Ringtu Dik Tak I Ni Chiah Em? In Enfiah Rawh Le (Golden Rules For Godly Living)

1. THUHMAHRUAI

Kan Thupui Innghahna Exodus 23:1-9 thu hi a pawimawh êm êm a. A chhan chu hei hi a ni - Ringtu inti-te hian Pathian nen-a kan inkâr a ţhat leh ţhat loh Sawifiah turin Hmuhtheih-a Example kan pêk theih zinga chiang ber leh fiah ber chu kan “MIHRINGPUITE NEN-A KAN INKÂR ŢHAT LEH ŢHAT LOH” (our mutual relationship with fellow human beings) hi a ni. Hei hi Lal Isua’n chiang takin min hrilhfiah a, “Anmahni chu an rahah in hre mai ang. Hruihlingnei kungah grep rah an lo ngai em ni? Lenhlingah pawh theipui an lo ngai em ni? Chutiang bawkin thing tha apiang a rah tha thin a; thing chhia erawh chu a rah chhe ţhin. Thing ţha a rah chhe thei lo va, thing chhia lah a rah ţha thei hek lo. Chuvangin, anmahni chu an rahah in hre mai ang” tiin (Mat.7:16-20).

Mi chu thusawi thiam engang mahse, experience nei ţha engang mahse, Pathian thu rîl leh thûk te hre hnem engang mahse, Pathian faka lâm leh thilpekah tluk chi ni lo mahse, rawngbawlnaah dinhmun sâng leh ţha zawng zawng chelh kim vek mahsela, a nungchangin belhchian a dawl lova, a chenpui te, a rawngbawlpui te, pawnlam mite (kohhran dang leh ringlote) nena an inkârah thil fello a awm tlat chuan, Pathian nena an inzawmna pawh a ţha chuang hauh lovang tih hi thil chiang sa a ni.

Kan Thu khel tur hi Ringtute tâna Nun Duhawm, Midangte tâna Malsawmna Nun leh Nun-Chhenfâkawm a nih avângin “Ringtu Nun Rangkachak” (Golden Rules for Godly Living) tiin ka vuah a ni. Rules a tam deuh hlek a, Rules ţhenkhat chu kan kai-kawp mai ang a, a tawi zawnga chhui kan tum na a, a tawi thei vak lo. Mahni nun-ah ţheuh seng-lut ila, Ringtu dik tak i ni chiah em? tia Mahni in-zawtin ngaihtuahna seng zui zel bawk ila a ţha ang.

2.1. THUDIK LO SAWI CHHAWNG SUH

Ex.23:1, “Thuthang dik lo chu i sawi chhâwng mai mai tûr a ni lo ve.” Bible hian Thudik chu sawichhawng a, sawidarh tura min phut laiin, Thudik lo, Thuthang dik lo phei chu sawichhawng miah lo turin min ti a ni. Tuteemaw chungchânga Dâwt kan sawi hian, an hun kal tawh, kal mêk leh lo la awm tur thlengin kan tih-chhiat sak vek thei a ni.

Chuvangin, Pathianin Dâwt sawi hi a haw hle a, Dâwt hmangten Pathian ram an luah dawn lova, “Pawnah chuan… dâwt ngaina leh dâwt hmang apiangte chu an awm” a lo ti tawp tawh a ni (Thup.22:15). Paula pawhin Pianthar hmaa ze chhe tak-te kha bânsan turin min hrilh a, “In hmân lai awm dân kawnga mihring hlui, bumna châkna anga chhe deuh deuh kha hlîp thla ula. Chutichuan, dâwt sawi bânin, mahni ţhenawm hnenah thu dik tak sawi ţheuh rawh u; inpeng tawn ţheuh kan ni si a” (Eph. 4:22,25) tiin.

Dâwt sawitu chuan AMAH a intihchhiat bâkah, MIDANG a tichhe tel nghal bawk hi a pawi ber lai chu a ni. Tin, Amah mai bâkah, a Rawngbawlpui leh a Ţhian-te leh a Hnathawhna hmun (colleagues, friends & organization) thlengin a ti-hming-chhe tel thei hi a pawi leh-zual lai tak chu a ni bawk. Tuemaw-in, “PASTOR LEH UPATE HI KA RING THEI TAWH LO. DÂW-HEH AN NI. ANNI’N VANRAM AN KAI CHUAN KS LEH TUALTHAT-TE PAWH VANRAM AN KAI VE THO ANG” tia hmusit taka a sawi i hriat chuan, Pastor leh Upa zawng zawng kha Dâw-heh an ni a, an sual a tihna a ni kher lo. Pastor leh Upa ţhenkhat-ten Dâwt sawi an chin avâng leh an tenawm êm avângin Pastor leh Upa dang rêng rêng pawh a hmuh-chhiat phah vek tihna a ni zawk.

