LOK SABHA LEH 𝗥AJYA 𝗦ABHA-𝗔𝗛 𝗩𝗔𝗡𝗗𝗘 𝗠𝗔𝗧𝗔𝗥𝗔𝗠 𝗛𝗨𝗠𝗛𝗔𝗟𝗛𝗡𝗔 𝗗𝗔𝗡 𝗣𝗔𝗦𝗦

 LOK SABHA LEH 𝗥AJYA 𝗦ABHA-𝗔𝗛 𝗩𝗔𝗡𝗗𝗘 𝗠𝗔𝗧𝗔𝗥𝗔𝗠 𝗛𝗨𝗠𝗛𝗔𝗟𝗛𝗡𝗔 𝗗𝗔𝗡 𝗣𝗔𝗦𝗦

><}}> Dr. John, 1.7.26

Parliament Monsoon session neih mekah nimin khan Rajya Sabha chuan 'The Prevention of Insults to National Honour (Amendment) Bill, 2026' chu voice vote in a pass a, national song 'Vande Mataram' sawichhiatna chu dan bawhchhiatna leh thubuai awrh theihna a ni tawh dawn a ni.

Upper House-ah hian chawhma lamah rorel hleithei lova ṭum hnih zet tihtawp a nih hnuah chawhnu lam session ṭan a ni a, deputy chairman Harivansh Narayan Singh chuan member te chu House-ah nungchang mawi vawng reng turin a chah a ni. Bill sawihona hun a inṭan chiah tihin oppostion te chuan bengchheng an siam zui leh a, NEET exam paper leak chungchangah Delhi khawpuia nawrh huaihawtte laka police-te chet danah union home minister Amit Shah chu sawifiah turin na takin an phut a ni.

Dy chairman chuan member te chu House kalphung pangngai zawm tur leh bill sawihona huna tel turin a sawm a, mahse eptu party te chuan an thil phut chu an sawi chhunzawm zel thung. Hemi karah hian union minister of state for Social Justice and Empowerment Ramdas Athawale chuan dan siamna tur proposal a neih laiin eptute chuan House an chhuahsan a ni.

Bill chungchangah union minister of state for Home Affairs Nityanand Rai chuan Congress party te chu national song 'Vande Mataram' sawichhiat tumah a puh a, India in zalenna a sual laiin hmun tam takah ram tana an nunna hlantuten an thih dawnah 'Vande Mataram' tih an chham niin a sawi.

He bill hi July 24 khan House-ah pharh a ni a, bill hian 'Vande Mataram' chu hnam hla, 'Jana Gana Mana' ang bawka humhalh tura tih a ni. Dan thar pass takah hian ram tana chhinchhiahna flag zahlohna te, constitution leh national anthem zahlohna te chu kum thum thleng lungin tan theihna a ni bawk ang.

𝗟𝗼𝗸 𝗦𝗮𝗯𝗵𝗮-𝗮𝗵 𝗯𝗶𝗹𝗹 𝘁𝗵𝗮𝗿 𝗽𝗮𝘀𝘀

Lok Sabha lamah 'Public Examinations (Prevention of Unfair Means) Amendment Bill, 2026' chu nimin khan voice vote tho in pass a ni ve bawk. Leader of Opposition Rahul Gandhi leh Parliamentary Affairs Minister Kiren Rijiju te chu he bill sawiho lai hian na tak takin an inchhang a, Rahul hian zirlai pungkhawmte kut thlak turin union home minister Amit Shah chuan police te thuneihna a pe tih leh RSS te chuan Indian education system an tichhia tih a sawi avangin House boruak a sosang hle a ni.