AMEN!

Amen hi mi tam tak chuan ţawngţai tawpna chhinchhiahna ang lekah an ngai niin a lang a.  Hemi avang hian a nihna dik tak leh a awmze thûk zawk hi hriat a ţul êm êm a ni. Amen hian danglam bikna riau leh ropui rûkna riau a neih zinga pakhat hi han tarlang zawk ila. Khawvelah hian ţawngkam inţawm langsar tak tak pathum kan nei a, chungte chu Amen, Haleluia leh Coca-cola te hi an ni! A nihna dik tak leh a awmze thûk zawk hre lo mah se, khawvel mite pawhin Amen hi min ţawmpui ve a, an hre lâr hle a ni. Vawiinah hian Nehemiah 8:1-18 tlawhchhanin OT (Old Testament) leh NT (New Testament) aţangin Amen awmze thûk zawk leh nihna dik tak chhui kan tum ang.

1. OT Leh NT In Amen An Sawi Dan

OT-ah chuan Heb.amen tih hi vawi 25 vel hman a ni a. Amen hian kawh/tum hrang hrang a nei thei a - chiang, nghet, rintlak, dik, rinawm, tlo, chutiang tak chuan ni rawh se, tihna te a huam thei vek a ni. Thusawi ngaihthlâk pawm thlapna, nemnghehpuina a ni deuh ber. Qumran thuziakah leh Bible hmun tam takah a double-a sawi a ni fo bawk (Num.5:22, Neh.8:6, Chanchin Ţha Johana Ziak). A chang chuan, ţawngkam bulah hman a ni bawk (1 Ki. 1:36, Jer.28:6). Amen an hmanna chhan hi kawng 5 a awm a: (i). Pathian biakna atan (Ps.41:13), (ii). Pathian Fakna leh Chawimawina atan (Ps. 41:13, 72:19, 89:52, 106:48), (iii). Malsawm ţawngţainaah atan (1Chro.16:36), (v). Pathian anchhia puanchhuah nemngheh nân, Pathian zilhhauna leh thutiam pawmpuina atan hman a ni (Deut. 27:14-26).

Mahni thusawi tihnghehna/nemnghehna atan an hmang ngailo thung. Hun kal zelah Judate Synague-a an inkhawmnaah, Pathian biakna hmanrua, thuchham tur zinga mi (Liturgical element)-ah an hmang chho va. Inkhawmna hruaitu-in thuchhiar tur a chhiar zawhin mipuiin an pawmpuina entirna leh an chhanna atan “Amen” an chham rual ţhin a ni (Num. 5:22, Deut.27:15, Neh. 5:13, Jer.11:5).

NT-ah chuan Grk.amen (Hebrai ‘amen’chiah lachhawngin) chu vawi 100 chuang hman a ni. Matthaia’n vawi 31, Marka’n vawi 13, Luka’n vawi 6, Johana’n vawi 25 (a double hlirin) an hmang a. Grk.amen pawh hian OT ang thovin, “Pawmpui, nemnghet, ti-nghet, finfiah, remtihpui,  thlawp,” tih sawi nan hman a ni a. Lehkhathawn dangah chuan hmanna leh hman dan chi hrang hrang a awm laiin, Chanchin Ţha buah erawhchuan, a bul lamah (ţawngkam bulah) hman a ni ţhin a, hei hi Lal Isua chauhvin a hmang nghe nghe a, Apostolte leh ringtu dangten an hmang zui lo tlat  thung! NT-ah hian Amen hmanna hrang hrang kawng 10 lai  a awm a:

