HNAM INCHIMRALNA HLAUHAWM- SOCIAL ASSIMILATION (Mihring in-tam-hneh avanga inchimralna)

 HNAM INCHIMRALNA HLAUHAWM- SOCIAL ASSIMILATION

(Mihring in-tam-hneh avanga inchimralna)

><}}> Dr. John, 17.07.26

1. IN-TAM-HNEH HI A PAWI LUTUK…

Khawvela hnam inchimralna hlauhawm bera ngaih ECONOMIC ASSIMILATION chungchang chu, Article hmasaah khan kan sawi tawh a. Tunah hian, a tlukpui deuhthaw-a pawimawh, “HNAM INCHIMRALNA HLAUHAWM BER CHU MIHRING IN-TAM-HNEH HI A NI” (SOCIAL ASSIMILATION) tih chungchang hi kan sawi leh dawn a ni. Hei hi Social/Population Assimilation ti pawhin an sawi thin. Hei hi chu a khal/ngan tawh viau ang. Thutawp leh a hlawhtlinna chu i kutah a awm e! Social Assimilation hian Population Assimilation (mihring in tam-hneh) lam chauh a huam lova, hnam/pawl aiawha mi pa 1 or Company  pa 2/1-in min hneh/awpbehna te pawh a huam vek a ni.

 

2. RALTLÂN-TE HIAN MIN TIBUAI LUTUK TA EM?

2.1. RALTLÂN AVANGIN UK AN BUAI MÊK

Mizo ten kan ngaihsan em em Ram Nitla seng lo tih hiala kan koh, Great Britain (UK) saw, Raltlan (immigrants) an tam lutuk avangin an buai em em ta. Zirchiannain a sawidan chuan, “UK-in harsatna (issues/problem) a neih len ber te zinga mi a ni a. Kan harsatna 41% hi Raltlan-te rawn thlen a ni..” an ti hial! Tun hmaa Kristian tam berna ram ni thin kha, tunah chuan, Islam-in a run mek a. Kristian-te chu la tam ber thovin, Muslim chuan a dawttu nihna a rawn hauh tawh a. Tuna King Charles pawh Muslim-ah a inpe tawh anga sawi a ni hial a ni. Kristian-te Biak In tam zawk pawh, Muslim ho hian an lei deuh vek tawh niin an sawi bawk! 

2.2. RALTLÂN AVANGIN US AN BUAI MÊK

Super Power tia an koh, USA meuh pawh, Raltlan ho avangin an buai mek a. Raltlan (immigrant)-te hian, an mite an hruai lut tel thin bawk avangin an pung chak viau thin. Nikum 2025-a US President Donald Trump-a a rawn lal khan, American hote humhim nan, nasa taka beiin, Supreme Court chuan, June 25, 2026 khan, President Trump-a ngenna a tihhlawhtlinsak a. Mexico border pawh venhimna strict zawk bakah, Raltlan (immigrant) dan khauh zawk siam a ni a, ‘One Big Beautiful Bill’ hming puin US Dollar $170 Billion chuang zet mai chu, Immigration Enforcement thuam chak nan, kum 2029 thlenga hman phalna a pe ta hial a ni!

2.3. MIZORAM PAWH KAN BUAI TA!

Mizoram pawh Raltlan issue-ah kan buai ve tan ta! Khawchhak unau (a hma phei kha chuan ‘Raltlan’ tih pawha kan koh phal loh) an va tam ta em! Vai leh Raltlan-in min chim dan hi, kan sawi ai hian a thuk daih. Kan inchhungah an khawsa a, kan tualah an chai a, kan Hospital-ah an awm nghek nghuk a, kan ram Rorelna sangber-ah te pawh an thu nual tawh em? kan mikhual te hian building/dawr leh  ram zau tak tak man to tak taka leiin, Aizawl daifema-ah te hian, ram zau tak tak leh tha tak tak te leiin, kuhva huan, sangha dil, leilet, leh rubber hmun te hialin  an nei der tawh mai thei! I lo chik em!