2.2. MISUAL ZINGAH TEL SUH

Ex.23:1b, “Hretu fel lo tak nihna tûrin mi suaksual zîngah chuan i kut chu telh ve suh.” Helai thu hian, Hlâwkna kan lo têl ve theihna tura Misual (thil ţha lo tih tum tupawh) thurualpui, ţanpui leh an rorelnaa va tel, thil ţha lo an tih theih nân-a rilru, kut, leh tha leh zung va thawh emaw, misual 2 emaw, a aia tam emaw inthuruala thil sual an tihnaa taksa ngeia va tel ve lam kha a kâwk a ni.

Tunah hian, Dân lova kan rama lo lut ţhin, Ram-dang mite (Foreiner/India mi ni lo) lo hum leh lo ţanpui hi a hlauhawmna leh a pawina kan hre kher lo mai thei. Vai, ILP nei lo lo hum te, Ram-dang mi (Indian anga lo insawi-te) lo hum leh lo ţanpuite (harboring & abetting foreigners) hi Pathian pawi khawihna leh India Dân Bawhchhiatna leh Sorkar dona lian tak a ni tel nghal a ni. Heng Ram-dang mi Dân lova kan rama lo lut te hi Bible-in Misual a tih category zinga tel an ni.

Ţhenkhat chuan Ram-dang mi ni reng siin, India-ah Birth Certificate, Driving License leh Indian Passport thlengin an nei vek tawh. Heng zingah hian Rawngbawltu pawimawh tak tak pawh an tel nia! Râpthlâk tak a ni!!! Ringtu dik tak an nih chuan, Dâwt sawi lovin, an nihna dik tak (True Identity) nen, Visa leh ILP pangngai leh dik takin kan ramchhungah an lutin an chhuak mai tur a ni.

Ţumkhat chu Phaia ka awm lai khân, Hnam-dang mi pakhat hian Birth Certificate leh Driving License leh Indian Passport siamnaah ţanpui turin min sawm a, pawisa pawh tam tham tak min pek a tum a. Mahse, ka hnial fithla tawp a. A thiltih tum dân chu Bible leh India Dân kalh a nih avânga ţha ka tih loh thu pawh tlang takin ka hrilh nghal hmiah mai a ni.

2.3. THIL SUAL TIH TUM MIPUI CHU ZUI SUH

Ex.23:2, “Thil sual tih tumin mipui chu i zui tûr a ni lo va; Thubuaiah pawh a tam lam, a dik lo zâwk lamah chuan i ţang ve mai tûr a ni hek lo.”  Helai thu hian, Thil dik tak duh avânga thiltih ni lem lova, Hruaitu (leader)-in a hruai-sual vang emaw, Hruaitu nei lem lo, Mipui Să-hăwk (Mob)-in thil ţha lo an tihnaa taksa ngeia va tel ve emaw, lam a kâwk ber a ni.

Mipui Să-hăwk (Mob) thiltih hian thil ţha lam aiin, thil ţha lo tam tak an khawih pawi zawk ţhin. Mob thiltih-ah rêng rêng chuan (a vai chuan a ni lo), Thil ţha tih duhnaa bul an ţan pawhin dik tawk lo (fel-hlel deuh) a lo inzep leh ţhin bawk. Hei vang hian Pathian Kut leh Roreltu Thuthlûkna nghâk duh lova, Mipui thinrim, ngaihtuahna fim tawh lo, a chhe lam hlir ngaihtuah tawh pungkhawm (Thil sual tih tum mipui) chu ringtuten kan zui loh leh an zinga kan telloh hi a him ber a, chu chu Bible-in min zirtir a tum chu a ni.

Bible aţangin Example la chhuak ila. Juda Mipui Să-hăwk (Mob)-in Uirenu den-hlum tura an rawn hruai lai khân, Juda Dân hmanga dik taka rorelsak tum-a thil ti an ang a. Mahse, a nihna takah chuan, Mipa kha an hum duh vang nge??? Hmeichhia leh Mipa kha den-hlum ve ve tur an nih laiin, Hmeichhia chauh an rawn hruai a nih kha!!! Bible Scholar ţhenkhat chuan, kha thil dik lo tak mai kha Lal Isua’n awlsam taka Uirenu a chhanchhuah theih phahna chhan lian tak pawh a niin an ngai (See Johana 8).

Juda Mipui Să-hăwk (Mob)-in Stephena an den-hlum chungchângah pawh khân, Stephena’n Judate chungchâng a sawi-ah khân Thudik lo leh Dâwt pakhat mah a tel lo. Juda mipui thinrimin an den-hlumna chhan tak zawk chu,,, STEPHENA KHÂN THUDIK TAK, JUDATE SUALNA KHA UALAU TAKA A SAWI CHHUAH AVÂNGIN NÂ AN TI ÊM ÊM A, AN THIN A KHEI TA A NIH KHA!!! (Tirh.6 & 7). Stephena den-hlumna tura Juda Sakhaw Hruaitute aiawha Thutlûkna siamtu leh Hriatpuitu (Authority & Witness) Saula khân, Juda Mipui Să-hăwk (Mob) thiltih kha a dik lohzia a hriat-fiah hnu chuan a piangthar ta a, a hming pawh Paula tia thlâk a ni a, Stephena Thuhrilh (Lal Isua) kha Thupui-berah a nei ta nghe nghe a nih kha.

