SORKAR-IN RUANG PHURH NAN RS. 294.45 LAKHS SENG TAWH

SORKAR-IN RUANG PHURH NAN RS. 294.45 LAKHS SENG TAWH

><}}> Dr. John, 3.8.26

Mizoram sawrkar chuan khaw danga ruang phurh man a tumsak mekah, a kaihhnawih Department, Social Welfare & Tribal Affairs-in a chhinchhiah danin, Ruang phurh nan hian, Rs. 2,94,45,154 sen a ni tawhin an sawi.

 

Thu kan dawn danin, Sorkar-in ruang phurh man a tum tan December 2024 atanga August 1, 2026 thlengin, ruang hi 2,791 phurh tawh niin, hemi atan hian Rs. 2,94,45,154 sen a ni tawh a ni. Ruang phurhna man hi a luh hmasak dan indawtin a tahtawlin pek chhuah zel a ni thin.

 

Mizoram Sorkar-in ruang phurh a kalpui hi September 1, 2024 atanga hman tan a ni a. Tunah chuan, awlsam zawkin Ruang Phurh Online Portal hmangin emaw, App kaltlangin emaw a dil theih tawh a ni.

 

Ruang Phurh Online Portal hi Mizoram State e-Governance Society (MseGS), ICT Department siam a ni a, Sorkar-in sim senga ruang phurh a kalpui mek chu chak zawka kalpui a nih theih nan leh mi tam zawkin awlsam zawka an chhawr theih nana ruahman a ni.

 

Mizoram Sorkar chuan khaw danga ruang phurhna senso tur hian, kum 2024-25, 2025-26 atan Budget-ah Rs. Nuai 500 ve ve a lo dah tawh a, Kumin 2026 kum kal mekah pawh Budget-ah Rs. Nuai 500 a dah leh bawk a ni.

 

Ruang Phurh Inkaihhruaina-in a tarlan danin, ruang phurh tur chu a thlenna tur km. 20 aia hnai a ni tur a ni lova, km. 20 piah lamah chuan tu tan pawh hman theih niin, lirthei thlen theih chin a huam a ni.

 

Ruang Phurh Inkaihhruaina ang chuanm ruang phurhna lirthei hman man chu State Transport Authority-in rate a siam anga kalpui a ni a, ruang phurhna man Sorkar-in a peksak hian, lirthei pa 1 chiah a huam a, lirthei hman theih-ah hian Rs. Nuai 17 man chin chung lam lirthei a huam lo a ni.

 

Ruang phurhna hlat zawng chhut nan ruang chhuahna atanga a dahna hmun inkar hlat zawng lak tur a ni a, lirthei thlen lohna khua a nih chuan lirthei thlen theih tawpna thleng a ni. Ruang phurhna chu kawng tawi thei ber hman tur a ni bawk.