HRUAITU THINCHHIA LEH A SAWHKHÂWK HI AVA PAWI ÊM!! (Hruaitu Ropui Mosia Khân Engnge A Tih-Sual Chiah Le???)

1. THUHMAHRUAI

Thil Tih-sual rau rau-ah chuan, Mosia Thil tih-sual hi a pawi ber awm e!! Kanan ram a luh theih loh phah a. A thih hnu-ah leh zel pawh a ruang thlengin Setana leh Vantirhkoh Mikaela’n an la inchuh zui a nih kha!!! Hruaitute pawimawh-zia leh, Hruaitu tân chuan, thinrim laia Țawngkam leh Thiltih Fimkhur a, in-sûm a țul nasat-zia min hrilh nawn mawlh mawlh a ni. Mosia dinhmun aţang hian Hruaitute hian midangte an hruaisual (misguide) theih zia te, midangte an hnuaichhiah (oppress) theih zia te, lal an hrawt nasat theih zia te leh an nihna leh lalna (status & power) an hman-sual (abuse) theih zia te a lang chiang hle a. Hruaitu thil tih sual-in anmahni ngei a tihchhiat dân leh midangte pawh a khawih-pawi theih zia alang chiang hle. Thlarau lama tih-sual neih phei chu a pawi thui lehzual awm e, chatuan a daih dawn si a. Chuvangin, Bible chuan kan ţawngkam leh thiltih-te fimkhur turin min ti a, “I thu chuan thiam a chan tir ang che a, i thu vêk chuan thiam loh a chan tir bawk dawn che asin” tiin min lo vaukhan lâwk tawh a ni (Mat.12:37).

2. HRUAITU ROPUI MOSIA

Bible-ah hian Lal Isua tih-lohvah chuan Mosia hi Hruaitu ropui ber a ni. Bible Scholar-te chuan, “Lal Isua hi chu Messiah a ni a, Pathian Fapa a ni a, Mosia, mihring ve mai nên chuan tehkhin chi a ni lo. Chuvangin, Mosia hi Tungchhova piang tawh mihring zingah chuan Hruaitu ropui ber a ni e,” an ti. A pawmawm viau.

Mosia kha Pathianin a chhuangin, a fak khawp mai, “Mosia chu lei chunga mihring zawng zawnga zaidam lâwtlak a ni a… Ka chhiahhlawh Mosia hi zawng… ka chhûngkaw thu zawng zawngah chuan a rinawm a ni. Ani nên zawng ţawngkain thurûk awm lovin tlang takin kan inbia ang a; LALPA hmêl pawh a hmu ang” a tih ngat kha a ni (Numb.12:3, 7-8). Theologian-te pawhin, “Judate Zinga Hruaitu Ropui Ber” (Greatest Jewish Leader) tiin an vuah hial a ni. Mosia hi Hruaitu ropui chauh a ni lova, Zawlnei leh Dân Petu leh Bible-a Lehkhabu Pawimawh Ber 5-te Ziaktu (Prophet, Lawgiver & Author of Pentateuch) a ni tel bawk a ni.    

Mosia kha dik leh ţha a tih-ah chuan a huaisen zia leh a inngaihtlawm theih si zia kha a mak hial zawk. A Unau (chipui) tidudahtu Aigupta-mi kha a that hmiah ngam a!!! Lalpa’n Israel fate Hruaichhuaktu atâna a duh avangin Median ramah a hnawtchhuak a, lungawi tak leh thuawih takin Beram vêngin thlalêrah kum 40 lai tlâwm takin a awm leh thei mai a nih kha!!! Aigupta Finna zawng zawng zir chhuak a ni a, tunlai angah chuan nise Ph.D. Degree hi 5 vel tal nei turah a ngaih theih ang.

Pathianin Mosia a koh laia, “Kei mi ţawng mawh ka ni si a,” (Ex.6:30) a tih hian, Mizovin “Dang-âwk” kan tih lam hi sawi a tum lo. Tirh.7:22 Kan en chuan hei hi a chiang hle, "Tin, Mosia chu Aigupta rama mite finna zawng zawng an zirtir a, a thu-ah leh a thiltihah a ropui êm êm a (mighty in words & in deeds)” tiin a inziak a. Chuvangin, “Țawng mawh” tih hi “țawng muang” tihna emaw, “țawng thiam țha tawk lo” sawina emaw, ni zawkin alang.

