MNF PRESIDENT PU ZORAMTHANGA CHUAN, CHIEF MINISTER PU LALDUHOMA CHU REMNA THUTLUNG LEH ILP CHUNGCHANGA A THUSAWI AVANGA NGAIHDAM DIL TURIN A TI.

MNF PRESIDENT PU ZORAMTHANGA CHUAN, CHIEF MINISTER PU LALDUHOMA CHU REMNA THUTLUNG LEH ILP CHUNGCHANGA A THUSAWI AVANGA NGAIHDAM DIL TURIN A TI.

><}}> Dr. John, 7.8.26

Pu Zoramthanga hian vawiin khan Hnam Run-ah chanchinbu mite a kawm a, Mizoram Law College-a Pu Lalduhoma thusawi chungchang sawiin Pu Zoramthanga chuan Mizoram Chief Minister ni lai mek chu inremna ziah kawnga a hrechiang ber leh a thawh hlawk ber ni a inchhal chung si a, Law College zirlaite hma a Memorandum of Settlement leh Memorandum of Agreement hre hrang lo, khatih hunlai a Mizoram Sorkar aiawh a hming ziaktu Chief Secretary Pu Lalkhama hming pawh sawi bo thak tu a ni tih a sawi bawk.

MNF President Pu Zoramthanga chuan, Chief Minister chu ram leh hnam himna khawih thil a huaisen taka Mizoram tana ding tura beisei a nih laiin, Mizote’n a ILP an hman mek pawh sorkar laipui lamin a duh duh hun a an paih thei ang a a sawi chu ‘dawih aw’ diktak a ni a ti a, ILP Mizoramin a neih mek chu British hunlai a ta tawh harsatna chi hrang hrang kar a Mizo mipuite’n an la venhim chhoh zel leh Sorkar laipui, Mizoram sorkar leh MNF ten inremna thuthlung an ziah avanga nemngheh lehzual a ni a ti bawk.

 

MNF-in August 15, 2026 hma ngeia ngaihdam dilna siam tur leh a thusawi sut turin Chief Minister an phut

 

MNF President Zoramthanga chuan Govt. Mizoram Law College zirlaite hmaa Chief Minister Lalduhoma thusawiah khan Mizoram leh Mizo hnam himna khawih thil, thu dik lo hmanga thalai rilru thianghlimte hruai kawi tumna leh hnam pawikhawina thuk tak a awm a ti a, ngaihdam dil ngei tur leh August 15, 2026 hmaa sut ngei turin an phut thu a sawi.

 August 6-a Mizo Hnam Run-a chanchinthar thehdarhtute an kawmnaah Zoramthanga chuan Chief Minister hian a thusawi hi hnam pawikhawihna leh hnam himna tiderthawngtu a nih avangin mipuite hnenah ngaihdam a dil ngei tur a ni a, August 15, 2026 hmaa sut ngei tura an phut thu a sawi a, Mizo mipuite hnena ngaihdam dila a thusawi hi a sut lo anih chuan a tul anga hmalak chhunzawm zel an tum thu leh remna thuthlung hi MNF chuan vawnhim reng an tum a, a tibawrhbang tur leh a himna tichhe zawnga chetna reng reng chu a tawp thlengin an do tlat dawn a ti.

MNF President chuan politics-ah thu inchuh leh inhnialna awm fo thin mah se, hruaitu chinte chu ram leh hnam himna khawih thilah chuan dinna nghet tak nei tura beisei an ni a ti a. Mizo mipuiten harsatna tam tak paltlanga an hlawhchhuah, invenhimna tha tak a neih mekte hian pawn lam atanga beih leh nek a tawk anih pawha huaisen taka dolet tur a nih laia, pawn lama atanga beih leh nek a tawk lo chung ILP hman mek 'Central sawrkarin a duh chuan min paihsak thei' tih Pu Lalduhoma'n a sawi fo mai hi 'dawih aw' dik tak a ni, a ti.

Zoramthanga chuan Law College zirlaite hmaah khan Chief Minister hian Peace Accord tia sawi thin, inremna kha 'Memorandum of Agreement' tih leh 'Memorundum of Understanding' tiin vawi hnih lai a sawi a. Inremna thuthlung kha 'Memorundum of Settlement' a ni zawk a, a hming dik tak pawh a hre fuh lo a, chumai ni lovin, inremna thuthlunga Mizoram sawrkar aiawha hming ziaktu, khatih laia Chief Secretary Pu Lalkhama hming pawh a sawi bo der bawk. Pu Lalkhama pawh hian Pu Lalduhoma'n a hming a sawi bo hlauh mai hi mak a ti hle nghe nghe a ni, a ti.

MNF President chuan Chief Minister chu Inremna ziah kawngah a hrechiang ber leh a thawhhlawk taka insawi chung si a, sawi bawrhban a tum leh si chu hriatthiam har a tih thu a sawi. Hriat loh vanga sawi sual hi chu a hriatthiam theih a, hre reng chung si a, sawi dik loh luih hi chu ram hruaitulu ber tih loh tawp tur a ni, a ti bawk.

He huna thusawidu dang, Dy. Chief Minister hlui Tawnluia pawhin Mizoram-in remna leh muanna a neih theihna atana hmalakna a nep zawnga sawi an awm chuan hma an lak zel tur thu a sawi a, kha Peace Accord kha India sawrkar, Mizoram sawrkar leh MNF ten an ziah a ni a, Home Ministry leh MNF ten an ziah a nih loh thu a sawi, a tul anih ram tana thih a la inhuam reng thu a sawi bawk.