𝗩𝗔𝗡𝗗𝗘 𝗠𝗔𝗧𝗔𝗥𝗔𝗠 𝗣𝗔𝗥𝗧-𝟮

 𝗩𝗔𝗡𝗗𝗘 𝗠𝗔𝗧𝗔𝗥𝗔𝗠 𝗣𝗔𝗥𝗧-𝟮

𝗔 𝗛𝗜𝗠 𝗖H𝗜𝗡 𝗔 𝗔𝗪𝗠 𝗟𝗢

𝗥𝘂𝗮𝘁𝗳𝗲𝗹𝗮𝗻𝘂

𝟮𝟴/𝟬𝟯/𝟮𝟬𝟮𝟳

𝗔 𝗵𝗶𝗺 𝗰𝗵𝗶𝗻 𝗹𝗲𝗵 𝗵𝗶𝗺 𝗹𝗼 𝗰𝗵𝗶𝗻 𝗻𝗴𝗮𝗶𝗵𝘁𝘂𝗮𝗵𝗮 𝗶𝗻𝗿𝗮𝘄𝗻𝗸𝗵𝗮𝘄𝗺 𝗮 𝗻𝗶 𝘁𝗮𝘄𝗵 𝗲𝗺?: Tahrikni 16 March 2026 Assembly budget session lai khan, CM Pu Lalduhoman a department chan thil a sawi fiahnaah; India-in sawkar puipunna leh zirna in sanga thil tih khawma vai pathian Durga chawimawina hla; Vande Mataram play a, zahna lan tir tura tih chu pawm theih chin leh chin loh party tin inrawnkhawm tum a nih thu a sawi kha an inrawn khawm tawh leh tawh loh ka hre lo a. Hei erawh ka hria. Vande Mataram hlaah hian ‘a him chin a awm lo' tih hi!

𝗗𝘂𝗿𝗴𝗮 𝗰𝗵𝗮𝘂𝗵 𝗮 𝗻𝗶 𝗹𝗼 𝗟𝗮𝗸𝘀𝗺𝗶 𝗰𝗵𝗮𝘄𝗶𝗺𝗮𝘄𝗶𝗻𝗮 𝗽𝗮𝘄𝗵 𝗮 𝗻𝗶: He hla chang 6 pumpui hi A siamtu biak aia A thilsiam biakna vek a ni. (Rom 1: 18-32) A hla thua thu thenkhat hi  han belhchiang teh ang u-

“Ka pathiannu i ni - nang Durga, indona ralthuam 10 humtu - chibai ka buk che. Nang Lakshmi, lotus lalthutthlenga thua hriatna vawngtu, chibai bukin i hmaah ka rawn kun e.” Heihi eng ngaihin nge kan ngaih le?

  𝗣𝗮𝘄𝗺𝘇𝗮𝗺 𝘁𝗵𝗲𝗶 𝗮𝗻 𝘁𝗮𝗺 𝘁𝗵𝗼 𝗺𝗮𝗶:  BJP sawrkarin India ram state zawng zawnga sawkar office leh zirna in sanga Vande Mataram zahna lantir tura an tih chungchang hi, karhnih liam tawh khan whatsApp group pakhata kan khel/titi ziaka ka remkhawm, “Vai pathian Durga chawimawina hla-Vande Mataram hi Kristian ten kan sak loh ngam a ngai” tih thupui hmanga  Fb lama ka post chu pawmzam thei fe fe an tam mai a, dan pangngaia min beih let nana hmang pawh an kat leh nawk a.

 Mizo hnam hi thil thenkhata thliarkar rilru pua zim tak kan nih laiin, thil thenkhat, a bikin Pathian rinna kawngah kan zau huau lawi siin ka hre ve a, kei misual hian. Hei hi Nunna Kawngka zim lam kan zawh peih lo a, boralna kawngka zau lama a huhoa kal dul dul nuam kan tih vangah ka ngai. Tin, eiruk hmangte chunga kan rilru puthmang thlenga kan zau huau chhan hi, Pathian thikthuchhiat zia leh milem biak a huat zia kan ngaihtuah duh loh vang lo chu chhan dang a awm lo. Hei hi mawhphurhna kan lak peih loh vang pawh a ni awm e. Kan Pathian rin hian a duh firin a khermei si a. Keini kan thatchhe si! Kohhran rorel thutlukna tlanglawn tak an sawi thin pawh- “Heti hian ti ila a pawm a nuam ang, kan kal dan ngai hi tha kan la ti” tih a ni a. A awlsam leh a pawm nuam zawnga kal duhna hi tawngkam danga dah chuan ‘hmasawn hlauhna/duhlohna’ a tih theih ang a, kal dan pangngaiah hmasawnna a awm theih loh avangin kan ram inrelbawlna leh tualzal nun pawh a hnungtawlh zawngin hma kan sawn a. Faina kawngah kan bal tawlh tawlh a, eiruk/hlemhletna (corruption) a kairualin a ngampa zel zawng a nih hi. 