Mosia khân, Kum 40 a tlin thlengin Aigupta țawng (leh Hebrai țawng tlêm) a hmang a. Kum 40 dang kha (Hebrai țawng leh Aigupta țawng hmang miah lovin) Median țawng hlir a hmang leh thung a!! Chumi hnu-a Aigupta țawng leh Hebrai țawnga Thu, thiam tak leh nâl taka Pharaoah hmaah leh Israel fate hnena va sawi-kawp chu atân thil harsa tak a nih thu a sawina ni zawkin alang. Chuvangin, Pathian pawhin a hriatthiam-pui hle a ni ang, Aiguptaa awm, a unaupa Arona (Aigupta țawng leh Hebrai țawng thiam kawp leh thiam nâl tak) kha Thusawitu (Spokesman) atân a ruat sak ta rêng a nih kha (Ex.7:1-2).   

3. MOSIA TIH-SUAL 7-TE

Hruaitu Ropui Mosia chuan, a hruaitu nihna leh a mihrinna hmang sualin Ramtiam pawh lut thei lo khawpin Pathian pawi a khawih ta tlat mai!!! Bible Scholar-te chuan, Hruaitu Ropui Mosia khân Kadesh hmuna Lungpui bulah khân Pathian chungah “Thil Lian Tak Tak 7 A Tisual” an ti a, Chungte chu kan zir-ho dawn a ni. Numb.20:8-a kan hmuh angin, Pathian Thupek hi a chiang tawk hle, "I Tiang la la, pungkhâwmhote chu awmkhâwmtîr la, nang leh i unau Arona nên, an mithmuhah Lungpui chu a tui tichhuak tûrin hrilh la; Lungpui atâ chu tui i lâkchhuahsak ang a; tichuan pungkhâwmho leh an rante chu i intir dawn nia," tiin.

Pathian Thupêk khi a chiangin, a tam lo hle a. Mahse, Mosia khân a zawm mang hlek lo mai a!!! Amah duhdân angin a Țawngin Thil a ti ta hmiah hmiah mai a, Thil 7 lai a tisual ta nghe nghe a ni. Heng Mosia Tihsual 7-te hi tawi tê tê-in i lo en-zui lawk teh ang.  

3.1. HELHMANGHOTE U!!! (Numb.20:10):

Israel fate chunga Mosia ţawngkam hmasa ber hi a nâ hle mai!!! Israel faten an la nâ lem lo!!! Lâk nât na-châng an hre lo nge? Pathian zawkin a la nâ êm êm tlat mai le!!! Mosia ţawngkamah hian Pathian hi a nâ ngawih ngawih a ni. A chhan chu, Israel fate Neitu leh a Dintu leh Siamtu a ni tlat a ni. Mosia ţawngkamah hian, “Nihna, Hlawhtlinna, Malsawmna, Lalna leh Thuneihna Hmansualna” (abuse of power & status, etc.) a lang chiang hle. Pathianin Israel fate Hruai chhuak tura a ruat avangin, Mosia hi a indah-sâng hle a, a inhmu-lian hle a, “Lal ber, Thunei ber, Kei ber” emaw a inti ta niin alang. Miin Thuneihna, Hlawhtlinna leh Dinhmun ţha an lo chan hian, a Petu leh Malsawmtu Pathian theihnghilh-in, Midangte an hmusit a, “anmahni chauh an inhmu ta ţhin” hi Pathian laka an tihsual lian tak a ni fo ţhin.

3.2. PATHIAN AIAH “KAN” A HMANG!!! (Numb.20:10)

Israel fate hnena Mosia ţawngkamah khân, “Pathianin” tih aiah “Kan” (we) a hmang kha a pawi hle. Kha “Kan” tih ţawngkam a hman khân, Pathian a dah chungnung lova, Pathian aiin anmahni (an unau) kha an indah-sâng zawk tih a târlang a (Cf. Jak.4:13-17). A ţawngkam hman, “He Lungpui atâ hi tui kan lâk chhuahsak dawn che u em ni?" a tih aţang hian, Pathian Thiltihtheihna a hmu ropui tâwk lova, Pathian a chawimawi tâwk lova, a thiltih-ah Pathian a tel ta lova (not recognized God), Israel fate pawh engah mah a ngai lova, amah leh a unaupa Arona chauh chu an inhmu-lian lurh tih a lang chiang hle.

