𝗣𝗥𝗘𝗦𝗦 𝗦𝗧𝗔𝗧𝗘𝗠𝗘𝗡𝗧 𝗢𝗙 𝗖𝗘𝗦𝗝 𝗢𝗡 𝗩𝗔𝗡𝗧𝗔𝗥𝗔, PART1

𝗣𝗥𝗘𝗦𝗦 𝗦𝗧𝗔𝗧𝗘𝗠𝗘𝗡𝗧 𝗢𝗙 𝗖𝗘𝗦𝗝 𝗢𝗡 𝗩𝗔𝗡𝗧𝗔𝗥𝗔, PART1

Centre for Environment & Social Justice (CESJ)

Email: cesjmizoram@gmail.com Website: cesjmizoram.org Ph.No.:7005945474

Regd. No.: MSR 1578 of 15.02.2023

PR No. CESJ-MZ/A1/2026/07 (PR). Dated: 30. March 2026.

𝗣𝗔𝗧𝗛𝗜𝗔𝗡 𝗠𝗜𝗡 𝗣𝗘𝗞- 𝗠𝗜𝗭𝗢𝗥𝗔𝗠 𝗛𝗜 𝗛𝗜𝗡𝗗𝗨 𝗚𝗨𝗥𝗨- 𝗕𝗔𝗕𝗔 𝗥𝗔𝗠𝗗𝗘𝗩 𝗖𝗢𝗠𝗣𝗔𝗡𝗬- 𝗣𝗔𝗧𝗔𝗡𝗝𝗔𝗟𝗜 𝗙𝗢𝗢𝗗 𝗟𝗧𝗗 𝗟𝗘𝗛 𝗔𝗗𝗔𝗡𝗜 𝗚𝗥𝗢𝗨𝗣 𝗛𝗡𝗘𝗡𝗔𝗛 𝗣𝗘𝗞 𝗔 𝗡𝗜 𝗧𝗔𝗪𝗛 𝗔- 𝗧𝗨𝗡𝗔𝗛  𝗠𝗜 𝗛𝗔𝗨𝗦𝗔 𝗧𝗔𝗪𝗡𝗧𝗔𝗪 𝗙𝗔𝗣𝗔 𝗜𝗡𝗔𝗪𝗠𝗟𝗘𝗠𝗡𝗔 (𝗧𝗢𝗬𝗦) 𝗔𝗧𝗔𝗡𝗔 𝗥𝗔𝗠𝗦𝗔 𝗛𝗠𝗔𝗡𝗚𝗧𝗨𝗜𝗡 𝗞𝗛𝗔𝗪𝗖𝗛𝗛𝗔𝗞 𝗥𝗔𝗠 𝗛𝗥𝗔𝗡𝗚 𝗛𝗥𝗔𝗡𝗚 𝗔𝗧𝗔𝗡𝗚𝗔 𝗗𝗔𝗡 𝗕𝗔𝗪𝗛𝗖𝗛𝗛𝗜𝗔𝗔 𝗥𝗔𝗠𝗦𝗔 𝗔 𝗧𝗔𝗪𝗟𝗛𝗥𝗨K 𝗞𝗔𝗟𝗞𝗔𝗪𝗡𝗚𝗔 𝗛𝗠𝗔𝗡 𝗔 𝗧𝗨𝗠 𝗠𝗘𝗞-𝗞𝗔𝗡 𝗥𝗔𝗠 𝗛𝗥𝗨𝗔𝗜𝗧𝗨𝗧𝗘 𝗔𝗡 𝗟𝗢 𝗟𝗔𝗪𝗠 𝗛𝗨𝗥𝗛 𝗛𝗜 𝗞𝗔𝗡 𝗗𝗨𝗛 𝗟𝗢- 𝗞𝗔𝗡 𝗥𝗔𝗠 𝗡𝗘𝗜𝗛 𝗖𝗛𝗛𝗨𝗡 𝗛𝗜 𝗛𝗥𝗔𝗟𝗛 𝗞𝗔𝗡 𝗣𝗛𝗔𝗟 𝗧𝗔𝗪𝗛 𝗟𝗢

March Ni 28, Inrinni khan Mizoram sawrkara Rural Development & Administration, Disaster Management & Rehabilitation leh Public Health Engineering changtu Minister, Prof. Lalnilawma chuan heti hian a Facebook lamah a ziak a.

“Nimin khan Vantara @vantara atangin Greens Zoological, Rescue & Rehabilitation Centre (GZRRC) Director Pu Dr. Brij Kishor Gupta hovin ka office-ah Mizoram leilung leh boruak mil tura hmalakna tur ruahmanna (action plan) Nature reserve, afforestation, tui hna tih pun leh community reserve chungchang kan sawiho a, Pu Jonathan Lalremruata @jonanz OSD to CM in min tawiawm a ka lawm hle a ni.”