Mipui Să-hăwk (Mob) rilru hi a fîm lohzia Bible-in a tarlang chiang khawp mai, “MIPUI CHU EI LEH IN TURIN AN ŢHU HLAWM A, INFIAM TURIN AN THO LEH A… INKHAWMNA INAH-TE AN HNAWNTIR ANG CHE U A; A NI, TUPAWH A TIHLUM TUR CHE U APIANGIN PATHIAN CHUNGAH THIL ŢHA TIIN AN INHRIA ANG, CHUTIANG HUN CHU A THLENG DAWN” (1Kor.10:7, Joh.16:2), tih a ni a. Lal Isua Ropui taka Jerusalem-a a luh laia “HOSANNA!!!” tia autu Mipuite bawk kha, a hnu lawkah “KHENGBET RAWH” tia autu an ni leh mai a nih kha.

Chuvangin, Hruaitu leh Fuihpawrhtu an nei emaw, nei lo emaw, Tuteemaw tihchhiatna tura Mipui emaw, Pawl emaw (a Tam lam chu dik tura i ngaih avânga) an Thiltihnaa i tel ve a, i lo inrawlh ve a nih ngat chuan Chunglam khian i chungah Action a rawn la ve ngei ngei dawn a, i him bik hauh lovang. Mipui Să-hăwk (Mob) kha i lo zui ve ngawt ang e.

2.4. MI RETHEI DIK LO TAKIN RO RÊLSAK SUH

Ex.23:3,6, “Mi rethei pawh a Thubuaiah i ţan bîk tûr a ni hek lo. I Mirethei chu a Thubuaiah dik lo takin i rêlsak tûr a ni lo.” Helai thu hian Roreltuten (Magistrate/Police/Khawtlâng Hruaitu, Tlawmngai Pawl Hruaitu leh Kohhran Hruaitu, Roreltu Ţanpuitu) Miretheite chunga Rorelna dik an ken-kawh a ţulna chungchâng a kawk ber.

A sawi tum erawhchu a chiang tawk viau-in a lang. Mirethei chu a lan dâna a lainatawm leh a khawngaihthlâk êm avangin, khawngaih phu-a ngaiin a dik lohnaah pawh hrem duh lova, chhuah zalen mai tur a ni bik lova, Rorelna fel tak leh dik tak chu a chungah hlen ngei ngei tur a ni (Lev.19:15). Pawnlam lang thei leh hmuh-theih ringawt hmangin Rorelnaah Thutlûkna siam loh tur a ni. Hetihlai vek hian, Miretheite hi khawvelah chuan hnehchhiah, hmuhsit leh enhniam an ni a (Sam 12:5, Amos.2:7, 4:1). An chungchâng thu relnaah pawh ngaihsak loh leh nâm-nul an awl hle a, mihausa leh miropuite angin tute thinlungah mah thu an sawi thûk lo. Hetiang hi an dinhmun a nih avâng hian Pathianin a ngaihsak a, Rethei te, Pachhia te, Hmeithai te, Pa nei lo te tân Pa a nih thu te, an lama a ţan tlat zia-te a sawi chamchi a ni (Deut.14:29, 24:17, Sam 6:5, 72;4, 82:3,4, Thuf.29:14, 31:5, Jer.22:3, Zak.7:10).

Kan ramah pawh hian Mirethei te, Pachhia te, Hmeithai te leh Pa nei lo te hian an chanvo dik tak hi an chang chiah ang em aw? tih hi Zawhna lian tak a ni. Mizoram chu hawina lam apiangah Kohhran Biak In hmuh tur a awm a. Inkhawm turin kan inpel suau suau a. Kohhran rawngbawlna peng hrang hrang lah a tam! Zoram-pawn lama Missionary kan tirh-chhuah te, kan Mission Budget te leh Tualchhung Kohhran tâna kan sen zozai te hi ava tam êm!!!

Hetih lai hian, Pathian Thiltum (God’s Mission) pawimawh tak mai, kan bula awm mêk, “Rethei te, Pachhia te, Hmeithai te, Pa nei lo te an Hrehawm laia Kan leh Ngaihsak hi Kohhran leh Ringtute hian kan ti-ţha tawk em aw?” tih erawhchu inchhût fê tham a awmin ka hria (Tirh.6:1,Jak.1:27). Kohhran Pawl (denomination) ang chuan in-chhuichian leh in-enfiah a hâr deuh a nih pawhin, Ringtu-mimal nangmah khân i tih tur hi i ti chiah em le??? tih hi a pawimawh.      

