*PROVINCIALISED SIKULTE DINHMUN A THA DAWN EM? NEUTRAL THLIRNA ATANGIN*

*PROVINCIALISED SIKULTE DINHMUN A THA DAWN EM? NEUTRAL THLIRNA ATANGIN*

 Tuna Adhoc sikul tam takin Provincialised ve an nih loh avanga an nawrhna hi ngun takin ka han zir chiang a. The Mizoram Education (Lumpsum Grants-in-Aid for General Maintenance of Private School) Rules, 2026 (GiA Rules tiin ka sawi tawh ang) leh Adhoc rules awm lai mek bakah sorkar sikulte khaikhinin zawhna ka han chhang teh ang.

 1. Adhoc sikul dinhmun hi a tlahniam em?

*Chhanna:* Zirtirtu ten an beisei, Sorkar Zirtirtu nihna atang chuan an tlahniam. GiA Rules hnuaiah Adhoc zirtirtu an nih lai aiin an hlawh a sang chho daih a, dinhmun sang zawkah an awm ve tho. Sikul erawh chu khawtlang kutah a awm leh tho a, a dinhmun a ngai reng. An hming erawh a danglam.

 2. Provincialised sikulte hian sikul building sakna tur an hmu ngalin sikul a that phah nghal dawn em?

*Chhanna:* Pu Mathlana, Minister-in a sawi angin sorkar sikul awm sa sak that ngai 300 rual hnungah an intlar dawn a. An MLA te an huaisen viau a nih loh chuan kum 8-10 vel tal chu an nghah a ngai mai lo maw? Chutih lai chuan GiA sikulte chuan *kum tinin* Rs.35.40 lakh (HSS), Rs.15.40 lakh (HS) leh Rs.12 lakh (MS) thlengin sikul sakna tur an dawng thei dawn. GiA sikulte chu sorkar sikul tam takin an awt thuaiin ka ring. Tuna Special Category 2 a hlan tharte pawhin nuai tam tak sikul sak nan an hmu dawn a, a tangkai khawpin ka ring.

 3. GiA Rules thar avang hian thingtlangah zirnain a chhiat phah ang em?

*Chhanna:* High School zirtirtu pakhatin min hrilh dan chuan High School zirtirtu sanction post 59% a ruak mek a. An indaih lo hle mai. Provincialised thar sikulte hian pension tur an kawl nual a. Rei lo teah zirtirtu indaih lo sikul an ni nghal mai dawnin ka hria. Adhoc sikul te hi chuan thla 2 chhungin a thar an nei leh mai ten ka hria a. GiA Rules hnuaiah pawh khawtlangin zirtirtu thar an la leh mai dawn a. Spl Cat 1 ah zirtirtu an indaih zel ang a, sorkar sikul an nih hnuah an indaih lo sawt dawn, a khawi zawk hnuaiah nge zirnain a chhiat phah zawk dawn?

 4. Provincialisation hi tu te tan nge a hlawk ber?

*Chhanna:* A chiang reng a. Zirtirtute tan a hlawk ber. An hlawh a san bakah medical bill an reimburse thei dawn. Sikul erawhin a hrana building sakna tur an buaipui leh a ngai dawn a. Adhoc zirtirtu ten provincialised loh an lak nat em em chhan pawh hi awm ka tihpui hle.

 *Tlipna:*

Sorkar hmasain beiseina neia a lo upgrade tawh hi chu titlang mai se a tha ka ti ber. Provincialised loh sikulte erawh an dinhmun a tlahniam ka ti lo thung. An hlawh a sang a, khawtlangin sikul sakna tur an nei dawn bawk a. Minister hi inphah hniam se la, sawiho ngam se ka ti ber mai.