 Vande Mataram hi hla pawisawi lo, leilung leh a rah chhuah chawi sanna leh India ram zahna lantirna ang leka sawi duh an tam khawp mai. Mizo ram ngaih hla nena khaikhin pawh an awm bawk a. Vaibelchhe 33 pathian nei vai/Hindu sakhua chuan engkim an bia a, keini chuan Pathian Isua a hming kan hriat A hming chauh kan rin kan bia a. Pathian thilsiam be ve loin. A siamtu kan bia. Vande Mataram hi thiam taka Hinduism/Hindutva theh darh tumna a nih lohin eng nge ni se kan tih? He hla ngei atang hian Kristian rinna pawlhdal piah lama nekchep hial tumna a rawn irh chhuak ta reng a nih hi.

𝗩𝗮𝗻𝗱𝗲 𝗠𝗮𝗿𝗮𝗺 𝗮 𝗵𝗶𝗺 𝗰𝗵𝗶𝗻𝗮 𝗮𝗻 𝗻𝗴𝗮𝗶𝗵, 𝗰𝗵𝗮𝗻𝗴 𝟭 𝗹𝗲𝗵 𝗰𝗵𝗮𝗻𝗴 𝟮 𝗵𝗶 𝗮 𝗵𝗶𝗺 𝗰𝗵𝗶𝗮𝗵 𝗲𝗺?  ‘𝗧𝗶𝗵 𝘇𝗶𝗮𝗸 𝗮 𝗻𝗶’ 𝘁𝗶𝗵 𝗻𝗲𝗻 𝗮 𝗶𝗻𝗺𝗶𝗹 𝗲𝗺?:

Chang 1

_Ka Nu, chibai ka buk a che!_

_I luite an luang dem dem_

_I huante an rah a thlum

I thlite a vawt nuam a,_

_I lote a hring dup bawk,_

_Ka Nu, zalen leh thiltithei_

Chang 2

_Thlapui eng hnuaia i mawi_

_I thingkung leh i luite an mawi_

_I par vulte nen i inchei a_

_Nang chu hlimna min petu_

_Nui leh tawngkam nem tak nei!_

_Ka Nu, i hmaah ka lo tlu_

_Tawngkam thlum leh nem_

_Ka Nu, chibai ka buk a che_. Lettu: Major Clement L. Ralte

He hlain 'Ka Nu' a tih hi eng/tunge? India leh a ram leilung hi a ni. ‘Keini nu chu chunglam Jerusalem a ni’ tih ziak a ni.  (Galatia 4: 26) He hlaa; Adi Shakti inlanna pahnih Durga leh Lakshmi mother goddesses (pathian nu) te hi India a refer nan a hmang a. Vande Mataram... Nu chibai ka/kan buk che i hmaah kan lo kun e...tih a ni ta zel a nih hi.

 Kan Pathian hi hmangaihnaa khat Pathian, ngilnei leh zaidam, ngaidam thintu Pathian a nihna chauh kan hriat avangin, kan ramah hian sual a punlun zel a ni mai em? Kan Pathian hian ring lo mite fak hla leh an serh leh sang tih a phal ve lo tih thu Bible-ah chiang takin kan hmu a. Israel lal ropui tak tak, an nupuite vang leh chhan dang dang vanga lalram dang biak that/tlawn duh vanga milem tung ding reng reng hrem lohin a chhuah ngai lo.

𝗞𝗵𝘂𝗮 𝗹𝗲𝗵 𝘁𝘂𝗶 𝘁𝗵𝗮 𝗻𝗶𝗵 𝗮 𝘁𝗮𝘄𝗸: Kan ram India hi kan zah tur a ni. Vande Mataram tel loin, khua leh tui tha chuan ram dan dinglai kan zawm ang a, tha takin chhiah chawi tur kan chawi anga chu chu a tawk.   

𝗔𝗽𝗲𝘅 𝗖𝗼𝘂𝗿𝘁 𝗰𝗵𝘂𝗻𝗴𝗮 𝗺𝗶 𝗣𝗮𝘁𝗵𝗶𝗮𝗻 𝗜𝘀𝘂𝗮 𝗵𝗺𝗶𝗻𝗴 𝗰𝗵𝗮𝘂𝗵 𝗸𝗮𝗻 𝗿𝗶𝗻𝗴: He thu ka ziak lai hian, Mizoramah awm se, min finchhuahtu Academician zinga tel ngei ngei tur (a tel tho a) St, Edmund’s College Shillong, Meghalaya-a Political Science & International Relations zirtirtu, JNU chhuak,  Freestyle Academic Activist, ka nau Zonunan he thil lawmawm deuh hi kan awm hona whatsapp group-ah a rawn post a: “Tihluihna hmanga heng thil hi tih theih ani lo e' tiin SC lamah Vande Mataram chungchang ngaihtuahin- Senior Advocate huaisen, Sanjay Hegde pawhin Nu Chhuangi lam a tan hmel viau e” tiin.  Tihluihnaa Vande Mataram sak chungchang PIL chu SC in hnawl mah se, sak loh avanga hremna erawh a awm thei lo a ti thung ta a. Chuvangin kan state-ah hian kan sa lo thei tihna a ni.

Hei hi kan chhuan chu a la ni cheu! Home Ministry thu chhuah kha Apex Court-in nemghetin, sawkar office leh zirna in sanga sa lo lo chu lung in tan tur pawh rawn ti se, Isua Krista ringtute chu vai pathian chawimawina hla kan sak duh loh avangin lung in kan tang mai tur a ni. Kan Pathian nghing ngai lo leh pangngai renga thu, kan thurin tehna dik lo thei loa kan pawm, Bible in sak a phal loh chi tak a ni si a.