2.5. I HMÊLMA/A HAWTU CHE ŢANPUI RAWH

Ex.23:4-5, “I Hmêlma Sebâwngpa emaw a Sabengtung emaw bo i hmuh chuan, a hnênah i khalh hâwnsak leh ngei tûr a ni. Nangmah hawtu che Sabengtung a phurin a delh beh reng i hmuhin, puih duhna rêng nei lo mah la, i pui ngei tûr a ni”

A chunga Bible sawi tum khi a chiang leng-lawng hle. Kan hmêlma, kan chhiatna tur zawng char char-tu, kan thih hial pawh duhtu pawh nise, Phubâ la mai lova, Ţanpui an ngaih hun apiangah chuan ţanpui zel turin Bible-in min ti a ni. Pathianin Amah Ringtute hi he khawvelah hian “DANGLAM” tura min beisei tlat avângin khawvel mite tih-loh-dân anga thil kan tih hi a ţul tlat si!!!(Rom 12:1-3). Thuthlung Thar Zirtirnaah phei chuan a chiang lehzual a. Lal Isua Zirtirna zawm hi kan tih-tur awmchhun a ni a, tuna hmang thei rih lote pawhin hmang ngei tura ţan kan lâk a ţul a ni.

Lal Isua’n Thuthlung Thar Zirtirna Danglam tak a rawn Au-chhuah-pui a, Matthaia 5:43-44, Luka 6:27-ah, “I Hmêlma hmangaih la, a tiduhdahtu che chu Ţawngţai sak rawh u, a hua che u chu an ţhatna tur ti ula,” tiin. Hei hi Tirhkoh Paula pawhin a rawn Chhun-zawm a, Rom 12:20-ah, “I hmêlma a rilţâm chuan ei tur pe rawh, a tuihâl chuan in tur pe rawh. Chutianga i tih chuan a lu chungah meiling i chhêk-khâwm a ni ang,” a rawn ti ta a ni. Ringtu Dik tak tân chuan Hmêlma leh min Hawtute Beih-let ve lam emaw, an Chhiatna tur zawn lam emaw chu a lang ta lo hrim hrim mai!!!

LAL ISUA ZIRTIRNA (THUTHLUNG THAR ZIRTIRNA) HI THUTHLUNG HLUIIN BEISEI TAKA A LO THLIR KHA A NI. Chuvangin, Ringtu Dik tak, Ringtu-Nun Chhenfâkawm Neitute chuan hetiang lam hawi Testimony sawi tur hi in nei ţeuh ang. Kei pawhin hetiang lam hi ho te-te ka tawng ve tawh. Dâwt hmangin Misual hovin min bei a, ka Eizawnna leh Rawngbawlna min tih-chhiat sak vek a. Ka future thlenga min tihchhiat sak vek tumin ţangrualin hman theih zawng zawng hmanruaah an hmang a, Jail ka thlen phah hial.

Thil mak tak mai erawhchu, Jailah pawh khân rilru hâhna chhetê mah ka nei lova, ka mut a tui êm êm a. Jail-Chaw tui lo zet, Alu chhum, Dailuah dal êm êm, Chi leh Hmarchâ chauh kan hmeh ţhin na a, ka chaw-ei kha a tui lutuk mah mah a, ka thau kung kung mai!!! Daniela-te Ţhian-za-ho kha ka hre chhuak!!! Khatihlai khân tisa takin bei-let ve duh ta ila… tih-theih chu ka nei ve lutuk a ni. Mahse, Ringtu ka nih avângin Lalpa ka nghâk a, ngawi rengin ka tuar a. Misualho duh dân anga thil a thlen vek erawhchu Lalpa’n a phal lo. Tunah chuan Hnehna chu Lalpa ta a nihzia a lang chiang tawh hle.

Dâwta sual tinrenga min hêk laia LAWMNA MIN PETU LEH LALPA KUTA ENGKIM KA DAH THEIHNA CHHAN THURUK chu ahnuaia Bible Chang 3-te hi an ni:-

(1). “Phubâ la suh ula, Pathian thinurna kian zawk rawh u, Phubâ rêng rêng keima lâk tur a ni, keiman ka thungrul ang, Lalpa’n a ti” (Rom 12:19),

(2). “Phuba reng reng Keima lak tur a ni, Keiman ka thungrul ang. Lalpa chuan a mite a ngaihtuah ang” (Heb.10:30),

(3). “Keimah avânga an hau che u a, an tihduhdah che u a, Dâwta sual tinrenga an hêk hunah che u in eng ala thawl ang” (Mat.5:11).

