MZP-IN MPSC SIAM THAT HNATLANG KO; OTR TIHTAWP LEH REFORM COMMITTEE DIN AN PHUT

MZP-IN MPSC SIAM THAT HNATLANG KO; OTR TIHTAWP LEH REFORM COMMITTEE DIN AN PHUT

><}}> Dr. John, 7.8.26

Nimin August 6 khan Mizo Zirlai Pawl (MZP) leh MPSC hnuaia hna zawng harsatna tawk (aspirant) hrang hrangte chuan Mizoram Public Service Commission (MPSC) hnuaia exam hrang hrang a fel tawk loh avanga zirlaite leh Mizo thalaite harsatna tawh chungchang sawihoin MPSC siam that hnatlang an ko.

Hnatlang hi August 6 leh 7 hian MPSC kawtah neih tur a ni a, MZP chuan Mizo thalai hna zawng mekte, MPSC avanga harsatna tawk mekte leh MPSC a harsatna tawk mekte bakah MPSC siam that duhtute zawng zawng tel turin an sawm a ni.

 

MZP chuan One Time Registration (OTR) chu tihtawp an phut a, a tul dan azira application form siam ni se an ti bawk a. OTR a document upload kim loh avanga reject zawng zawngte offline-a document te thehluhna hun siamsak an phut a. Written exam-a tling tawh, OTR a document upload kim loh avanga reject tawh te tan offline-a document thehluhna hun siamsak an phut bawk a. Mizoram Public Service Commission (MPSC) kalphung siam that vek phutin, sawrkarin reform committee/commission din se tih an phut bawk.

 

MZP hmalakna hian awmzia a nei lo a nih chuan zirlai hna zawng mekten an dikna chanvo an hmuh theihna tur leh MPSC zahawmna humhim a nih theihna turin a tawp thlengin ke pen zel an tum a ni.

 

ZIRLAI TEN MPSC-A RINNA AN NGHAH THEIH NAN MZP CHET CHHUNZAWM ZEL TUM

Mizo Zirlai Pawl, General Headquarters huaihawtin vawiin August 6, 2026(Ningani) khan Mizoram Public Service Commission (MPSC) kawtah pungkhawmin, chawhnu lam dar 2:00 khan an Call Off rih.

MZP chuan, Zirlaite leh thalai hna zawng mekte'n a MPSC-ah rinna an nghah leh theih nan thil phut hrang hrang an nei a, hengte hi a hlawhtlin hma loh chuan protest hi neih chhunzawm zel an rel a, naktuk hian a hun leh hmun ngaiah punkhawm leh nise an ti. 

Zirlai leh thalai hna zawng mekte'n a MPSC duhkhawp lohna  social media kaltlang ringawt a sawisel loin, a taka che chhuak ve turin MZP chuan an sawm.

MZP chuan vawiin hian MZP Headquarters, Manipur Vice President James Vanlalhluna'n chatuan ram a pansan thu an hriat avangin kan tuar takzet tih thuchhuah an siamah an tarlang a, a boral thu hriat rualin Protest hi call off nghal a nih an ti bawk.