3.3. LUNGPUI BE LOVIN ISRAEL FATE A BIA!!! (Numb.20:8, 10)

Pathianin Mosia hnena tih tur a hrilh kha a chiang tawk hle, “an mit-hmuhah Lungpui chu a tui tichhuak turin hrilh la” (Speak to that Rock) tih a ni. Mahse, Mosia khân Lungpui be (hrilh) tura a tih chu be (hrilh) ta lovin, Israel fate chu a be (hrilh) ta zawk hlauh thung a ni. Pathianin a hrilh loh dân (a thupek loh ang zawng) daih-a Mosia a che leh a ţawng ta mai hi, Pathian thin a ti-ur hle tih a lang. Mosia hian hre reng chunga a ti-luiah Pathianin a ngai niin alang bawk.

3.4. LUNGPUI BE LOVIN, TIANGIN A VUA!!! (Numb.20:11)

Bible-a kan hmuh angin, “Tin, Mosia chuan a bân a phar a, Lungpui chu a Tiang chuan vawi hnih a han vua a” tih a ni. Mosia tihsual dang leh chu, Pathianin Lungpui kha a tui tichhuak tura hrilh turin a tih kha hrilh ta lovin, a Tiangin a vaw ta zawk a nih chu!!! Bible Scholar ţhenkhat chuan, “Mosia’n Lungpui hnena a tui tichhuak tura a hrilh lo hi a pawi viau tawh naa, a aia pawi leh serious zawk thil a tihsual chu, Lungpui a vua hi a ni e” an ti!! An sawi zelnaah chuan, Lungpui hi Lal Isua Entirna a ni a (cf. Deut.32:4, 1Sam.2:2, 2Sam.22:2, Sam 18:31, Isaia 17:10, Mat.16:18,etc.). Tichuan, Lungpui vuak hian Lal Isua hmuhsitna leh tihduhdahna leh khenbehna a entir a, Thuthung Thar hun ang atân phei chuan, Lal Isua Khengbettute zinga tel ang a ni e, an ti hial!!!

3.5. PATHIAN THUPÊK LOH THIL A TI-NAWN-LUI!!! (Numb.20:11):

Pathian Thupêk lohvin Lungpui a Vuak mai-ah a tawp lova, LUNGPUI KHA VAWI 2 LAI A VUA A NIH CHU!!! Mosia hian Pathian Thupêk loh thil a tih mai bâkah, a ti-nawn-lui kher tihna a ni. Mosia thiltih dân hi Mihring pawhin ngaihthiam leh ngaihdam har kan tih ber ţhin ang kha a ni. Miin, hriatlohna leh hriatsual avanga thil an tisual a nih chuan, hriatthiam leh ngaihdam a har lo. Mahse, hre reng chunga tisual-lui mai piah lama, ti-sual-nawn-lui kher hi chu a rûnthlâk a, a thinrim-thlâk tak zet zet ţhin. Mahni in-enfiah nân hmang ta ila, “Pathian Duh-loh-zawng a ni”, tih hre reng chungin Thil sual i ti-nawn-lui-fo ţhin em? I ti-sual-nawn-lui-fo ţhin a nih chuan Ringtu ngaihtuahawm tak i ni ang.

3.6. PATHIAN A RING DUH LO!!! (Numb.20:12)

Mosia Thiltihsual kha, a pâwnlama lo lang-chhuak chauh kan hmu a. Mosia chhungril lama Pathian pawi sawi-tu ber zawk chu Bible-in min târlan sak a, “Tin, LALPA’N Mosia leh Arona hnenah chuan, "MI RIN LOHVA Israela thlâhte mithmuha mi chawimawi loh avangin heng pungkhawmho hi ka pêk ramah chuan in hruai lo vang," a ti a” tiin. Mosia’n Pathian Thupêk a kalh te, Pathian Thupêk a lo tih-danglam te, Mahni a indah-sân te, Rawngbawlpui (Israel)-te a hmuhsit te, Hre reng chunga thil a tihsual-nawn-luih te kha Bible chuan, “Pathian a rin duh loh vang” tiin min hrilhfiah sak a ni.

3.7. PATHIAN A CHAWIMAWI DUH LO!!! (Numb.20:12)

Mosia Thiltihsual zinga Zir tur pawimawh tak mai kan neih pakhat chu, “PATHIAN A CHAWIMAWI LO” tih thu hi a ni. Bible-ah, “Tin, LALPA’N Mosia leh Arona hnenah chuan, "Mi rin lohva Israela thlâhte mithmuha mi CHAWIMAWI LOH AVANGIN heng pungkhawmho hi ka pêk ramah chuan in hruai lo vang," a ti a” tiin a ziak a.