Ţhuampui-ah sawn, Khaw chhak lam mikhual unau-te fuankhawm an tam thin viau a. Kohhran eng engemaw a ding hial tawh. Hman deuh khan, Kohhran dang hi din leh an tum avangin a veng NGO te nen an buai hak nghe nghe a nih kha! Kha khan a entir chu- Raltlan, khawchhak unaute hi an tlem tawh lo, tih a lantir chiang hle a ni. Heng Raltlan, Khualtha anga kan ngaih ho te hian, an ze ngai leh tihdan te rawn luhpuiin, Kohhran mai bakah, Sumdawnna lam thlengin hma an rawn sawn zel a. Sum thianghlim lo te lah an hmatheh zel, an ti bawk nen! Ramri khamchin, Dan tha tak siama khuakhirh chin kan neih loh chuan, keini a ramneitu Mizo te zawk hian kan la tuar khawp ang. Dan khauh taka kan siam a ngai. Sorkar, Mizo dan, Kohhran leh NGO te pawhin thlir liam ami lova, kan fir a ngai ta!

2.4. RUIHHLO TAWLHTU- KHAWCHHAK UNAUTE:

Ruihhlo man thuthar hi han chhiar ila, Mizorama piang leh seilian hming lang chu tlem te (10% vel), Khawchhak lam deuh hlir (90%) an ni tih hi kan sawi uar lutuk ka ring lo. Chuvangin, kan thikthu pawh kan tihchhiat a ngai. Ruihhlo hmangin Mizo te Mizoram leh kan Tu leh fate hi min rawn run mek a ni, tih hi kan hriachian bal a, kan thinrim hi a alh a ngai ta! A chhan chu, he Ruihhlo hian, tun generation-a kan thalaite chauh min tichhe dawn lova, hun lo kal tura kan Thalaite leh Mizoram rorelna khawl ngei pawh ala ngawng dawn a ni. Kan Unau kan tihte khan Ruihhlo min barh a, Beer min tulh-lui a. Kan Phalna tellovin kan bungrua an hawn a, kan Fanaute thlengin min pawngsualsak ta! Kan harh ava hun ta em!

Tuhnai Ruihhlo ngaite awmna atanga Report kan dawn chu- TBCC-ah mi 800 vel, OKM-ah mi 400 vel leh TNT-ah mi 600 vel an awm mek, tih kan dawng! Heng Thalai (kan fate, naute, nuta, farnu te) Ruihhlo bawiha hruailuttute hi, Ruihhlo rawn tawlhtute hi an ni! Mizoram tan leh kan Thalaite tana an thil rawn hawn hi, ava rapthlak em! Thalai duhawm tam tak, ruihhlo avanga tangkaina nei lova awm mekte dinhmun lungchhiatthlak mai bakah, thlanmuala mittui nena kan vui liam tawh tam tak-te ngaihtuah phei chuan, rilru hi a na vawng vawng mai a ni!

2.5. VAI PAWH MAWLE…

Vai dawrkai Sumdawng kha 1966 hmalam khan an tam hman khawp a, Mizo nupuia nei pawh an awm nual. Vai pasal neih chu nawmsaknaah an ngaih vang a ni. Mahse, Ram buai 1966 a intan khan, Vai huatna leh hnam thinlung thli a tleh a, kan hnam boral tur chu chhanchuahin a awm ta! Hemi hnu hian zawi zawin Vai an ngampa chho leh a. Mahse, 1994 khan, Silchar-ah Vaiin Mizo driver an lo that hlauh mai a, Aizawl-a Vai velh leh Vai dawr suasam-in a zui leh tak avangin an tawmin leh rih a. Tunah hian TOURISM chawikanna changchawiin, Rel a lo lut ta bawk nen, Vai hi a hma aia a let 500 vela tam hi an lo lut huk a ni ber a. Chamhlen ta an awm nual ang!

Veng tinah hian Tuk-zan hian han kal kual ila, Vai hmel hmuh tur an tam khawp mai! Vai Dawr leh Concrete building sakna tawh phawt chu han bih ila, Vai hmel pa 3/4 tal hmuh tur an awm zel bawk! Muslim ten Lammual or Zarkawt High Field, etc.-a an sakhaw ni pawimawh “IED” (Eid al-Fitr) an hman thin laia pungkhawm tam zia te (Hindu ho an la tel lo mah mah, tam zawk tura ngaih an ni mah) ngaihtuah hian, Aizawl khawchhungah ringawt pawh, Vai hi an tlem lohzia kan chhutthiam mai ang. Chuvangin, Vai & hnamdang Sumdawng ten min chimralna hmahruai atana Dawr an neih te hi phal lova kan lak serious a hun tawh khawp mai. Tourist an nih pawhin, dan ang thlap leh felfai takin lutin chhuak rawhse.

