PRESIDENT DROUPADI MURMU-IN INDEPENDENCE DAY 2026 LAWMNA NEW DELHI-A NEIH TURA TEL TURIN MIZO HMEICHHE PA 3-TE A BIK TAKIN SAWM

 PRESIDENT DROUPADI MURMU-IN INDEPENDENCE DAY 2026 LAWMNA NEW DELHI-A NEIH TURA TEL TURIN MIZO HMEICHHE PA 3-TE A BIK TAKIN SAWM

><}}> Dr. John, 1.7.26

President Droupadi Murmu chuan kumin India Independence Day lawmna New Delhi-a neih tura tel turin, a bik takin Mizo hmeichhe pa 3- Lalnunsangi, Lalawmawii, leh Vanlalthachungnungi te a sawm a ni.

 

Pi Lalnunsangi hi Champhaia cheng a ni a. India President zahawm tak, Draupadi Murmu hnen atangin Independence Day lawmna, At Home' Independence Day Reception, Rashtrapati Bhavan a neih tura tel turin sawmna a dawng a. Lalnunsangi hi chhiatrupna thlen thulh-a chhanchhuah leh chhawmdawl hnathawh kawnga thawhhlawk tak a ni a. Yuva Aapda Mitra Scheme leh My Bharat kaltlanga hmalakna hnuaiah mipuite tan tangkai takin a thawk thin a. Champhai district a thalai la naupang zawkte thil tha tih kawnga kawhhmuhtu niin chhiatrupna thlen thulh-a lo inven lawk dan bakah chhanchhuah leh chhawmdawl hnathawh kawngah a thawhhlawk hle a ni.

 

Nl. Lalawmawii hi Reiek khua, Mamit District-a cheng a ni a. India President zahawm tak, Droupadi Murmu hnen atangin Independence Day lawmna, At Home Independence Day Reception, Rashtrapati Bhavan a neih turah a bik taka sawmna a dawng a. Lalawmawii hi Reiek Block-ah Women and Child Development Department hnuaiah Integrated Child Development Services (ICDS) Block Coordinator a ni a. Aspirational District chhunga Aspirational Block aiawh a nih angin, nu leh naupang hriselna tihhmasawn kawngah a inpekna a ropui hle a, naupai lai te, naupawm te leh naupang kum 6 hnuai lamten chaw ṭha an hmuh ngei theih nan leh an hriselna dinhmun uluk taka vil zui kawngah hna pawimawh tak a thawk a ni.

 

Nl. Vanlalthachungnungi hi Khuangpuilam khua, Kolasib District-a cheng a ni a. Prime Minister Flagship Programme DDUGKY (skill development) hnuaia MZSRLM kaltlanga, kum 2024-a training chhuak a ni. He Scheme kaltlanga training chhuak tawh, hnathawk ṭha leh hlawhtling te chu India ram State pa 6 atangin pa 1 theuh thlan chhuah an ni (Nagaland, Madhya Pradesh, Chhattisgarh, Odisha, West Bengal leh Mizoram). India rama Five Star Hotel lian leh lar tak, The Leela Ambience Convention Hotel-a Front Office Associate hna thawk mek a ni. Leela Hotel hian Kum tin India leh Khawvel huapin Hotel Tha Lawmman engemaw zat a dawng fo thin a. Kumin 2026 ah phei chuan, “Khawvela Hotel Tha ber Lawmman Pa 2-na” (2^nd World’s Best Awards – 2^nd Best Hotel Brand in the World) a dawng nghe nghe a ni.  Hetiang Hotel changkang, lian leh hmingthaa Mizo nula a thawk thei hi kan chhuang em em a ni.