(i). Thusawi tur a pawimawhzia nemngheh nân, ţawngbulah Lal Isua’n a hmang ţhin (Thup.3:14, Joh.6:53, 10:1,7). (ii). Ţawngţaina kâr lakah hman a ni ve bawk (Gal.1:5), (iii). Ţawngţaina leh zirtirna an pawmzia lantir nân hman a ni bawk, (iv), Pathian mite nena inpâwlna, inpêkna an neihna tarlan nan hman a ni bawk, (v). Ţawngţaina tawpah hman a ni ţhin bawk, nemnghehna leh pawmpuina a ni ber (1Cor. 14:16), (vi). Pathian duhzawng leh remruatna an pawmzia uar taka sawi nan hman a ni ţhin (2 Cor.1:20), (vii). Malsawm ţawngţaina tawpah sawi a ni ţhin (Rom. 15:33, 1Cor. 16:24, Gal.6:18, Phil.2:5), (viii). Pathian Fak leh chawimawina atan hman a ni ve bawk (Rom.1:25,19:5, 11:36, 16:27, Gal.1:5, Eph.3:21, Phil.4:20, 1Tim 1:17, 6:16, 2Tim. 14:16), (ix). Ringtuten inpumkhata Pathian an fakna atan hman a ni bawk (Rom.15:33), (x). Pathian rinawmna puanchhuah leh nemngheh nân hman a ni bawk (2 Cor.1:18-20, 2Cor.1:15-22).

Hetiang hian khaikhawm ta mai ila, OT leh NT-ah chuan, Pathian fakna, chawimawina atan leh Pathian thu puan chhuahte miin Pathian an fakna leh an chawimawina te a dik zia nemngheh nan leh an pawmpui zia tarlanna atan te, ringtute Lal Isuaa kan inpumkhatna lantirna atan te-a hman a ni.

2. Pathian Fakna Leh Chawimawina A Ni

Pathian kan biaknaah hian fakna leh chawimawina hian hmun pawimawh tak a chang a. Fakna leh chawimawina chuan Pathian lam a hawi a, Pathian nihna ropui tak chu thinlung leh ţawngkam, chetzia te-in kan puang chhuak a. Nehemiah 9:5-a kan hmuh angin, Israel mipuite chuan dingin Pathian an fak tih kan hria a. Pathian faknaah chuan thinlung leh taksa peng hrang hrangte ţangrualin an che chhuak a. Chuvangin, fakna pawimawhna leh chungnun bikna pawh a ni reng a ni. Mi ţhenkhat ten, “A hla hi ka duhzawng a ni lo,” emaw, “A music hi ka tuipui lo,” emaw “Zai hi ka tui vena chi a ni lo,” emaw, tia zai leh lâm te an han ngainêp a, an aw, kut leh ke, thinlung Lalpa fak nân-a an inpe phal tlat lo hi chu… Pathian nihna dik tak an hriat phâk loh bakah Pathian fak hlutzia leh pawimawhna hi an la pawh (tem) lo tihna a ni thei ang.

Fakna Hla Siamtu chuan ringlo miten Pathian faka zaite hi duh lo mah se, ringtute chuan kan thlahthlam theih lohzia sawiin, “Lalpa hre ngai lo ten lawm hla sak hnial mahse, Van Lal fa duhtak-te zawngin an sa ngei tur a ni,” tiin (KHB No. 278). Tichuan, Pathian chawimawina leh fakna kan pekna kawng pawimawh tak pakhat chu Amen pek hi a ni. Fakna thu leh Hlate chuan Pathian chu inremna thu min thlunsaktu leh a thuthlung ang zela min enkawltu a nihzia a puang chhuak ţhin a (Neh.9:7,8). Chuvangin, Fakna hi Ringtu (Kristian) nuna thil thleng (awm) ngei ngei tur a nih zia hi kan hriat chian a pawimawh hle.

Dr. Donald English, Sâp rama Pathian thuhriltu ropui leh lâr tak chuan, “Pathian biak inkhawmna thuchah ka sawi zawh hnuin ka rawngbawlna ka chhui let a, Pathian duhdanna ka inhman tawk lohna lai kha eng ber nge ni ta ang tiin ka thiltih tawhte ka chhui let ţhin,” a ti a. Hei hi thil ţul tak niin a lang. Pathian biakna-in a tum ber chu kan ngaihtuahna chu thutakah nghatin kan inbuatsaih tur a ni a, kan chakna leh phurna (emotions) te chu thutak chiahzawp (hneh) tura kan inphal a ngai a, kan taksa pawh thutak hman theih tura chettir a ngai  bawk a. Ngaihtuahna leh phûrna te thiltih nen ţangkawpin, Pathian kan bia a, kan fak kan ti thei chauh  ang.

