MPSC-IN A DINHMUN LEH THUTLUKNA A SIAM TAWH TE SAWIFIAH-IN THUCHHUAH SIAM

MPSC-IN A DINHMUN LEH THUTLUKNA A SIAM TAWH TE SAWIFIAH-IN THUCHHUAH SIAM

><}}> Dr. John, 10.8.26

Vawiin khan Mizoram Public Service Commission (MPSC) chuan One Time Registration (OTR) leh MPSC kalphung thenkhat chungchangah Zirlai pawl pakhatin MPSC hnathawk te tan harsatna a siam avangin a hnuaia tarlan ang hian thuchhuah a siam.

 Mizoram Public Service Commission (MPSC) chuan lehkha No. B-93/MZP-GHQ/2025-2027/20 dated 06.08.2026 hmangin Mizo Zirlai Pawl (MZP) hnen atangin One Time Registration (OTR) tih tâwp leh candidate ṭhenkhat harsatna tawh chungchangah ngenna a dawng a. He ngenna hi uluk taka zirchian a nih hnuah a tûk, ni 07.08.2026 khan chhanna a thawn a ni.

 MZP-in ni hnih chhung (06.08.2026 – 07.08.2026) MPSC office tualah lungawi lohna a lantir hnuah duh tawk mai lovin, vawiin ni 10.08.2026 aṭanga MPSC hnathawkte pisa kai tur dan an ni leh ta zel hi Commission chuan pawi a ti hle a. He thil thleng avanga personal interview hmachhawn mek te leh written exam bei tur ten harsatna an tawk te, officer kaisang tur a hun taka an kaisang thei lo tur te hi pawi a ti em em bawk.

 MPSC hi hna diltute tana harsatna siam tumtu ni lovin, recruitment process fair, transparent, efficient leh dânin a phal ang taka kalpui tum rengtu a ni zawk a, a hnuaia mi ang hian mipuite hnenah thuchhuah thar a siam a ni.

 1. One Time Registration (OTR) tih tâwp chungchang:

MZP-in OTR hi tih tâwp a, hna zawrhna tih chhuah thar apiangin specific application form siam ni se a tih hi MPSC chuan a pawm thei lo a. OTR tih tâwp hi candidate-te harsatna chinfelna aiin harsatna thar siam thei zawk a nih avangin, tun dinhmunah MPSC tan chuan OTR tih tâwp hi a remchang lo. OTR tih tâwp hi buaina chinfelna tur ni lovin, applicant-te tana buaina thar siamsaktu tûr zawk a ni. 

 2. OTR-a document upload kim loh avanga application reject tawh te offline-a document thehluh tir chungchang:

MZP-in OTR-a document upload kim loh avanga application reject tawh te tan offline-a document thehluh hun pek chungchang a sawi pawh hi candidate ṭhenkhat tan thil ṭha tak ni thei mah se, recruitment process pum pui thlirin MPSC chuan tih hlawhtlin theihah a ngai lova. Recruitment process-ah chuan advertisement leh application submission hun bithliah hi candidate tin tan a thuhmun vek tûr a ni. Application hun khar hnuah candidate ṭhenkhat te tan document kim lo thehluh hun hranpa siamsak leh hi candidate document felfai taka thehluttu te tan thil dik lo (fair lo) tak a ni dâwn a, India Dânpuiin a phût ‘equal opportunity’ leh ‘equal treatment’ bawhchhiatna a ni bawk ang. Hun tiam chhunga dilna felfai thehlut thei, hna diltu te dinhmun ngaihtuah tel a ngaih avang leh Supreme Court judgement in hun tiam ral hmaa document thehluh te chauh pawm tur a tih avangin duhsak bik nei anga lang theia chet hi Commission tan a thiang lo a ni.

 3. Written examination-a ti ṭha si, OTR-a document upload kim loh avanga hnawl te chungchang:

Written examination-ah eng ang pawhin ti ṭha mah se dilna famkim lo thehlut te chu eng hunah pawh hnawl theih an ni. Chu chu Advertisement-ah pawh langsâr takin ziah lan zel a ni. Hemi chungchangah hian Hon’ble Supreme Court chuan Special Leave Petition meuh, SLP (Civil) No. 32964 of 2025 – Rajasthan Public Service Commission Vrs. Lavanshu Sankhla & Ors., Judgment & Order dated 04.05.2026-ah ‘eligibility’ atan application submit tawp ni chu qualification tehfunga hman tur a ni tih fiah takin a ziak a, a hnuah document thar pek belh emaw, re-submit emaw theih a ni lo tih a tarlang. Hei hi MPSC chuan a zâwm mai zawk a ni.

 4. MPSC Online Portal hman mek chungchang:

MPSC-in Online Portal thar (Version 2.0) a hman ṭan hun hi June ni 13, 2025 (Zirtawpni) dar 3:56 PM a ni. June ni 16, 2025 (Thawhṭanni)-ah Portal thar zirchian nan hun hman a ni a, a tûk June ni 17, 2025 (Thawhlehni)-ah Portal thar hman dan tur – Account hawn thar dan, OTR siam dan, document upload dan etc. chungchanga applicant te kaihhruaina (public notice) MPSC chuan a ti chhuak a. Heng kaihhruainate hi MPSC Website, Facebook leh Instagram account-ah te a zau thei ang berin pûan darh a ni. Hei mai hi duh tawk lovin, I&PR Director, Govt. of Mizoram hnenah he ‘public notice’ hi uar taka puangzar tura ngen a nih avangin a darh zau tawk hlê turah Commission chuan a ngai. Portal thar chungchanga kaihhruaina vawi thum (3) dang tih chhuah leh a ni bawk.

