MODANI, TRUMPELON & DUHAMBANI(?)

MODANI, TRUMPELON & DUHAMBANI(?)

Ruatfela Nu @CESJ

9th April, 2026

He thu ka ziak lai mek hian khawvel leh a mihring puite tana tangkaina nei em em lo - mi hausa tawntaw fapa, taksa pianphunga harsatna nei a nih avanga keh theia dawma dawm; ransa leh ramsa lawm - Anant Ambani piancham The Book Cafe Aizawlin a wish na postar leh Pu Lalthansanga (Chatea), EF&CC Minister-in Anant Amabani thlalak bula ding a, a piancham a lawmpui thu video reels kha ka hmu a. Chak vaklo chunga tihdan tur lo hrilh zeltu in a tihtir lai sound erawh an cut ta lo kha a pawi thung a ni! Kan sawrkar hian Reliance-Vantara lakah a mimal angin bat an lo ngah viau em ni ang le (?)

Centre for Environment & Social Justice (CESJ) PR, 7th April, 2026 a Corporatocracy/Plutocracy chungchang kan sawi dikna kan hmu chho zel chu a nih ber hi a! The Book Cafe neitu hi OSD to CM Jonathan Lalremruata kut dinglam a ni an tia. Hman kum lawka Formosa Foundation in Churachanpur lama donation an pek thlalak, Formosa Foundation Fb page a tarlanah pawh a tel ve ngei a. 4th February, 2026 a CYMA ruihhlo dona tur 4x4 Camper an pekah pawh dawhsan a thu pha zingah a tel bawk.

Mizo thalai/pavalai hausak thut chaka a dika dawk thlu loa sum hai buan buan, bank lem din, chiahpuam, khehpuam, ruihhlo tawlhruka an sum lakluh black money, white money-a chantir tuma sumdawng leu leu hi an tam khawp a, hriatsen pawh an ni lo nain kan hre vek chu a nih si hi.

Kum 2009-2010 chhoa ka thiante nen kan hai chhuah- Synod hnuaia thawkte hamthatna leh nihlawhna, Pension & Provident Fund, investment an tihna hmun ICICI Prudential leh, Bajaj Allianz leh Birla-a Agent-te a Synod pastor pension tawh fapa leh thawk mek fapa bakah hnamdang - Utpal Mazumdar ten an chiahpuam kha a ni a. Birla Sunlife a invest Rs 1,30,00,000, ICICI a invest Rs 5,60,00,000 leh Bajaj Allianz-a invest Rs 1,00,00,000 atanga agent-ten commission an ei tam turu tak kha min ti hre chhuak rum rum a. Sum tam tak duha neih tuma engmah pawisak neih loh hi Modani (Modi+Adani) leh TrumpElon (Trump + Musk) te ang thoin a sim theih loh a nih hi! Mizoram pawhin DuhAmbani kan nei ve ta a ni ber e.

Hetianga tangka sum ngaina, a duha duh huam huam ho hian eng dan mah an zah loh vangin an hlauhawm em em a. Christianity, Regionalism leh Nationalism n mausam a, Hnam hi enga tan mah an ti lo a, an duh chu an hausak zual zelna chiah a ni.

Adani leh Ambani te ho tana Dan bawhchhiat harsat zia mai chu - An sumdawnna atan environment leh natural resources te tichhe duai duaiin mi tam tak tawrhna thlen eng ang mahse; Mipui thawh khawm leh deposit te hmanga kal ve hram hram public sector banks/undertakings te pawh ti bankrupt lek lek thin mahse - sawrkarin an sual thupbo sak mai ni loin, an thiltih sual luih leh dan pela an chetna tam tak kha dan chhungah an khung luhsak a. Dan bawhchhe hleithei miah lo a an siam thin vang a lo ni!

Sal neih kha a hunlai sal neitute Dan siamin permit inpe ngawt mahse mihring leh Pathian hmuh ah thil pawmzam theih a ni chuang lo a. Chung dan tha lo chu paih anih zel theihna tura fight hian tawpintai a nei thei dawn lo anih hi!

Environment humhalh leh hmasawnna dik hi thenhran theih a ni lo. Mi tlemte hmasawnna ni lo, mi zawng zawng hmasawnna turin i bei zel teh ang u!

Tlema ngaihdan hran hlek ka lo neih chu India ram politics leh policy tam tak, Adani leh Ambani te hoin an control deuh titih ang tho hian, US ah pawh khuan Donald Trump hnuaiah An Adani leh Ambani ve- Elon Musk, Peter Thiel, Mark Zuckerberg leh Jeff Bezos te ho hian influence an nei ve nasa a. Donald Trump-a election campaign funding pe nasa pawh heng mi hausa tawntaw ho hi an nih kha, Trump hi hetiang diklo taka hausa - corrupt business class a telve sa anih avangin Pu Modi te thiltih ai mah hian US lam khu an che trawp lek lek emaw tih chang ka nei fo mai. Tunah pawh hetiang big corporates ho chuan kan Zoram hi min rawn run tan chu ani ta reng a. Tactic chi hrang hrang leh thil pek/charity eng eng emaw hmangin kan chhia leh tha hriatna fim dawi at an tum a. Bible in Tangkain engim a sithlu tih a angina patling an rawn sithlu phawk phawk chu a nih tak der hi le!

Kan sawrkar a thuneitu lu ber ber thenkhat phei chu an dawi khawlo tan der tawh tih a hmuh theih awm e. DuhAmbani combination, OSD to CM  remruatna leh palai hnathawh vanga tuihnuai lawng ang mai a min run tum mek hi a tlai chhiat hmain a do let dan tur he ram hmangaihtute hian ngaihtuah a ngai. Tui hnuai lawng min run tum a rawn thawk chho mek, kan hruaitu thenkhat phei chu an sipai rinawm atana rawn hman tum mekte hi lo beilet turin leh, a nih nih ni mai turin indona hautak tak chu kan hmachhawn dawn anih hi. Mahse chung Khuanu zarah kan zam lo. Hum Dekhenge!