Lalpa Kuta Engkim Dah chu a ţha-in, a lo hahdam-thlâk kher mai. Hetiang ang Thilthleng aţanga Thil chiang êm êm leh Langsâr tak pakhat chu, MIIN (MISUAL LEH MIŢHA) I CHUNGA AN THILTIH AŢANGA I RE-ACTION KHÂN ENG-ANG RINGTU NGE I NIH A TÂRLANG NGHAL A NI. Bible sawi angin, Misualin kan chungah engang thil pawh lo ti sela, ti-let ve lova, phubâ la ve lova, Pathian Kuta dah a, Pathian Thinurna ken zawk hi Ringtute Tih-tur Dik tak a lo ni e.          Pathianin Phuba min laksak dawn tih Bible-in min hrilh chiang hle, “In hmêlma nangmahni beitute chu LALPAN a tihtlawmsak ang che u a; a bei tur che u-in kawng khatah an lo lut ang a, kawng sarihah an tlanchhia ang” (Deut.28:7).

Pathian hian Misualho Hrêm dân, Hrêm chunga khêk dân leh Thungrulh dân chu a lo hre ber mai alawm le, “Lalpa chuan Amah ngaihsaktute chu thlêmna ata chhan chhuah dân leh fel lote chu rorel ni atân chuan hrêm chunga khêk dân a hria; châkna bawlhhlawh kawng tisa anga awm leh rorelsakna hmusittute lek phei chu rorel ni atân hrêm chunga khêk dân a hre lehzual a ni. Ât-huai leh tihmawh an ni a, ropuinate an sawichhiat pawhin an khur ngai lo,” (2Pet.2:9-10), tih Ziak a nih kha.

Ringtute hi Khawvela awm kan ni a, Mihring kan nih avângin, Thilţha lo leh Thil dik lo kan hmuh chuan kan thinrim tur a ni. Mahse, Sual erawh kan sual tel kher tur a ni lova, Pathian nen-a inzawm Ringtu dik tak kan nih chuan, kan Thinur pawh Nî-in a tlâkpui tur a ni lo. Kan Thinur chu Thil sual tih nân leh Thil ţha lo tih nân, Midangte chhiatna turin kan hmangin, thil kan ti tur a ni lo (Ephesi 4:26).   

2.6. THUDIK RAPBETIN, MIFEL TIHLUM SUH

Ex.23:7, “Thu dik lovah zawng inthiarfihlim daih rawh; tin, Mi thiam leh Mi felte chu tihlum suh; mi suaksualte chu thiam ka chantîr dâwn si lo va.”

He thu hi Rorelna Hmun (Kohhran leh Court)-a Thudik sawi a ţulzia leh Thudik ţan tlat a ţulzia a sawina a ni. Bible sawina dinhmun (context) aţanga a landân chuan, Misual, hausa leh thiltithei tak, ho (pawl) nei ţha tak tuemaw-in Mifel chu îtsikin, Tihchiat tumin a phiar-ru a, Dâwtin sual tinrenga puh-in a hêk a. Thudik tawk lo hrang hrang chu Evidence atâna hmangin theih-tawp chhuahin Roreltu chu hneh (convince) a tum a. Heta Thuhretu (witness) atâna a hman leh Evidence atâna a hman-te hi pawisaa thamin, kawng hrang hrangin dâwt sawi turin a hrilh hlawm a ni.

Hetiang dinhmunah tak mai hian Bible chuan, Thudik rapbet a, Mifel chu tihlum (tichhe) lo turin leh Misual lamah hian ţang lo turin thurawn min pe a ni. Khawvelah hian hetiang lam Case, Mifel Dik Lo Taka Thiam loh chantir “WRONGFUL CONVICTION OR CONDEMNATION OF INNCOCENT PEOPLE” lam hi a tam khawp mai. Kan ramah pawh hian sawi duh ta hlawm ila, hetiang lam Case hi sawi tur a tam hle-in a rinawm. Kan huatzawng, kan ngeizawng, kan er leh kan tluk loh, kan îtsik tak te an nih avângin an chhiat theihna turin theihtawpin thil kan ti ve ţhin a, anmahni Beitute lamah kan lo ţang ve a, kan thurualpui ţhin a ni.

Kohhran Intelkhawm Pawl (World Alliance of Reformed Churches) pawhin “SHAMEFUL RECORD OF CONVICTING INNOCENT PEOPLE” tih Thupuia hmangin, UPDATE MAGAZINE, March 2000.Vol.10, No.1-ah khân hetiang lam hi an chhuah nghe nghe. A hnuaia link-ah hian, Misualten In-thurual a, Mifel Dâwta an puh a, an beihna i hmu ţeuh ang, a lungchhiat-thlâkin, a râpthlâk tak zet zet a ni. http://www.forensiccolleges.net/blog/2010/15-shocking-wrongful-convictions/

Bible pawhin Mihringin Thudik a ngaihsak lohzia lungchhe takin a rawn sawichhuak a, “He hnam hi LALPA an Pathian aw ngaithla lova, thununna dawng lo hnam an nih hi, Thudik chu a boral a, an kâ ata paih bo a ni ta.. Ka beng chhîin ka ngaithla a, Tuman thudik an sawi lo, Tuman, eng nge ka tih tâk? tiin an suahsualna an sim hek lo; Mi tinin mahni kawng an hawi ta ţheuh va, Indo hmuna sakawr lîm buan buan ang maiin.. Bumhmang zîngah i chêng a, An bumna avângin kei mi hre duh lo, tih hi LALPA thu chhuak a ni,” (Jer.7:28, 8:6, 9:6).