Mosia khân, Pathian aiin amah (an unau) kha a indah pawimawh a, a indah sâng zawk a, a ţawngkam chhuakah pawh khân, “Pathian” aiah “Kan” a hmang a, Pathianin Tih tur a hrilh pawh, a hrilh loh dân ang zelin a ti a nih kha. Tin, Pathianin Amah an chawimawina hmun tur atâna a duhthusam hi a sawichiang hle a, chutah chuan Mosia hi a failed chiang hle bawk, “Israela thlâhte mithmuha mi chawimawi loh avangin” tiin Pathianin a sawi lang kher a ni.

Ringtute hi a rûk leh a lang (rilru & taksa)-a Pathian fak leh chawimawi tur kan ni. Mite hmuh loh laia Pathian kan biak a, kan fak a, kan chawimawi hi Lalpa lawm-zawng a ni. Chutihlaiin, Pathianin Amah kan chawimawina leh fakna a lawm êm êm chu, mite zingah, mite hmuh lai ngeia Amah kan fak leh chawimawi hi a duh ţhin a ni. Lal Isua’n, “Mite hmaa mi ţan apiang chu ka Pa Vâna mi hmaah ka ţan ve ang” a ti a (Mat.10:32-33). Herod Agrippa kha Pathianin malsawmna tam tak a pe a. Mahse, mipui hmaah a Petu Pathian chawimawi nân a hman duhloh avangin chawplehchilhin a thi a nih kha (Trih.12:20-24).

4. SETANA LEH MIKAELA’N MOSIA RUANG AN IN-CHUH!!!

Bibe-ah, “Nimahsela, Mikaela, Vantirhkoh chungnung ber mah khân Diabola nen an inbei a, Mosia ruang thu-a an inhnial laiin Diabola  chung thu rêlsakin a sawichhe ngam lo va, "Lalpa’n hau zawk che rawhse," a ti ta zawk a” tih ziak kan hmu a (Juda 9). He Mosia ruang inchuh thu hi Bible Bu dangah in-ziak hmuh tur a awm lo.

Mosia kha a thih khân, Ramtiam lut lovin, Moab rama Nebo tlânga ruam pakhatah, tuma hmuh chhuah theih loh leh hriat theih lohna tur hmunah a ruang kha phûm a ni a (Deut.34:5-6). Mosia ruang a rûka phûm chungchangah hian, Ngaihdân tlânglawnah chuan, Setana’n Mosia ruang hi sual hmanrua (diabolical purpose)-a hmang a, engtiti emaw-a Israel fate bum a, Pathian (idol/god/object of worship) anga biak tir a tum ang tih Lalpa Pathianin a hlau niin an ngai. Sebawng no lem an biak aţang khân Pathianin Israel fate hi a fimkhur-pui hle niin alang. Chuvangin, Pathianin Vantirhkoh chungnung ber Mikaela chu tirin, Setana’n Mosia ruang chu thil sual tih nân-a a hman lohna turin a ven-tir ta a ni.   

Speaker ţhenkhat-ten an thusawi apianga Setana leh a hote an duh hun huna Hremhmun lama an tir-liam zung-zung ma ţhin leh an tir-liam zing-ut mai ţhin erawh hi chu a mak deuh!!! Vantirhkoh chungnung ber Mikaela meuh pawhin Setana hi hauh ngam chin a nei a. Lal Isua tih tur chin a awm tih a lang chiang hle. Lal Isua tih-tur bîk-te hi kan lo tih-khalh vek palh ang tih pawh a hlauhawm. Awmpui fel deuh nei Chhungkaw chanchin an sawi țhin kha kan la hria-in ka ring. Chengkawl a lo chhum a, a lo hip-chhuak vek a, hip-chhuah sa vekin Thlengah a lo dah!!! Tumahin an ei duh lo!!! Mi tih-tur lo tih-khalh hi a châng chuan a tênawm lamah a kal thei viau ang.

5. ENGNGE KAN ZIR CHHUAH TÂK LE???

Pathian hnen ațanga Malsawmna kan dawn – Hlawhtlinna, Dinhmun, Nihna, Thuneihna leh Rohlu kan neih-te (achievements, status, position, power, assets) leh Pathian Inpuanna Hmanrua (Hrilhlawkna/Thlarau Thilpêk/Thlarau & taksa damna, etc.)-te hi Setana hian min biak-tir mêk a, kan pathian mêk tawh a ang khawp mai. Fakna Hla chuan, “Lalpa, I hmangaih hring faten, Nang Malsawmtu hre chang lovin, I malsawmna kan buaipui lua, I mite kan dam thei lo” a lo ti a. Zoram Ringtute hian kan harh chhuah hmâ chu he hla hi i sa-nawn tlut tlut teh ang u.     