Vantara hi India ram mi hausa tawntaw, kan CM pawhin an fapa inneihna a chartered flight ngata a zuk kal phahna - Reliance Industries Limited(RIL) hotupa Mukesh Ambani fapa, Anant Ambani private zoo (Wildlife Rescue & Conservation Centre), Gujarat State a Reliance Oil Refinery – Jamnagar bul maia awm ani a. He hmun hian a thalo zawngin hming hliauna a ngah hle. A bikin ramsa, sava danglam leh vang tak tak 'exotic species' an tih mai khawvel hmun hrang hrang atanga dan engmah pawisa lova an mimal ennawm huang a dah tura an lakkhawm thin vang ani pakhat a. Hei hian wildlife conservation lama mi thiam leh thahnemngaite dodal leh sawisel pawh a tawk/hlawh nasa hle a. Court lamah te pawh khin anni hial a. Amaherawh chu Ambani chhungkua hi Asia rama mi hausa ber, politics, media leh bureaucracy ah pawh phungbawm ngah tak mai an ni a.  An sum leh pai thiltitheihna hmachhuanin India ram sawrkar thuneitute policy tam tak pawh hi an company hlawkna turin an her danglam thei hial thin a ni. Chung chu India rama natural gas reserve lian ber nia sawi Krishna-Godavari Basin lama gas lakchhuahna tura scam lian tak awm nia lang leh sawrkar agency ngei, ONGC gas khur ami Reliance lamin an lo divert kuala puhna thubuai lian tak an neih dante; journalist huaisen Paranjoy Guha Thakurta thuziak leh midang thu ziakah te chiang taka hmuh theihin a awm a ni.

A bikin Ambani leh Adani te hi Central lama hotu lian leh Prime Minister nen ngei pawh inhne hnai tak an ni a. ‘An tan hian thil sual leh diklo hi a tih ve theih meuh lo ani ti ila’ chu chuan an dinhmun a sawi fiah ber awm e. ‘Adani Company chuan chhim lama hydro power project 500 MW siamna tur tender mumal pawh a awm em ni’ tia mipuiin kan zawh laiin an lo hmu fel der bawk a. Australia ramah chuan kum 2017 bawr vel khan Adani Company coal business project in environmental laws nasa taka bawhchhia a an tuipuite tibawlhhlawh a puh anih vangin sum tam tak court in anlo chawitir tawh nghe nghe a. Tunah hian US lamah pawh India rama solar energy contract lian ho hmuh an duh luat vanga thamna vaibelchhe 2000 chuang hu sawrkar official leh thuineitute pe a puhna corruption case an nei mek bawk a ni.

Chutih laia kan state sawrkar a minister chhuanvawr leh mithiam a ngaih Prof. Nitea te meuhin hetia Mizoramin kan nungcha leh ramngawte humhalhna tura an thurawn la a – Reliance Foundation enkawl Vantara thawhpui an han tum ta mai hi mi tam tak a barakhaih hle a.  He lam kaihhnawih department EF &CC lam hotute hian Vantara hi an hrechiang a, conservation lam chungchanga thawhpui tlak loh ah an ngaih vangin a department chan nena inrem luttuk lo minister nen hian suihrem tumin OSD to CM thiltithei tak hian hma ala kual ta zawk ni ang tih hi zawhna lian tak a ni.

He Vantara bawk hi nikum lam khan Arunachal Pradesh leh Assam vela sai (elephant) engemaw zat an private zoo a dah tura phur chhuakin sawrkara thuneitu thenkhatte nen dan pawisa miahlo a an thawh ho thu ram dang environmentalist thenkhatin an tarlang nasa hle a ni.

Aizawl Zoo dinhmun thalo leh funding indaihlohna nasa tak karah dan loa ramsa tawlh ruk 'exotic species' ramsa an man khawm te dah lailawk nan leh enkawl zui nan an hmang lo thei lo a. Heng ramsa man khawm sa Aizawl Zoo a dah te hi mak tak taka bo ta hmiah thleng fo te kha Vantara lamah hian an lo zuk thleng thla daih ani maw lo maw tih thlengin CESJ chuan ngahdan kan lo nei daih tawh a. RTI dan hmangin kan lo zawt tawh a, FIR pawh kan lo theh lut tawh a ni.

A tawp berah chuan heng company lian pui pui hi kan ramah an la rawn lut chho dawn chauh a. Kan ram ngaw, nungcha leh mineral resources awm te hi a ram leilung fate tawrh theihna tur ngaihtuah hauh loin, an hlawkna leh pum puarna ringawt zawnga sumdawnga rawn khawih chhiat hi an pawisa dawn lo tih hi kan sawrkar leh mipui nawlpui hian kan hriat a tul takzet a ni. Hetiang hi Central India tribal/adivasi te khawsakna hmun leh ramngawte an lo nghaisak tawh danah chiang takin a lang a. Kan thenawm mai Assam state ah pawh hmuh tur a awm chho ta nual mai. Keini state erawh pawi thui luttuk an khawih hma a kan lo inven a; a hminga investment leh charity neuh neuh ruihhlo dona tura motor an rawn pekte thleng pawh hian an sumdawnna huang zauhna tura lungphum an rawn phum tanna ani tih hria a. Fing taka kan lo hmachhawn a, nature conservation lam thilah lek phei chuan kan thawhpui miah loh ngam a tul a. Eng ber nge kan ramah hian an duh tih hi chik taka kan ngaihtuaha kan inven lawk a tul a. He thil hian kan ram neihchhun leilung,  ngaw, nungcha leh lui tuite  thui takin a khawih pawi thei dawn nia kan hriat avangin CESJ chuan nasa takin kan dodal zel dawn a. Sawrkar pawh he thawhhona hi chhunzawm lo turin kan phut bawk a ni.

Media Cell: CESJ