Luka 22:19, “Hei hi ka taksa, in aia pek tura chu a ni, mi hriat reng nan hei hi ti țhin rawh u”
1. Kohhran-te Hian Kan Tisual Elo?
Phaia lehkhazir, English service-a inkhawm thin pakhat hian, tifuh inti takin, “Lalpa zanriah theh chungchangah hian Kohhran-te hian kan tisual lian khawp mai…” tiin, ka hriat theih ngei tur hian a sawi chhen mai a! Ka ngaih tha lo chuan Restaurant-ah “Coffee tui tawk ka khilai ang che…”
tiin ka luhpui a, ka zawt ta chawt mai a. Thil awmzia a han sawi chuan
ngaihtuah ti thui tak Bible chang, Kohhran serh leh sang nen-a inzawm
pawimawh tak mai thu-ah a rilru a lo buai viau a, Kohhran-te chu ti dik
lo min ti a, min lo dem viau chu lo niin…
2. English Bible-ah, “Ti Ţhin Rawh U Tih A Awm Lo”?
He tlangval lehkhathiam hian, eng Pathian thu zirtirna nge a lo
dawnsawn sual chu a sawi duh lova. Amaherawhchu, a complaint ber chu, Mizo Bible-a Luka 22:19 thu, “…mi hriat reng nan hei hi ti țhin rawh u” tih laia “ti țhin”
tih tawngkam tak hi English Bible-ah a awm lo. Mizo Bible letlingtuten
an belh-chawp leh an tih danglam a ni, tiin ngaihdan a lo siam chu niin!
English Bible hi kan han en chuan, “Do this in remembrance of me” tih chauh a lo in-ziak kher kher bawk nen…”ti țhin” tih chu dik lova ngaih a awl hle dawnin a lang ta a ni.
3. Bible Bu Dang & Chang Dangah Pawh En Ve Bawk La?
Bible hi Pathian thawkkhum, nunna thu a nih avangin chiang fek fawka
hriat-fiah leh hrilh-fiah a har a. A chang chuan tawng danga a fiah zawk
chang a awm a, a chang chuan mahni tawng ngeia a fiah zawk chang a awm
bawk. A chang chuan a kawppui, Bible bu dang leh Bung danga kan en chuan a lo
fiah em em bawk.
Helai thu-ah pawh hian, Luke 22:19 chauh en chuan a buai theih viau mai thei. Mahse, hemi thu vek hi Paulan 1Cor.11:24-25-ah chiang takin a tarlang a. Bible scholar-te chuan, a tawngkam hi en-in, Paula hian Lalpa zanriah chungchang hi Lal Isua hnen atang ngeiin (engin a chhuntluk lai khan) a dawng niin an ngai. Zawlnei Isaia chuan Pathian thu-in kawppui a nei vek a, kim lo a awm loh thu a lo sawi tawh bawk a ni (Isaia 34:16-17).
4. A Ţawngbul Lamah “Ti Ţhin Rawh U” Tih A Ni Reng Alawm Le!
Sawi tak ang khian, Luka 22:19 ah chuan, “ti țhin” tih tawngkam chiah hi English Bible-ah awm lo angin a lang na a, Bible bu/chang dangah, 1Cor.11:24-25 ah chuan chiang takin “ti țhin” (this do ye, as often as ye drink it) tiin English Bible pawhin a ziak tho a ni.
Mizo țawnga “ti țhin” (Lk.22:19, 1Cor.11:24-25) tih hi Grk. poieite, a ni a. Grk. Poieite (do this/as often as/ti țhin) hi a grammatically chuan, “present imperative active” a ni a, “a prolonged form of an obsolete primary; to make or do in a very wide application (more or less)” tiin an hrilhfiah a ni . Hei hian “a khat tawka tih-nawn fo” a kawk.
Mizo tawng hian Greek tawng chiah chiah hi a lo la-chhawng zawk a,
English hi duhthu a lo sam lo lek lek zawk chu lo niin! Chuvangin,
Lalpa zanriah sacrament chungchanga tawngkam pawimawh tak, “Mi hriat reng nan hei hi ti țhin rawh u”
tih hi Mizo Bible-ah hian dik takin an lo letling a, hlauhthawn tur
reng reng a lo awm lo. Hetiang hian ngaihtuahna min pe hial, Mizo Bible letlingtute kha thangthar-te aiin an zir sang lo zawk na a, an lo va fingin, an lo va fakawm em ka ti ta a ni!