A nih loh leh kan taksa Biak-In ah awmin kan rilru-in kan inchhung chhuahsan si lo sela, emaw, kan rilru chuan hmun dang daih ngaihtuahin vâk bo daih sela, chutiang chu Pathian bia, Pathian fak kan ni thei ang em? Chutiang chu Pathian biak leh fakna-in a tum a ni lova, a tling ngai bawk lovang. Pathian biak leh fakna-in a tum chu – Pathian ropuina puanchhuah te, kan chunga a ţhatna leh a thiltih ropui tam tak-te avanga kan lawmna leh hlimna leh lungawina te lantira puanchhuah leh entir te hi a ni.

Mi ţhenkhat chuan, Pathian fakna-ah hian hmanrua hman duh bik leh hman bik tur-te awmin an ngai a. Tunhma chuan, U.S.A, U.K-ah te khuan Piano leh Guitar, Drum set leh Keyboard etc. te chu Rock Music atan chauhva hman tur angin an lo ngai ţhin a, tunah erawh an ngaihdan a danglam ta. Mizormah pawh hian tunlaia kan ngaihdan tlanglawnah chuan Biak In leh Zaikhawmnaah chuan Khuang bâk hi chu fakna hmanruaah kan la pawmzam thei tak tak lo niin alang. Tun kum zabi tharah erawhchuan, khawvel pawhin hma a sawn zel a, Rawngbawlna key thar leh Method hrang hrangte lo chhuakin Musical Instrument hrang hrang te pawh hman chhoh a lo ni ve ta zel a, hei hian Musical Instrument chi hrang hrang kha Pathian fakna hmanrua atana a siam zel bâkah Pathian fak turin a pui a pang, a lian a tê, Pathian thilsiam zawng zawng a huam tel  thei bawk ta hi thil lawmawm tak a ni.

Bible hian Pathian fak nân hmanraw chi hrang hrang hman a pawimawhzia a sawi uar hle a (Sam Bu zawng zawng hi entirna ţha tak a ni awm e). Salvation Army din chhuaktu William Booth-an kum 100 chuang liam tawh ah khan Pathian fak pawimawhzia hetiang hian a lo sawi tawh a, “Engvang mahin Setana hian hla ţha leh ngaihnawm te hi a neih vekna chhan tur a awm lo,” a lo ti tawp tawh a. Sir Cliff Richard pawhin, “Music hi Pathian siam a ni a, Setana hnena aţanga Music ţha leh Hla ţha, thlûk mawi tam tak te chhuh let leh turin ringtute kan pawimawh êm êm a ni,” tiin a lo puang chhuak tawh bawk a ni. Chuvangin, rimawite hi Pathian kan fak leh chawimawina hmanraw pawimawh tak an ni a. Amen kan pek hi Pathian leh mihring hriatah rimawi ropui tak a ni. Pathian tana kan inphalna leh inpekna lantirna atan Amen sawi leh pek hi thil ţul leh pawimawh tak a ni. Chuvangin, Lalpa ropui nan ring takin AMEN hi i pe zel ang u.