Bible sawi khi kan ramah pawh hian a thleng dik tak tak ta e, “RORÊLNA CHUAN HNUNG LAM MIN HAWISAN A, FELNA CHUAN HLA TAKAH MIN DINSAN TA: THUTAK CHU KAWTTHLÊRAH A TLU RENG SI A, DIKNA CHU A LÛT THEI LO A NI,” (Isaia 59:14) a tih kha. Khawvelah hian Thudik ţantu leh ngainatu an va tlêm ta êm!!! Zoram hi engnge kan an ve ang le??? Ringtu Mimal, Pawl leh Kohhran hi kan in-enfiah a hun tak zet zet ta e.  

Tirhkoh Paula sawi ang khân, Biak In ţha tak taka Inkhawm fo si, Lâm fo si, Pathian thu zir fo si hian Vanramah hian kan kal lo mai ang tih hi ava hlauhawm ta êm!!!??? (2Tim.3:6-9). Thudik ţantute chuan dem an hlawh a, hmuhsit an ni zui ta zel mai chu a nih hi!!! Zawlnei Jeremiah pawh a beidawng hial kha a ni a, “Thu ka sawi apiangin, ka au chhuak a, 'Inpâwngnêkna leh inramna,' tiin ka au va; LALPA THU CHU KA TÂN CHUAN, NILENGA DEM LEH HMUHSIT HLAWHNA CHAUH A NI,” tiin a indawm-kun ngawih ngawih mai a nih kha (20:8).

2.7. THAMNA RÊNG RÊNG LA SUH

Ex.23:8, “Tin, Thamna rêng rêng i la tûr a ni lo: Thamna chuan khaw hmu lai mitte hi a tihdelsak ţhîn a, mifel thu chu a tihkhawlohsak ţhîn.”

He Bible thu sawi tum hi a chunga kan sawi tâk “Thudik Rapbetin, Mifel Tihlum suh” tih nen-a inzul leh ţangdun, in unau tlat mai thu a ni. Misual chuan, Mifel a tih-tlûk theih nân, a tih-chhiat theih nân leh a tihhlum theih nân, Mihring kha Thuhretu leh Hmanrua (witness & evidence) atân a neih a, a hman ve tho a ngai a. Mipui Să-hăwk (Mob) fuihpawrh tur leh hmanruaa hmang tur pawhin, Mipui Să-hăwk (Mob) kha pawisa-in emaw, thil ţha engemaw-in a tham-lungawi emaw, a kâ a hup-sak (bribe) emaw a ngai tho tho a ni.

Thamna miin a lâkna Chhan leh Midang a thamna Chhan hi Kawng 2 a awm a (Thamna kan tih hian Eirûkna, Hlemhlêtna a huam telah ngai ila):-

(1). Thil dik lo a tih duh vang,

(2). Amah-in tihtheih a neih tawh loh avângin midang a ruai.

Pathianin Thamna hi a haw khawp a, “PAWI KHAWIH LO THAH NÂNA THAMNA LATU CHU ÂNCHHE DAWNGIN AWM RAWHSE, an ti ang a. Mipui zawng zawngin “Amen” an lo ti tur a ni” (Deut.10:17, 27:25), “Thamna hian Mifing pawh mi-â ah a siam a, rilru chhia a puttir a” (Thuh.7:7), “Roreltuten Mifelte tiduhdah tur leh thisen chhuah turin Thamna an la a, an ngiat hial a, Thamna beiseiin ro an rel a” (Ez.22:12, Amos.5:12, Mika 3:11, 7:3), RAM (KOHHRAN PAWH A TEL NGEI ANG CHU!) A CHHIAT-NA CHHAN BER PAWH LALTEN THAMNA AN LÂK VANG A NI TLAT MAI!!! (See Thuf.29:4).

Tichuan, kan Zoram chhunga Sualna leh Chhiatna, Thlarau lama Ţamna thleng mêk te, Sorkar leh Society leh Chhungkua leh Kohhran-te kan chhiat tial tial-na chhan hi kan Sorkar Hruaitu te, Sorkar Hnathawk te, Kohhran Hruaituten Thamna (Eirûkna/Hlemhlêtna/Thamna) an lâk vang a ni mai lawng maw??? A Chhan bulpui ber a nih loh pawhin, a pawimawh ber-te zingah chuan a tel phâk ngei ang (Joshua 7).

