MIGAHTA-IN SORKAR NOTIFICATION HAL - VAWIIN ATANGIN TIAMCHIN AWM LOVIN MASS CASUAL LEAVE LA DAWN

MIGAHTA-IN SORKAR NOTIFICATION HAL - VAWIIN ATANGIN TIAMCHIN AWM LOVIN MASS CASUAL LEAVE LA DAWN

><}}> Dr. John, 6.8.26

MIGAHTA chuan, Sorkar-in dinhmun hniam zawka a dahna Notification chu Nimin August 5 khan, School hrang hrangah an hal a. Vawiin August 6 atang hian, tiamchin awm lovin Mass Casual Leave an la dawn. He Notification hi a tawp thlenga dodal an tum a ni.

 

Mizoram Govt. Adhoc Aided High School Teachers' Association (MIGAHTA) huaihawtin Nimin August 5, 2026 khan, Mizoram hmun hrang hranga Adhoc High School 90 chuangah Adhoc High School-te dinhmun hniam zawka dahna Notification an hal a. Vawiin, August 6 atang hian tiamchin awm lova Mass Casual Leave lak an tum.

 

MIGAHTA tarlan danin, khaw tam takah he Notification halna hun hi Managing Committee, All NGO leh VC-ten an hmanpui a ni. Provincialised an nih tawh ang ngeia Provincialised dinhmuna dah let leh tura Sorkar an nawrna leh tuna an dinhmun Adhoc-grant-in-aid atanga dinhmun hniam zawk Lump-sum-grant-aid (Category S-1)-a Sorkar-in dah a tumna dodalin lungawi lohna July 21, 2026 atang khan an lantir tawh a ni.

 

Hetianga Sorkar kara lungawilohna an lantir mek laiin, July 29, 2026-a Vanapa Hall kawta sit-in demonstration an neih tumin, MZP palaina hnuaiah, Education Minister hriatpuinain Sorkar aiawh Adviser to CM Lalmuanpuia Punte, ZPM Vice President ni bawkin a sawm angin, a Office-ah MZP hriatpuinain inbiakna boruak tha tak hnuaiah an nei a ni.

 

Inbiaknaah, Sorkar laka lungawilohna an lantir mek chu titawp tura ngen an ni a, Sorkar laka an lungawi lohna leh an thilphut hrang hrang an sawite chu August 12, 2026-a PAC meeting-a ngaihtuah a nih tur thu Adviser to CM-in a tiam ang leh Sorkar nen inbiakna an neih leh hma chuan Adhoc High School-te dinhmun hniama an tlakna tur Category S-1 Notification pawh tichhuak rih lo tura Thuneitute ngensak tiam an nih avangin, Sorkar ngenna zahawm an tih avangin July 30, 2026-ah khan Sorkar laka lungawilohna an lantir mek sit-in demonstration chu an call off ta rih a ni.

 

Hetianga an chungchang PAC meeting-in a rel tur an ngaihchan lai leh an ngen anga Adhoc High School-te dinhmun hniama an tlakna tur Category S-1 Notification tichhuak lo tura an ngaih laiin; an inbiakna bawhchhia a, Notification tihchhuah hnan an duh lohna entirnan he Notification hi an hal ta a ni.

 

Nimin August 5-a MIGAHTA Executive Meeting chuan, Sorkar-in provincialised dinhmunah dahlet leh turin an phut a, tuna an dinhmun Adhoc-grant-in-aid atanga dinhmun hniam zawk Lump-sum-grant-aid (Category S-1)-a Sorkar-in a dahna Notification August 4, 2026-a a tihchhuah tawh hi cancel a nih hma chuan, Vawiin August 6, 2026 atangin tiamchin awm lovin Mass Casual Leave an la dawn a. Tin, August 7, 2026 khian, Mizoram hmun hrang hranga Adhoc High School-te chuan anmahni veng leh khua theuhvah School dinhmun tlakhniam tir an nih chungchangah Managing Committee, VC leh All NGO te nen Joint Meeting nei turin ruahmanna an siam bawk a ni.

 

MIGAHTA chuan, School dinhmun a hniam zawnga indahsak hi an pawm thei ngai dawn loh thu leh a tawp thlenga an dodal dawn thu an tarlang a ni.