PAWL BIK AWM LO ZIRLAI-TEN 'NEET, DBSE, CUET & SSC QUESTION PAPERS LEAK DUHLOHNA LANTIRTU SONAM WANGCHUK SUPPORT NAN PEACEFUL DEMONSTRATION' HUAIHAWT DAWN
><}}> Dr. John, 22.07.26
Pawl tanchhan bik nei lo,
Mizoram-a Zirlai-te chuan Delhi-a an Zirlaipui leh Thalaipui-ten lungawilohna
an lantir mek an thlawpzia lantir nan Naktuk July 22, 2026 (Nilaini) hian
Aizawl-ah Peaceful Demonstration an huaihawt dawn.
Vana Pa Hall kawt,
Aizawla chawhma dar 10:00 atangin hun an hman tur hi, ram khawpui bera Jantar Mantar-a Cockroach Janata Party (CJP) leh All
India Students Federation (AISF) te lungawi lohna kal mek leh anmahni thlawpa
activist Sonam Wangchuk-a'n chaw a nghei mek an thlâwpzia lantîrna a nih thu,
Mizoram Zirlaite chuan an sawi.
Peaceful Demonstration
huaihawt tur hi a tirah chuan CJP Mizoram huaihawt tur angin thu a darh hman a.
Mahse, hei hi thudik lo a nih thu hriat a ni a, eng pawl bik mah huaihawt a ni
lo va, Zirlai pakhat chuan zirlai thahnemngaite huaihawt a nih tawp thu a sawi
a, "Pawl hminga huaihawt kan duh lo
va, tel tura sawmna video kha CJP Mizoram IG-ah min post chhawnsak mai a
ni," a ti.
CJP-in nawrhna an huaihawt chhan ber hi May thlaa NEET exam zawhna put ru leh a kaihhnawih a ni a. Exam hnuah cancel niin zirlai maktaduai chuang an exam tha leh a, exam hmasa cancel a nih vang hian mi engemaw zat intihlum an awm phah a. Union Education Minister Dharmendra Pradhan-a chu he thila mawhphurhna laa bâng turin an phut bawk a ni.
CJP movement hi US-a
awm Indian zirlai, Abhijeet Dipke-a'n online-a a din niin India a haw hnuah
thla hmasa atang khan Delhi-ah lungawi lohna hi a lantir tan a. June 28 atang
khan Sonam Wangchuk-a'n thlawp nan chaw a nghei a, ani hi ni 20 chaw a nghei hnuah
police-in tihluihnain Inrinni, July 18 khan damdawi inah an dah a, chaw erawh a
la nghei zel.
July 20, Thawhtanni khan Parliament panin Thalai sang tel-in kawng an zawh a, Police nen pawh an innawr nasa hle a, hliam pawh an awm nual a ni. July 21, Thawhlehni khan Jantar Mantar-ah bawk pungkhawm lehin kawng zawh erawh Zirlai-te tawrh phal tawh lovin an kalpui tawh lo tih CJP chuan an sawi a ni.
0 comments :
Post a Comment