Mosia khân, Pathian aiin AMAH MOSIA kha a indah lian zawk a, a indah hmasa zawk zel a. Chuvangin, Pathian a hliah a, Pathianin hna a thawk thei lova, Pathian ropuina a lang thei lo. KEIMAHNI (KEI) hian Pathian ropuina tur leh Thlarau Thianghlim Hnathawhna tur hi a lo dâl nasa thei hle tih a lang. Thufing chuan, “Nun hlawhtling tak neih i duh chuan, a Hmasa berah Pathian dah la, a Dawtah Midang dah la, a Hnuhnung berah Nangmah indah ang che” a ti a, a dikin ngaihtuah a tithui tak zet mai.  

Mosia nun aţanga lang chiang êm êm chu, Pathianin a hman tur-te hi chu nasa takin (sâng tak leh hniam takah, chawimawina leh mualphona kaltlangin) a lo TRAIN ţhin tih hi. Pathianin a Hmanrua (Ringtu) a Train hun chhung (rei zawng) hian tawp-chin a lo nei hauh lova, Dam-chhung a ni tawp bawk!!! Pathianin amah ringtu chak lo tak (frail people)-te hmangin thil mak leh ropui tam tak a lo ti ţhin tih a lang chiang hle bawk.

Mosia’n a Thiltih zinga Pathian Thupêk a zawm awmchhun chu, “Tiang lâk leh, Mipui Awmkhâwm tir” chiah kha a ni. Hei hian a Entir nia lang chu, Kan Kohhran (denomination) Tihdân zui leh Program leh Thiltih dân zuia kal ringawt hi tunlai ringtu tam ber-te lungawina a ni. Mosia chanchin atang hian, hei hi a tâwk lova, Pathian a tilawm zo lo tih a chiang hle. Achunga “Mosia Tihsual 7-Te” khi hre reng chungin, Kohhran Tihdânphung (Church Traditions) piah lamah, Thlarau Thianghlim Duhdân leh Remruatna kan zui a, kan zawm a, Pathian Thupêk anga kan kal hi a pawimawh lai ber zawk chu niin alang.

Mosia nun aţanga Hruaitu Mizia zir tur pawimawh tak awm chu, thil ţha leh ţha lo a hmuh veleh-a a che-chhuak (react) vat ţhin kha a ni. Amaherawhchu, a chêt-chhuahna (reaction)-ah khân a ţha zawng leh a ţha lo zawnga a chêt-chhuah a awm a. A ţha lo zawnga a chêt-chhuah tlêm tê khân, a ţha zawnga a chêt-chhuah tam zawk daih kha a khuh-bo daih thung!!!

“Mosia chu lei chunga mihring zawng zawnga zaidam lâwtlak a ni” tia Pathianin a fak tehlul nên!!! Kadesh-a a Țawngkam mawi lo tak leh a Chêt-chhuah dân dik lo tak (wrong reaction)-ah khân, Pathian nung pawi chauh a sawi lova, Israel fate (Pathian hmangaihte) kha deuhsawh tak leh hmusit takin, ţawngkamin a bêngin, a hnek tel bawk tihna a ni thei ang. Khatianga Hruaitu Ropui a che-chhe ta mai kha Pathianin a la nâ hle a, action pawh a nâ narawh e, Kanan ramri-ah, Kanan ram lut thei lovin a siam ta a nih kha!!! Lal Isua’n helaia Pathian rilru hi a lo sawichhuak reng mai, “Tin, Lalber chuan an hnenah, ‘Tih tak meuhvin ka hrilh a che u, Heng ka unau tê berte zinga mi pakhat chunga in tih chu ka chunga ti in ni,’ tiin a la chhâng ang” (Matt.25:40).

Lalpa Hmangaihte chungah hian kan fîmkhur ava ţul dawn êm!!! Hunpuma Pathian rawngbawl tura inpe Pastor, Missionary, Upa leh Kohhran-a Rawngbawltute leh a kul-a-taia ţangte chauh hi Lalpa hmangaih-te an ni lova. Anni bâkah hian, Chanhai-riangvai, rethei leh harsa, hmeithai leh pahmei, ţantu leh chhantu nei lo, an chanvo pawh chang ve thei lo, awpbeh, hmuhsit, deuhsawh leh endawnga awm mêk-te hi Lalpa hmangaihte an ni ve tho a ni. Heng mite hi Lalpa’n a ţan tlat a, an lamah Lei leh Vân Lal hi a ţang tlat a ni tih hi i theihnghilh lovang u.