3. Pathian Thu Puanchhuahna a Ni

Amen chu Pathian fakna kawng khat a ni thu kan chhui tawh a, tunah chuan Amen chu Pathian thu puanchhuahna a ni tiin kan chhui leh dawn a ni. Pathian Thlarau hruaia awmte nuna hmuh theiha lo lang pawimawh êm êm ţhin chu, Pathian thu-ah an tuihâl a, Pathian thu-ah lawmin an hlim a, Pathian thu-ah innghatin Amen an ti thei zel ţhin a ni. He nun hi Israel mipuite chungah leh Ezra nunah chiang takin kan hmu a ni. Puithiam Ezra chuan mipui  zawng zawng hriatah Dân bu chhiarin Pathian a fak a, mipuii ‘Amen’ tiin an chhawn a, kunin hmaia lei siin Lalpa chibai an bûk a ni (Neh. 8:6). Thlarau mite dinhmun hi Ezra hian a lan chiantir berin a lang. Ezra chuan Pathian thu leh Dân pek te chu ngun takin a zir a, lawm takin a pawm a, innghahna atan  hmangin ţhahnemngaih takin mipuite chu a zirtir ţhin a ni (Ezr.7:10).

Heng thu aţangte hian Pathian thu puan chhuah chu thlarau mite hna pawimawh ber a ni tih a lang a, Pathian thu ngainatna leh a taka hmanga midangte zirtira puan chhuah hi Pathian thil tum pawmpuina leh Amen puina chiang taka langchhuak kan hmuh theih chu a ni (Neh.8:2-8). Pathian thu puan chhuahna-ah hian Thuhril rawngbawlna (Preaching) leh Zirtirna (Teaching) te hi kan hman ber an ni a. Zirtirna hi a pawimawh hle. Ezra leh Nehemiah rawngbawlna pawh hi ngun taka kan en chuan Zirtirna lamah an kal nasa tih a hriat a. Zirtirna-ah chuan ngaihthlatuten Pathian thu tum leh nihna chiang tak an hriat theih nan a fiah thei ang bera hrilhfiah a ni ţhin a. Chu chu miin a hriatfiah a, a pawm chuan Amen pek kha thil har a ni tawh ngai lo. Chuvangin, miin Pathian thu dik a pawm thlap a, a innghah ngam thlap theih nân Pathian thu hi chiang taka puanchhuah a, hrilhfiah a ngai hle a ni.

4. Pathian Hnena Thutiamna a Ni

Nehemiah lehkhabu entir nân kan la chhuak tawh bawk a, lo hmang zui zel ila. Nehemiah Bung 9 tawpah chuan mipui zawng zawng ten Nehemiah leh Ezra thusawi (thuhril leh zirtirna) zawng zawng te chu an hriatin, Pathian thu dik zia, an nundan dik loh si zia, Pathian hmangaihna leh Pathian thutiam din nghh zia an hriatin, “Chung zawng zawng avang chuan thu nghet tak kan thlung a, kan ziak a,” tiin Pathian hnenah a tharin, thinlung zawng zawngin thu an tiam nghe nghe a ni (9:38). Nehemiah Bung 10-ah phei chuan Pathian hnena an thutiam chu kawng hrang hrangin an nemnghet (amen) a:-

(1). An fanu-fapate hnam dang neih tir lo turin (v.30), (2). Kum 7 dan-a leiba ngaidam zel turin (v.31), (3). (Puithiam chanvo) Fulltime worker-te tana thil pek pe turin (v.32), (4). Pathian Biak In-a tihtur zawng zawng tih te (v.33), (5). Thlai thar, fa leh ran piang hmasa te Pathian hnena hlan zel turin (vv.34-36), (6). Sawma pakhat pe zel turin (v.37), (7). A chunga an Thutiam zawng zawngte thlahthlam lo tura an intiamna leh dân hial an in-siam thu an ziak lang bawk a ni (v.39). Heng thutiam hrang hrang nghet taka an siamtheihna chhan chu ţhahnemngai taka fakna, thuhrilhna leh zirtirna-te an neih vang a ni. Pathian thu tak leh dân pek te chungchanga zirtirna fel tak mipuiten an ngaihthlak hnu chuan, ‘A dik a ni’ tiin, ropui takin bân phar meuhvin ‘Amen, Amen’ an ti rual dual dual a. An mi lian te, Levi-hote leh Puithiam ten ziak meuhvin an nemnghehpui bawk a ni (Neh.8:6, 9:38).