chuan ram acre 570 chhunga
ram neitu 52 tih anih laiin tunah hian ram neitu 148 vel lai an awm tawh ngeia
hriat a ni a, hemi bakah pawh hian a la pun belh maithei niin an sawi bawk.
Hetiang hian ram acre 570 neitu 52:bakah ram neitu dang 90 chuang ( 148 - 52 =
96) an awm thar nia hriat a ni.
RAMLIANA RAM RI AN TAM
Ram pass neitu thar zingah hian mi 19 lai chu Ramliana ram
an ri nia hriat a ni. Ramliana nge nge a hming a pu zo mang e aw kan ti mai
dawn em ni.
RAM NEI KHAPNA
Special Secretary,Land Revenue & Settlement, Government
of Mizoram chuan 9th September,2019 khan Kolabari Area-ah hian ram pass siam
thar khapna thu a chhuah a. No.K.12011/55(B)/19- REV. A chunga ram pass 52 baka
pass 90 chuang nei tharte hi he khapna thu pek chhuah hma ami nge a hnu lama mi
ni ta ang ? Kum 2014 a ram lak tura hna bul ṭan tawh ni si a hnu kum 2019 a ram
pass siam khap (freeze) leh hnuhnawh hi eng nge a tum ni ta ang ? Nge hmun
danga an ram Pass te chu KOLABARI ram chhungah hian an rawn transfer em ni
zawk, eng vang khera helai hmuna thlawk lut ta nge ni ang ? An ram neihna
hmasate pawh hi Sawrkar hian chik takin chhui chiang vek ta law law mai teh se.
COURT-AH KAL AN AWM
Ram pass nei thar an pun avangin ram inbawhthuah a tam a,
District thu neitu lamin ram neitu 52:te hi ko khawmin an remruat dan ang anga
lungawi mai turin thlem titihin an bei nia hriat a ni a. Hetianga lungawi lo
hian Court ah an chungchang rel felsak turin an kal mek a ni.
RAM BUAI LO A BULAH A AWM
Tuna sipai ram lei tum mek acre 570 ai zau leh duhawm zawk
hi Chawilung khaw hlui ramah hian a awm. (Sairang piaha Chawilung khua hi ram
buai avangin Sairangah an hruaikhawm a, khaw lamah an kir leh tawh lo ).
ASSEMBLY ELECTION 2028
Mizoram Assembly election 2028-a lo awm turah hian Kolabari
a ram lak tumna hi a nihna ang ang hian kal tlangpui ni ta se, tuna Sawrkar lai
mek hian mipui ngaihah an insawi fihlim zo ang em ?
=14072026=
Huna Kawlvawm
0 comments :
Post a Comment