 

Vai chu vai angin treat ila, Raltlan pawh raltlan angin tha takin ilo treat ang u. Vai leh Raltlan te lehzel pawh, a rammi (native people) anga kan lo treat chuan, keimahni hi min la hneh ang a, kan chanvo te min chhuhsak ang a, kan ram leh kan dinhmun hi min la rawn luahlan ang. Tunah pawh hian, kan Ram, In & lo te, MLA seat te, Officer seat te, Sumdawng leh Dawrkai te, Hospital abikin Private Hospital, OPD, Clinic & admission (khum), etc. mai bakah, Khawlaiah chhuak ula,  enchiang teh u. Ka sawi aia fiahin in rawn sawi theih zawk ka ring. Min tam-hneh tan tawh a. Kan chhungkua min luhchilh tawh, kan khawlai an luah lum tawh a, kan Ram leh khawtlangah rorelna fawng an vuan tan tawh a. Puipunnaah an lu a tam tawh zawk a! Kawng tinrengah chimralin kan awm mek tawh a nih hi! I harhchhuak mawlh ang u!

2.6. CHAKMA-TE AN PUNG CHAK UCHUAK…

MZP zirchianna June 8, 2026 leh Zonet JB, News 27.6.2026 thupuan khan thin ava ti-thawng em! Chakma khuaah chuan mihring punna a sang uchuak hle niin an hmuchhuak a. Sumasumy khuaah chuan, kum 2005 khan Voter 52 an awm a. Tuna Draft Roll 2026 hnuhnung berah chuan, Voter 248 lai an lo awm hman tawh thung!!! An punna hi 376.92% zet a ni! Heng bakah, Chakma khaw dang 7 te chu 200% zetin an pung a, Chakma khaw dang tho 16 ah chuan, 100% in an pung bawk a ni!!! Hetiang em em-a mihring pun chakna hi khawvelah ala awm lo, a awm thei lo a ni tawp mai. Heng Chakma khuaa mihring pun chak dan hi chu a uchuak a ni tawp mai!! MZP te hmalakna leh thil hmuhchhuah hi a pawimawh hle a ni. CYMA te pawhin hma an lak ve tur thu, June 16, 2026 khan, Thutharthehdarhtute hma-ah an puang a. Heng Chakma Khuaa Draft Electoral Roll 2026-a Voter 32,163 te chuan SIR 2005-ah zawmpui an nei lova. Thil fello leh rinhlelhawm tak a awm ngeiin an hria a, a tul chuan dodalna (agitation) thlenga lantir an tum thu, an sawi nghe nghe a nih kha. NGO dang leh Kohhran te pawh kan chetchhuah a hun e.

 

3. RALTLÂN-TE DIK LO TAKIN LO ŢANPUI SUH…

Mizo leilung fa dik tak thi tawh Voter ID, Aadhar te zuar leh lei te an awm emni aw? Vote an duh avangin E. Roll-a thun chungchangah hian NGO ten an lo tanpui te a awm elo? Heng Mizo nisi dik lo taka Raltlan ho lo tanpuitute khan lo hre rawh u, Nakinah, i rin/beisei tawh loh hnuin an la rawn kâwk dawn tho tho che a nia. In hming, address leh branch nen lam an rawn sawichhuah hunah chuan, nangmah or branch chauh kha in mualpho dawn lo, Mizo-te kan mualpo tel vek dawn.

Voter ID/Aadhaar/ Birth Certificate lem siam, etc. te hi Sorkar dan phalloh a nih mai bakah, Mizo takin, Kristian takin Ramdang-mi or Raltlan te kha dik lo takin lo tanpui suh ang che. Vai or Raltlan or Hnamdang lo hum suh. Dik lo takin Vote/Aadhaar & Birth Certificate te lo tihpui/siamsak suh. Inhmun lo ram an leinaah pawh i hming lo hawhtir suh. A langchhuak leh tho tho dawn. I dam laia a lanchhuah loh pawhin, i tu leh fate hunah a langchhuak tho tho dawn! Hman deuh khan, Khawchhak Unau Zaithiam pa 1 chuan, Voter ID a lo nei ve ringawt mai a, an cancel sak tak nghe nghe kha. Midang pawh an awm nual a rinawm ta hle mai!

 

4. KAN TLAI CHUAN– THISEN CHHUAH BÂK A AWM DAWN LO…

June 26, 2026 khan, Champhai Bethel Branch YMA chuan thuchhuah an siam a, Raltlan Sumdawng, Champhai, Aizawl leh khaw hrang hranga mi bum ţhin tu pa 8 te chu zanah ko khawmin, Champhai chhuahsan turin an hriattir a. Heng mite hi tumahin lo mikhual lo tur leh, mahni veng chhungah pawh lo awmtir lo turin mipuite an ngen, tih an thuchhuah chuan a tarlang a nih kha...