Singapore saw Bhudhist ram an ni na a. Thamna, Eirûkna leh Hlemhlêtna a tlêmin, hetiang Case hi an nei tlêm hle a, “KHAWVELA EIRÛKNA TLÊMNA BER RAM 5-NA” (5th Least Corrupt Country) a hauh phâk hial a ni. An Ram pawh saw Crime-ah a hniam a, an Mipui pawh an Ralmuangin an Zalen êm êm a ni. Kristian Ram (USA, Korea, Mizoram, etc.) te aiin Crime Rate a hniam zawk a, Mipui an Ralmuang zawk tlat mai saw!!?? An Hruaitu Mr. Liao Ran chuan, "MIPUITEN DÂN LEH HRAI AN ZAWM ŢHAT ÊM AVÂNG LEH SORKAR HRUAITUTE AN RINTLÂK ÊM (ACCOUNTABILITY) VANG A NI" a ti.

Bible-in, “DIK TAKA LALIN RO A RÊL CHUAN RAM A PHUISUI A, THAMNA A LÂK CHUAN RAM A CHHE ŢHIN” (Thuf.29:4) a tih angin, DIKNA LEH RINAWMNA AN NGAINAT TLATNA CHU SINGAPORE CHAKNA THURÛK LEH AN MAMAWH CHHÂNNA BULPUI-BER (main reason & answer) a ni mai lawng maw? tih hi Thilchhui mite Zawhna lian tak chu a ni ta a ni.

2.8. HNAM-DANG HNEHCHHIAH SUH

Ex.23:9, “Hnam-dang i hnehchhiah tûr a ni lo: nangni pawh Aigupta ramah khân hnam-dang in lo nih tawh avângin hnam-dang rilru put dân chu in hre si a.”

Hnam-dang mi (ram-dang mi) chunga kan rilru put hmang tur leh kan lo enkawl/dawnsawn (treat) dân tur Bible-in min hrilh hi a pawimawh hle. Bible sawi-tum dik tak hrechiang hawt lova “Hnam-dang huat loh tur” tia a pawng a taka lâk-vawng vak chi erawhchu a ni lo deuh.

Pathianin Israel fate hnenah khân Hnam-dang (ram-dang mi) rêng rêng chu ţha taka enkawl a, dawngsawng turin thu a pe thlap a, dik lo taka hneh-chhiah leh sawisak a phal lo (Ex.22:21, 23:9, Lev.19:33,34, 23:22, Deut.14:28, 16:10,11, 24:19). Hnam-dangte hian Israel fate nen-a ang-khata an chan ve theih leh an ţawmpui theih 3 a awm a:–

(1). Serh an tan chuan Kalhlen kût an hmang ve thei ang (Ex.12:48),

(2). Lalpa tâna rimtui meia thilhlan a hlan duh chuan phalsak an ni (Numb.15:14),

(3). Tualtlânna khuaah an tlân luh phal a ni (Numb.35:15).

Amaherawhchu, Hnam-dang (ram-dang mi)-ten an Bawhchhiat thiang miah lo thil 6 a awm a, chungte chu:-

(1). Chawlhni an serh tur a ni, Chawlhni-ah hna an thawk tur a ni lo (Ex.20:10),

(2). Pathian hming an sawichhiat chuan tihhlum tur a ni (Lev.24:16),

(3). Moleka hnena a fa hmanga inthawi chu tihhlum tur a ni (Lev.20:2),

(4). Mutpui loh tur mutpui chu tuithlar tur a ni (Lev.18:26-29),

(5). Sa thi ruang khawihtu chu a bawlhlawh ang (Lev.17:15),

(6). Israel mi leh Hnam-dang mi an inneih-pawlh tur a ni lo (Deut.7:1-6).

A chunga “HNAM-DANG-TE TÂNA KHAPNA THUPEK 6”-te khian, Thil (issue) hrang hrang pawimawh tak tak a huam a, Issue 5-ah ţhenin, hetiang hian Sawifiah ta ila:-

(1). CHAWLHNI SERH & PATHIAN SAWICHHIAT: Hei hi Thlarau lam thil a ni. Kan ram, “Zoram hi Kristian ram” tia kan chhal ngam tak tak dawn a nih chuan, Hnam-dang lo awm (cheng) ve te pawhin Chawlhni hi an serh ve tur a ni a, kan Pathian an sawichhiat chuan an chungah dân kan lek ve ngam tur a ni.

(2). MOLEKA HNENA INTHAWINA: Pathian do zawnga Setana biakna leh a kaihhnawih thil - aien, kutze-en, Vai pathian bân 10 nei biak, etc. tih lama inhnamhnawih chu, Bible sawi angin ‘tihhlum tur’ a ni!!! Aien, kutze-en, Bân 10 nei biak tih vel hi Hnam-dang ten an ching viau tih chu kan hriat sa a ni.