 Version 2.0 hman a nih avanga harsatna hriat hmasak ber, MAH&VS candidate zinga OTR a document dah kim lo mi eng emaw zat an awm chungchang hi han sawi zau hlek ila. Advertisement-a essential qualification inziak ang tihchianna tur document upload kim tur a nih avangin upload lo te chu interview hma in hnawl an ni. Advertisement tih chhuah a nih apiangin dilna famkim lo thehlut tute chu eng stage-ah pawh an dilna hnawl theih a ni ang tih ziah lan zel a ni. Applicant/candidate, written examination neih hnua hnawl leh an awm a nih pawhin hei hi chu Commission thuneihna liau liau ah ngaih tur a ni. Heng hnawl tâk te hi Court-ah an kal a, vawiin thlengin result tih chhuah theih a ni lo. Court-a kal ten an chhuanlam ber, dilna an thehluh laiin ‘Others’ tih ‘field/box’ a awm lo tiin sawi mah se he Portal Version 2.0 hman a nih ṭan aṭanga MAH&VS hna dil theih hun tawp ni (10.10.2025) inkar chhung khan ‘Others’ tih ‘field/box’ hmang hian candidate hrang hrang in certificate 2832 zet an upload thei bawk a, MAH & VS diltu zingah ngei pawh document upload kim thei an awm a ni. Tin, Portal thar hman ṭan ni, June ni 13, 2025-ah ngei pawh hian candidate pakhat chuan ‘Others’ ‘field/box’ hmang ṭangkaiin Rehabilitation Council of India in a pek chhuah, B.Ed Special Education (Hearing Impairment) certificate a upload nghe nghe.

 Hetiang hi thil awmdan a nih lai leh, Court-a thu inchiah mek a nih avangin tuna harsatna tawk te hi lainatawm viau mah se, ‘last date for submission’ a pelh hnuah a tira an thehluh loh document dang thehluh leh theih hun siamsak bik a rem ngang lo a ni. Court-a zualko mêk te leh tuna harsatna tawk thar te chungchang hi duang khata hlûm tur (similar case) a nih tlat avangin Court thuchhuak a awm hma chuan MPSC tân he thilah hian kawng danga hma lâk a rem lo bawk a ni.

 Advertisement tih chhuah a nih apiangin dilna famkim lo thehlut tute chu eng stage-ah pawh an dilna hnawl theih a ni ang tih ziah lan zel a ni chung pawhin candidate tam takin written exam zawha, document an upload kim loh avanga hnawl an nih hian an hrethiam thei lo a. MPSC pawhin hei hi pawi a tiin application ‘initial stage’ a documents te za-a-za check thei turin Sawrkarah a mamawh te a thlenin July ni 28, 2026 khan post 9 (pakua) a pek belh a. He mi bakah hian post 26 dang Sawrkar in pek belh turin hma a la mek a ni. Tin, MPSC mamawh khawl leh thil dang pawh Sawrkarin a ngaihtuah sak mek zel a. Hnathawktu thar lak belh an nih hnuah chuan application te a tirah za-a-za check theih tawh tura beisei a ni a, hei hian tuna candidate te harsatna neih ang chi pawh a sut kian rin a ni.

 Hetih lai hian, MZP hruaitute pawhin OTR hi an ngaihven êm avangin anni nen pawh sawihona leh demonstration te pawh neih a lo ni tawh a. An duhdan rawn thlen te pawh a theih chin chinah tih hlawntlin a niin, MPSC online portal pawh nasa taka tih changtlun chhoh zel a ni. Tuna buaina awm mek ang chi hi chu hun rei lote hnuah chuan kiang thuai tura beisei a ni.  

 MPSC chuan candidate-te hamṭhatna te, rintlak a nihna leh a zahawmna (credibility) humhim hi thil pawimawh berah a ngai a. Chuvangin, hna a kalpui dan tur chu candidate pakhat emaw, group pakhat emaw tan chauh ni lovin, candidate zawng zawng tan thuhmun, felfai leh dân ang taka kal tur a ni tih hi Commission dinna a ni e. Ni 10.8.2026 (Thawhṭanni) aṭanga MPSC a thawktute pisa kai tur dan hi tihtâwp thuai ni se a duhawm hle. Schedule duan lâwk sa tam tak a tibuai dawn a; personal interview kal lai mek te leh hun lo ruat fel tawh te, examination buatsaih te, promotion atana Departmental Promotion Committee hun lo ruat tawh te, exam hmachhawp atana inpuahchahna te, dilna endik hna te, result buaipui hna leh ṭûl hrang hrang a tikhaihlak dawn a ni. He thil hi chhunzawm zel a nih chuan a tak taka tuartu tur (stakeholder) te chu hna diltu te, Sawrkar hnathawk promotion hmu tur te, department hrang hrang, Group C examination buatsaih tur te leh examination hmachhawn tura inbuatsaih mek te an nih dawn avangin he harsatna lo thleng hi MPSC chuan pawi a ti hle a ni.

Issued by Mizoram Public Service Commission.