VOTER ID LEM SIAMTU MAN CHHUAH TAK KAIHHNAWIH-AH A TAWP THLENGA HMA LAK TUM

VOTER ID LEM SIAMTU MAN CHHUAH TAK KAIHHNAWIH-AH A TAWP THLENGA HMA LAK TUM

><}}> Dr. John, 3.8.26

YMA Sub-Hqrs. Lunglei leh YMA Tlabung Branch-ten, tun hnaia voter ID lem an man chhuah taka a mawhphurtu man a nih theih nan a tawp thlenga hmalak an tum thu an sawi.

 

YMA Sub-Hqrs. Lunglei leh YMA Tlabung Branch-te chuan, Tlabung Sub-Division huam chhung Lamthai khuaa voter ID 6 chu a lem, siam chawp a ni tih, nimin piaha he khua an tlawhnaah an finfiah thu leh, a lem siamtirtute hian ID pakhat siam nan cheng sang 6 zel an chawi tih, an inpuan thu, an sawi a, he khuaa khawtlang hruaitu pakhat chuan roll-a chuang lo heng mi 6-te hi voter ID lem an neih theih nan a buaipui tih YMA hruaitute chuan sawiin, Aizawl veng pakhata voter ID lem siamsak thei nia insawi Mizo pakhat chu he khuaa VC member pakhat nupui nau kaltlangin an be pawp niin an sawi.

 

YMA Sub-Hqrs. Lunglei leh Tlabung Branch YMA hruaitute chuan voter ID lem leh a tak hi a epic number a inan chiah thu leh, a lem man chhuah 6 zinga 1 neitu phei chu ramdangmi a nih avangin Bangladesh lamah a let leh tawh thu, an sawi a, India ram khua leh tui nihna finfiahna atana pawm lehkha pawimawh lem pawh siam ngam chuan, lehkha pawimawh dang pawh a siam ngam dawna an ngaih thu, YMA hruaitute chuan sawiin, he dan bawhchhiatnaa a bul tumtu man a nih theih nan a tawp thlenga kal an tum thu, an sawi a ni.