(3). MUTPUI LOH TUR MUTPUI-TE: Uchûak taka Sex hmang- Chhungte hnai mutpui te, Mipa leh mipa (hmeichhia leh hmeichhia) innei leh inpâwl te, ran pâwl te chungah action nâ taka lâk tur a ni. Tuai leh Patil (Gay & Lesbian)-te chungah dân kan chelek ngam chiah dawn em le?

(4). SA THI RUANG KHAWIH-TE: Sa thi ruang khawih hi Hriselna atâna pawi thei thil a ni. Hriselna lam kaihhnawih-a hrêm ngai te pawh thlei bik nei lova action lâk zel tur a ni.

(5). HNAM ISSUE: Hnam-dang nupui-pasala nei-te chungah action lâk tur a ni. Mingo emaw, Midum emaw, Nupui-Pasala Neitute chu Nehemiah tih angin “kut thawh meuhvin” action kan la ve ngam meuh ang em le??? (cf. Neh. 10, 13:23-29).

Pathianin Hnam-dangte tâna Khapna Thupek a Chhuah, a chunga Tarlan tâk-te khi Hnam-dang-ten an Bawh-chhiat chuan Action la nghal vat turin Israel fate chu Pathianin Thu a pe thlap bawk tih kan hmu a. Hnam-dangte hi ţha taka enkawl a, an chunga ţhat-chhuah tura Thupek kan nih ang tho hian, Hnam-dangte hian Anmahni tâna Khapna Dân an Bawhchhiat chuan dim miah lova dik taka an chunga action la hmiah hmiah turin Pathianin min phut tel bawk a ni, tih hi kan theihnghilh loh a ţha hle a ni.

3. THU HMÂWRBAWKNA

Kan sawi tâk ang khân, Golden Rules hi “Pathian nen-a kan Inkâr” lam aiin, kan “MIHRING-PUITE NENA KAN INKÂR” a ni ber a. Kan Rilru put hmang te, kan Ţawngkam chhuak te, kan Chêtzia te, leh kan Thiltih te khân Ringtu Dik tak, Ringtu Nun Duhawm, Midangte tâna Malsawmna Nun, Nun-Chhenfâkawm, Ringtu Nun Rangkachak Neitu kan ni leh nih loh a Hrilhfiah chiang mai dawn a ni.

Thufing chuan, “ACTIONS SPEAKS LOUDER THAN WORDS” (People May Doubt What You Say, But They Will Believe What You Do) a ti a. Thusawi aiin Thiltih hian Thu a lo sawi ring zawk daih a, Nun a lo khawih Danglam daih zawk a lo ni. Thiltih hian Midangte Nun-ah pawh Awmzia a lo nei thûk zawk daih a, an Nun a lo Hneh thei ber zawk a lo ni. Bible-in, “Miin in chunga an tih a, in duh tur ang zelin mi chungah pawh ti ve rawh u,” (Luka 6:31) a ti bawk a. Bible aţang ngeiin Mipui Să-hăwk thiltih tenawm-zia leh ţhat lohzia kan hmu a. An Thiltih Sual Râpthlâk tak tak aţangin Zir tur kan nei ţha hle a. Hei hian, a Number tam lam ringawt ngaihdăn hi a Pawm-tlâk ber lem lova, a Zui-tlâk ber lem loh tih a lang chiang hle a ni. 

GOLDEN RULES HI KAN MIHRINGPUITE NENA KAN INKÂR-A HMAN TUR A NI KAN TI A. MAHSE, GOLDEN RULES HIAN VANRAM A KAWK TLAT MAI LE!!! Chuvangin, Ringtu, Piangthar inti si, Midangte Khing ut ut ţhin leh an Chhiatna tur zawng reng mi i nih chuan, i thlarau a ngaihtuahawm hle tihna a ni. I Thiltih duh dân leh I Chêtzia aţanga chhûtin Ringtu Dik tak i ni lo tih a lang tlat. Lal Isua nena Inzawm Ringtu Dik tak, Rinnaa awm i nih leh nih loh ngun takin infiah vat ang che (2Kor.13:5). Chutilochu, Tirhkoh Paulan, “Tun dam chhung chauhva Krista chunga beiseina kan neih chuan mi zawng zawnga khawngaihthlâk ber kan lo ni ang” tia a lo sawi ang khân, I Sim lohva, I insiam-ţhat loh chuan Vanram chu i hlat viau tihna a ni (1Kor.15:19).

Miten min chhiar, Min thlir reng e,

Ka awm dân zawng zawng an hai lo,

Krista nun-mawi leh Chanchin Ţha,

Keimahah hian hmuh an châk ţhin.

“IF YOUR RELIGION HAS NOT CHANGED YOUR LIFE, YOU NEED TO CHANGE YOUR RELIGION”