Champhai Bethel Br. YMA thiltih dan hi a TALIBAN lutuk i ti em? Branch YMA dangte pawhin hetianga kan tih ve hi a hun lutuk tawh! Bible pawhin, “Zilhhau fo pawha ring tikhawng tlat chu, vawi lehkhatah tihtliahin a awm ang a, tihdamna a awm leh tawh lovang,” a tih ang khan, Raltlan te lakah hian, kan nem lutuk a, kan dawhtheih lutuk a, kan duat lutuk a, min zuam phah a, an insiamthat phah lova, an sim phah lova, min hmuhsit phah zawk mah ta a nih hi...

Khawchhak lam atanga Raltlan Ruihhlo rawn tawlhtute hian, eng ang hmanrua pawh hman an hreh tawh lo tih hi kan hriat a tha. Kum tling lo Naupang takngial pawh hmanruaa hmangin vawi engemaw zat, Ruihhlo an rawn kentir tawh.

Ramri hung, sang taka hung hi ka support ta khawp mai. Ramri hi tha takin inhung chhuak vek sela, Raltlan ho hi dan ang takin thawn haw vek ila, ruihhlo hi a kiam duak ang. Hei aia Solution tha dang hi a awm lo.

Dan dik takin lut chhuak sela, tha takin an lo lut tur hi lo check vek sela, Mizo te hi Mihring leh Ruihhlo hmanga inchimralna lakah kan him ber ang. Unau nih vanga Ruihhlo inpek fo leh Ruihhlo hmanga inchawm hi chu, kan hmakhua a thim hma dawn lutuk em mai, i pawm lul lovang u.

REAL ESTATE lam buaipuitu Pi Rosy K. Remsangpuii’n inchimralna laka Mizo-te min humhim a tumna hi a ropuiin ava fakawm em! ​“Hnamdang mahni hming hmanga ram rawn leisak tum tu te chuan, khawngaihin min lo dawr lo mai ru aw! A man to zawka lei pawh ka phal chuang lo. Min lo call in awm leh ţhin a, hei hi fiah taka ka chhânna che u a ni e” tiin a status hmiah mai a ni!

 

5. THO LA, DING RAWH LE, I RAM-IN A MAMAWH CHE!

Great Britain chu, Muslim & Raltlan pung chak lutuk avangin an buai nasa tawh! USA takngial pawh, Supreme Court-in nasa taka an beih a ngai tih hriain Budget tam tak a dahbelh sak sauh sauh bawk!

Mizoram khawpui Aizawlah pawh hian, Raltlan-te hian min chim nasa tawhin, Politics, Kohhran leh NGO-ah bu an khuar thuk tawh hle. Veng thenkhat-ah phei chuan, chhui thui vak an ngai lo. Judaten Petera an manchhuahna ang khan, “I ţawngah pawh a hriat alawm” an tih kha rilru-ah a lo lang nghal mai...

Mahse, ala tlai lo. Tun atang hian, dik takin, dan tha tak nen, Mizo tan leh Mizoram tana kan beih a ngai. Tichuan, kan la inveng thei ang. A la tlai lo ve. Kan tanrual a ngai thung.

June ni 25, 2026, Dawrpui Multipurpose Community Hall-a 'International Day Against Drug Abuse & Illicit Trafficking, 2026' tih a hmanpuinaa Pu R. Lalngheta, President, Central YMA thusawi hi, a tha-in ava thlamuanthlak em! “Ruihhlo rawn tawlhtu, naupang lehzel hmanruaa hmang duhtute hi kan dim dawn lo.…” tiin.

YMA hi kan inhumhimna, Mizo hnam himna, kan innghahna, Mizo-te leh Mizoram min chhanhim theitu tur a ni (Pathian chu kan engkima engkim a ni a, YMA dintu hi Pathian a ni, a mite (missionary) kaltlangin a din a, Pathian chu sawi ngai lovah dah ta ila). Chuvangin, Zofate hi Chimrala kan awm lohna turin, YMA hian, dik takin ti sela, huai takin kal zel sela, Mipui pawhin i thlawp tlat ang u.

 

@ NEXT Article- “SORKAR HNUAIA DEPARTMENT CORRUPT ZUAL-TE”